شغالتي والحاله النفسية اللي وصلتني لها .

السلام عليكم ورحمة الله وبركاته …. شحالكم ياخواتي ان شاء الله اتكونون بخير …..ومبروك عليكم الشهر
أنا الصراحه وااايد متضايقه واباكم اتشورون علي لاني تعبت من التفكير … السالفه ومافيها أني من 7 شهور تقريبا وانا توني في الاربعين ريلي يابلي خدامه …. هيه اكبر عني بعشر سنوات …. كانت مشتغله في السعودية والكويت كل دولة مشتغله فيها اربع سنوات انا عسب جيه يبتها قلت اكيد ماطولت عندهم الا وهيه زينه ….
الله يسلمك اول كم شهر كانت زينه وانا ماشفت منها شي غير انها وااااااايد تسال عن حوا وعروقها يعني لو ييت اطلع حتى لو انا واصله السيارة بتركض تسالني وين بتسيرين ويا منو ومتى بتردين ومن هالاسئلة كانها ولية امري …. اسحملتها بس مصختها ع الطالعه والداخله اتسويلي تحقيق … ولا بعد وصل التحقيق حق ريلي وين بتسيرون فلان وينه ليش ما يه وفلان بيي وااايد تسال حتى أمي قالت شغالتج وااااايد تسال وانا هالموضوع ينرفزني … أنا عن نفسي اتضايق بس ما رمستها بس ريلي مره هزبها ع الاسئلة اللي مالها خص فيها ….
المشكله الثانيه اني ساكنه بيت اهل ريلي وكانت عندهم شغاله وحده وهيه في البداية ماكانت تشتغل وياها بس راقده وتتريا الاوامر مني انا ماعندي مانع تشتغل وهيه اتقول انا اساعد بس شغالة اهل ريلي اتقول ما اتساعدني المهم ريلي رمسها وقالت اوكيه بشتغل وياها بعد اسبوع من السالفه قالت والله زيدني 100 على راتبي لاني اساعد شغالة اهلك قلت له حرام زيدها وزدناها الحينياتهم شغالة ثانيه وهيه صارت الحبيبه اطنشني وتتيلس وياهم في الغرفه سوالف وضحك … اهل ريلي سافروا من شهر واهلي بعد المهم انا تميت روحي في البيت لانه ريلي ايداوم في بوظبي وما رضى اقعد في البيت روحي قالي سيري ارقدي طول الاسبوع بيت بنت خالتي لانها الوحيده اللي تامه والباجيين مسافرين يوم ايي الليل واقول حق شغالتي قومي بنسير اتقولي سيري انا بتم هنيه … واسير انا بدونها … خبرت ريلي عن السالفه كلمها وقالها وين ما اتسير مدام سيري وياها قامت اتسير وياي بيت بنت خالتي بس الصبح الحبيبه بروحها اترد البيت بدون شور ولا مشاور واتيني الظهر اتقولي تراني سرت البيت اغسل الملابس ملابس شو والبيت مافيه حد …. انا قمت اشك لانه بيت اهل ريلي الهنود كلهم اييون الصبح المزارع والدريول ودريول المزرعه كلهم ايون والحبيبه شغالتي اتم تحرقصه الصبح لازم اتروح البيت بالطيب بالقو لازم اتروح ….
ويوم رمست ريلي بالسالفه بعد رمسها قامت ما اتسير الصبح بس يوم اقوم من النوم تيلس اتحن فوق راسي متى بنروح البيت ومتى بنروح … حتى لو ركبتها السياره ويانا انا وريلي نبا انسير بيت يدتي بتسال نحن وين سايرين ومتى بنرد ومنو هناك … فضييييعه اتنرفز ….
وامس صارت سالفه ريلي خذ اجازه اسبوع وقالت بوديكم دبي انا وهو وبنتي بعد الغدا قلت لها حطي اغراض بنتي في الشنطه قالت ليش مدام وين بتسيرون قلت لها دبي شقت الحلج من الاذن للاذن وقالت صدق انتوا بترقدون هناك قلت لها لا قالت هيه في تاخير قلت لها لا …. وتمت تستفسر عن سيرتنا …
ريلي شك المهم رحنا المول واتمشينا يوم رجعنا استغربنا انهم امسكرين كل بيبان البيت يعني ما نقدر ندخل الا لو دقينا هرن واصلا غريبه هالحركه لانه بيت اهل ريلي بابهم مايتسكر لين اخر الليل المهم قلت حق ريلي نط من اليدار وسير شوفهم شو يسوون يوم نط ايقولي شفتهم متفيزرات في الصاله وحاطين افلام ومترقدات …. اوكيه مب مشكله بس ليش شغل الحراميه … وع طاري التلفزيون قبل لو نامت بنتي اوديها الغرفه فوق واخلي الشغاله تيلس عندها لين اخلص العشا واقولها عادي شغلي التلفزيون لين ما انا ايي …. بس كذا مره انا اكون تحت ويا بنتي وادور الشغاله ما احصلها اتعرفون اتدش غرفتي واتشغل التلفزيون والليتات والمكيف وتيلس الحبيبه بدون استئذان … عادي انا طنشتها بس مصختها يعني يوم اتنظف الغرفه حتى تيلس اتطالع ….
وغير جيه قبل يوم اهل البيت كلهم موجودين لو طلعت ويا ريلي وخليتها عندها تيلس ترتز في الصاله ماتفارق بنتي بس الحين يوم اخليها عندها لاني اتدرب ومحد في البيت ارد اشوفها هيه متسدحه في الغرفه وبنتي في الصاله روحها اتعابل الوايرات بس يوم تسمع حسي تيي تركض اتقولي مدام انتي يجي ….
انزين وسالفه ثانيه انها وااايد تسال عن الاولاد الشباب اخوي ولا حمي وااايد تسال ليش فلان ما يه وفلان متى بيرجع … ومن يومين اتسوي حركه تقهرني تتسدح في الغرفه بدون حجاب واتطلع راسها من الباب يعني اي حد بيروح تحت ولافوق ولا وين مابيروح بيشوفها يعني قلة ادب وتتفصخ وتتلبس والباب مفتوح امسات دخلت عليها وهيه بستيانها بس … وبنت خالتي الصغيره امس دشت عليها بدون شي يعني وقاحه …
وامس خليت بنتي عندها ورحت فوق احط اغراض ريليبيروح بوظبي وقلت لها شوفيها والله اني نزلت بعد ساعه شفت بنتي روحها بالصاله لو ما حمي كان عندها يالس اعدل سفرته خذتها وطلعت اتعرفون شغالتي الست هانم متى يت اطالع بنتياذا هيه في الصالة ولا لا الساعه 11 بالليل دقت تسال … واليوم انا ناشه الصبحبسير الدوام حضرتها راقده لين الساعه 12 الظهر انا خليت بنت خالتي عند بنتي فوق في الغرفه وقلت لها لو صاحت ازقري الشغاله الساعه 12 اتصل حق الشغاله اترد علي وهيه راقده واتقول والله بنتج فوق ما ادري ليش انتي وين مدام كان خاطري اصرخ عليها والله …
ومن اول ما يت وانا اوقات اطرش لها رصيد لانها شغالتي الحين شغالتي اتجمع طلبيات الشغالات كلهم اللي يبون رصيد واتقولي فلانه تبا رصيد وعلانه تبا رصيد …..هيه مرات اتييب بيزات اتقولي طرشيلي وانا اطرش وما اخذ منها الحين اتقولي طرشي حق الشغالات …ولو خذت لها شي اتقولي فلانه تبا نفس الشي انا مب مسؤولة عن كل الشغالات اوكيه انا اييب لهم بس اعتبره صدقه بس ما احب حد يستغلني …
وغير انها فضوليه يعني لو انا راده البيت ويبت اكياس لازم بطالع اللي فيها …
ريلي اليوم ايقولي بسفرها وانا اول شي من العصبيه وافقته بس بعدين قلت حرام اقطع رزقها …انا من النوع اللي ما اصارخ ولا شي وهيه من هزاب ريلي ما اتييبها الرمسه بعدها تتقش وتسال عن احوال الفريج ….
قولولي شو اسوي اسفرها ولا اخليها هيه تطبخ وشغلها نظيف بس هذي عيبها كرهتني فيها …

حبيبتي خل عنج الطيبة و سفريها شو تبين فيها احسها ماصخة وايد تسأل عن الشباب هي شلها حق شو تسأل .. الاحسن انج تسفرينها لا تفكرين فرزقها و حالة لو هي تبا تشتغل ما بتسوي جي الصراحة وايد ماخذة راحتها و انتي معطتنها ويه والله من القهر مب عارفة شو اقول انا مع ريلج سفريها ..

و ربي يحفظج و يحفظ لج ريلج و بنتج يا الغالية ..

فمآإن الله ..~

والله يعينج ويرزقج انسانـة تخاف ربها

اللهم أعنا على ذكرك وشكرك وطاعتك وحسن عبادتك ..

اللهّم آمين .

سفريهاا وافتكي نهااااا

شكلهاا ماا منهاا فاايدة

لو كان شغلها ماعليه كلام ويوم اطلب منها شي تسويه ماعليه بتحمل بعض العيوب

لكن انها ترقد لين وقت متاخر ,, واذا خليتي بنتج عندها تودرها وتسير عنها وهذي ياهل اي شي يمكن يستويبها بدون مراقبه ,, وغير جي فضوليه ,,

حبيبتي لاتعورين قلبج وديها المكتب ,, اذا ماتبين تسفرينها رديها المكتب ويمكن تلقى ناس ثانيين تشتغل عندهم وانتي يبيلج وحده ثانيه ,, بس من البدايه علمي البشكاره حدودها ,, ولاتعطينها وايد ويه ,, واذا سوت شغلها اوكي كافئيها برصيد او اي شي هديه ,, لكن انها ماتشتغل وتكافئينها مايوز انتي جي تشجعينها ع الغلط

المهم انا رايي تودينها المكتب ,, وييبي غيرها بس من البدايه سوي حدود للخدامه وعلميها انها ماتسوي شي بدون شورج ,