ولدي عمره 3 سنوات.. من يبت اخته من 6 شهور
كله يحب يضرب ويإذي وصاير عدواني وايد ويحب التملك
شو الحل ؟
ممكن رقم دكتور استشاري نفسي مال اطفال ………؟
كل ما في الموضوع انه رد فعله طبيعي جدا كأي طفل يغار !!
بايدج تقدرين تغيرين شعوره من العدوانيه للحنية .. اقعدي وياه كلميه واحضنيه وبوسيله ..
كوني حنونه وياه واايد و حاولي تقربين بينه وبين أخته و تعلمينه كيف يساعدج و يهتم في أخته لو في أشياء بسيطه وعاديه ترى أكيد لها تأثير في نفسه وبيحس انه كبير ..
مثلا يوم بتسبحينها قوليله هات لي الصابون مالها أو ييب لي الفوطه وخليها بمكان يشوفه ..
خليه يساعدج و بنفس الوقت لا تتحسينه انج تحبين اخته اكثر منه … اهتمي فيه أكثر ..
اقعدي وياااه كثر ما تقدرين العبي وياه و علميه كيف يلاعب اخته ويضحكها عسب يستانس ..
اقعدي وياه حفظيه قرآن الآيات القصيره والفاتحه مثلا لها تأثير كبييييير في نفس الياهل عن تجربه ..
و طوووووووووووووووولي بالج عليه ولا تنسين الهدايا لها تأثير في نفسه قوليله مثلا اذا يلست شاطر ومؤدب وما شفتك تضرب حد اليوم بعطيك هديه وخلي الهديه جدام عينه في مكان مرتفع عسب يشوفها ويتحمس☺
و بعدين لا تشيلين هم الشطانه ترى أغلب اليهال تييهم فترات يضاربون ويكونوا عدوانيين بسبب التغييرات اللي حواليهم وهالشي طبيعي فحاولي تعالجين الأساس .. حتى ولدي من دش الروضه صابته هالحاله ولعوزني بس حاولت اني أرخي وااايد وياه و أحنن قلبي عليه أكثر و الحمدالله احين الكل يشكر فيه الله يحفظه يا رب ويبارك فيه ..
ولا تنسين الرقيه الشرعيه لها تأثير كبيييييير .. تعلمي يووووووووووميا ترقين عيالج صبح و ليل مرتين باليوم والله يحفظهم ويبارك فيهم ويسعدج يا رب ..