█▓▒░ طلقها بسبة الممثلة التركية في المسلسل التركي العشق الممنوع ░▒▓█

طبعا ماخذة ريلها عن اقتناع وهو يحبها وايد وعلاقتهم وايد حلوة , ما أدري الي استوى من بينهم عين ولا حسد ولا شو بس خليني أقول ان صدج ريلها تخبل .

هو ما يرمس بنات ومحترم ومن ارياييل ال ما يظهرون الا ويا حريمهم وما عنده سوالف قهاوي واشياء غامضة وتلفونه يتم مرمي في الصالة .

من بدى المسلسل التركي العشق الممنوع وهو قبل العرض بنص ساعة متربع جدام التلفزيون , ويشوفه على قناتين ويرد يحطي الحلقات ويشوفها على الانترنت

بدت تحس اهتمامه في تركيا و اللغة التركية …. الخ ,, بالصدفة مرة بغت تدش النت وتشوف شغلة

ولاب توبها كان في بيت اهلها ناستنه , وهو حسب ما قالتلي راقد او كان برع , كان ناسي اللاب مبطل

بس مسويله ستاند باي او سليب ومن هني بدت السالفة ..

طبعا مسوي فولدرات واحد حق البلد تركيا والثاني منزل فايلات تعليم اللغة التركية

ومسوي فولدر حق مسلسل العشق لممنوع وفولدر حق الممثلة التركية , غير ان شافت مطرش ايميلات

حق تلفزيون في تركيا له علاقة بانتاج المسلسل وطالب عنوان الممثلة سمر ومعلومات عنها وهم رادين

عليه ومطرش كذا ايميل , طبعا هي قالت يمكن معجب بس وما رح تتطور السالفة .

سافر ويا ربعه تركيا وبدت تحس ان مهووس بالمسلسل ولما تعلق على الممثلة يعصب ويزعل منها

وتغيرت وايد تصرفاته وبدت تشك فيه , قامت تشك اكثر لما يخش التلفون واللاب توب مع انها والله مول

ما حسسته انها شاكة بشي , وقامت تشيك من وراه وتشوف التلفون تلاقي ارقام تركيا .

هني ما قدرت تستحمل هالسخافات وموب مصدقة وقالت ما بتكبر السالفة وباجر بيعقل نزوة وبتروح .

طبعا تجادلوا مرة وهي تمت تقول عن الممثلة

انها خاينة وانها غلطانة وكيف تخون زوجها ومن هالكلام , عصب عليها وقام يصارخ

ولما واجهته قالها ان يحبها وهي استوت صديقته ولما كان في تركيا زارها .

وبالصدفة لقت في غرفة المكتبة الي في بيتهم في درجه , فاتورة شاري طقم ذهب فوق 30 الف درهم

تخيلوا شو ؟؟؟؟؟؟؟؟؟؟؟؟؟؟؟؟؟؟ مطرش هدية طقم الذهب حق الممثلة

هي مسكينة تتحسب ان الطقعم هدية حقها وهو خاشنه , يبى يسويلها مفاجاة

بس طلعت المفاجاة شي ما تتوقعه أبدا , طبعا عقب هالسالفة كبرت المشكلة أكثر واكثر

ووصلت لين الأهل , وهي زعلت وسارت بيت اهلها وتصالحوا .

ووعدها ان ما بيكرر هالشي وخلاص ما بيشوف هالمسلسل , وعقب ما ردت ما تغير شي وما وفى بشي من

بالوعود وقام يعايرها ويقلها انها اجمل منج وواضعف منج وربيعتي وزنها 60 يعني موب متينة

وقالتله بتسوي رياضة واشتركت في جيم عسب تضعف وتصير نفس جسمها , لدرجة انها قامت تقلدها

في اللبس علشان ترضي ريلها , وقام يضغط عليها ويقولها هي وايد حلوة ومغرية واباج تسوين مثلها

هي انقهرت منه خلاص ما قامت تستحمل , انجلبت حياتهم وطول اليوم ما عندهم سالفة غير سمر وسمر

خلاص وصلت حدها وما تروم تتحمل اكثر عن جذي وشافت صوره معها وحرقتهم وشقت كل صورها .

شو كانت النتيجة : ما صدق ان حرمته اونه تجرأت وسوت هالشي وقالها ما اقدر استحملج في حياتي

انتي كسرتي شي حلو كان بينا وطلقها ………..

الحين هي قاعدة في بيت اهلها .. محتارة شو تسوي مجروحة ومكسورة وموب قادرة تصدق تضحك من الهم وتقول بسبة ممثلة طلقها وبسبة مسلسل يعني شي موب حقيقي .

ما عني شي ثاني اضيفه … ما تبغي تشتت عيالها ويعيشون بدون أب .. وبنفس الوقت اهلها يضغطون عليها وحطو اللوم على الحرمة كالعادة …وثاني شي اهل ريلها يبونها ترد حق ريلها وتنسى . وهو قال حق اهلها ما يبغي العيال ويا امهم .. بياخذهم عنها واهلها يقولون لها ان المشكلة وايد سخيفة وانتي اكيد غلطتي عليه

هي ما تدري اذا يبيها او لأ .. وهي انجرحت وانكسرت . وما تبغيه وبيدخلون في دوامة المحاكم , صلت واستخارت بس النار الي عايشة فيها تاكلها