والله اني تعبت من كثر ما فصل عبايا ساده للدوام …
من ثالث او رابع كويه تبدا تخترب وتطلع عالأطراف وين الخياطه وعند الحلج علامات الكوي … نفس اللمعة ويطلع شكلها كأنها مجحوووته سنيييين وهي ما طاف عليها أسبوع و نوع القطعه دايما أفصل أعتقد يسمونها صالونه رقم 1 … خفيفه و طايحه زينه عاللبس
جربت ما خليت محل ما فصلت عنده : موزان حناين خنجي المتحجبه … كله نفس الشي
بليييز بنات انصحوني … شو اسوي أغير نوعية القطعه ؟ ولا أجرب محل غير ؟؟
شو رايكن انتن وهل تعانن نفس المشكلة ؟؟؟
؟؟؟؟؟؟؟
بس هب معقوله من ثالث لبسه تطلع فيها هالمشاكل
نصيحتي لج أنج تقولين للخدامه تكوي العباه وهي مجلوبه يعني الكوي من داخل
مادري فهمتي عليه ولا ،، وتخف عالحراره عشان ما تستوي لمعه فالعباه
وأحسن الرقع للعبي الساده انا جربت كذا نوع واكثر شي عيبني اللي في محل ( بلاك آند وايت)
لأنه قعطت عباتهم ما يبالها كوي وماتتقــرفط حتى لو يلستي ^_^
محل بلاك آند وايت وين هذا؟
امم هالمحل بتلقينه في مركز الجيمي فالعين وفيه واحد فالسوق ماعرف مكانه بالضبط
وله عدة أفرع فالبـلاد انتي طلبي رقمهم من البداله وسأليهم اذا عندهم فرع فالمنطقه اللي انتي فيها