اليوم بعرض لكم مجموعة صور عن نــيوزلاندا ارض الطبيعة الخلابة والساحرة وارض المغامرات .. رغم سفري لوايد من الدول إلا ان نيوزلاند حبيتها وايد وايد يمكن لأنها بلد الانقى جو ف العالم او يمكن انها بلد الراحة والريلاكس .. شعبها رائع رائع وخدووم بشكل واللغة الانجليزية هي الاساسية بالاضافة إلى لغة السكان الاصلييين اللي يسمونهم المواري .. بعرض لكم تفاصيل السفرة كلها ف اجزاء ويارب اتعيشون الجو مثل ماانا عشته ..
بس بقولكم بنات ترى البلد مب بلد تسوق وشوبنق حسيتها اكثر لتغيير جو مع ريلاكس وراحة ..ويالله عاد عن المخاسير لاحقين عالاسواق … نيوزلاند مشهورة بالكيوي ولما يقولون لج كيوي مايقصوون فيها الفاكهه
يقصدون فيها طائر الكيوي اللي يعيش فيها وهذي صورته ..
اول شي نزلنا اوكلاند وبتنا فيها ليلتين وكنا حاجزين في فندق اسمه skycity ماكان لين هناك بس موقعه حلو واستراتيجي ولاصق فيه التاور المشهور في اوكلاند اللي اسمه بعد skycity موجود فيه مطعم بوفيه اذا بتروحونه لازم تحجزون قبلها .. وهذي صور لاوكلاند وصورة البرج سكاي سيتي ..
وهنيه حجزنا لشبه جزيرة اسمها ديفن بود ورحناها عن طريق البحر وهاي صورتها .. الجزيرة حلوة ووايد استانسنا فيها وبعدين رجعنا اوكلاند
نحن كنا مأجرين سيارة ونافقيشن بس الصراحة مااستخدمناه لأن الشوارع سهلة واللافتات في كل مكان ووصلوها لنا لين الفندق .. كنا بنسير مدينة روتوروا تقريبا 3 ساعات من اوكلاند لي روتوروا وبنقعد فيها 4 ليالي والله يابنات من روعة الجو مااتحسين بالساعات إلا وصلنا ..وطول الدرب تشوفون هالمناظر والمراعي اللي ترعى واللون الاخضر المكتسح ..
كنا حاجزين في فندق اسمه the views وكان اسم على مسمى هو عبارة عن بيت فيه حرمة عيوز وبنتها اللي يخدمون والخدمه كلها خدمة فنادق وشغل عدل ومكانه فوق اليبل شوفو الصور واحكمو عليه
صورته البيت اللي سكنا فيه فوق اليبل .
هذي اليلسه اللي كنا نيلس فيها انا وريلي وتطل عالبحيرة والمراعي .
شوفو الخرفان وهي ترعى ..اليلسة كانت اتطل عليهم
شورايكم في الفندق او البيت روعة لأن كان فيه خصوصية ومحد غيرنا والله بنات حسيت اني هايدي وريلي بيتر وايد كنت عايشه اجواء رووعة وان شاء الله بنزل لكم صور اكثر عن المناطق اللي رحناها في روتورو وا…
واحينه بروايكم الاماكن السياحية اللي رحناها وروتوروا فيها وايد اماكن حلوة وسياحية والسيتي سنتر مالها يجنن صغير وحلو .. انا موحافظة اسامي بعض الاماكن لأن بصراحة اغلبها مسميات ترجع للغة المواري وهم السكان الاصليين للنيوزلاند وشوي صعبه ف النطق وفي منها اسامي بالانجليزي ..
هذا المتحف وااايد حلو ان عن نفسي احب زيارة المتاحف واستمتع فيها وايد واحب اشوف واتعرف على حضارات الشعوب الاخرى موكبير وايد بس وايد ممتع ,,
المهم رحنا هالمكان وفيه يعرضون لج حضارة الشعب الاصلي لسكان نيوزلاند وهم المواري حلو المكان واستمتعنا وكلنا ذره كانو طابخينها بالطريقة البدائية المواري تقريبا هم نفس الهنود الحمر من طريقة لبسهم وتصرفاتهم .. هاي الصور
وهالمكان اسمه شيب شو عرض للحيوانات والخرفان والكلاب والبقر حلو اليهال بيكيفوون عليه اكثر من الكبار وبعد مايخلص العرض تركبون قطارات مفتوحه اتوريكم المزرعة كلها اسمها فارم شو وتنزلون منها بعدها اتأكلون الحيوانات وتشوفون الخرفان والبقر والعزلان بس انا كنت ميته من الخوف ريلي كيف واستانس وقعد يأكل الحيوانات بس كان الجو روعة والحيوانات ترى مهدووده بس ماتتحرش في حد .. حتى حيواناتهم مؤدبة
احينه بتشوفون صور الطبيعة تحت الارض وهي عبارة عن براكين وطين والدخان اللي يطلع من تحت الارض في مكااان مفتووح وسبحان الله اتشووفون فهالمكان ابداع الخالق وقدرته وطبعا كل شي من صنع الخالق مافي اي اضافات صناعية … قولو سبحان الله
شوفي الطين كيف يغلي من تحت الارض .. سبحااان الله على فكرة نيوزلاند طلعت مشهوره بالطين والعسل ونوع من العسل اسمه مونوكا هوني وهو يستخدم للعلاج ولعلاج الاصابات او قرصات الحشرات وهو ان اتحطين اشوي منه عالجرح ..
وهذا المكان في هالصور اسمه قايزر .. ويبعد عن مكان الصور اللي فوق تقريبا اقل من ربع ساعة .وهذا هوالعرض … وصار معلم سياحي لأن له قصه حقيقيةوله وقت معين في انفجار البير ..
صورته بعد الانفجار ..
صور للباخرة من داخل ..تشتغل بالفحم وايد قديمة مال سنة 1914 تقريبا مب مذكره علدل.
انا سرت اوكلاند بس 5 أيام وكانت من اروع ايام حياتي
تمنينا لوكنا ممددين اكثر لأنه صدق طبيعتها رووووووووووعه
سرنا عالم الأحياء المائيه واوكلاند ميوزيم
وكنا ساكنين في نفس فندقكم وصدقج ماكان عدل بس موقعه رووعه وقريب من مركز المدينه
تمنينا نسير التور إلي يودونج فيه لمناطق تصوير فيلم "lord of the rings"
بس ماسرنا للأسف
اتمنى انج تكونين سايره وموثقه الحدث
والله يعطيج العافيه ^_^
وبعد ماخلصنا من كوينس تاون وعقدنا فيها 4 ليالي طرنا لمدينة كرايس جارج مدينة حلوة وصغيرة ويلسنا فيها ليلة وحده بس وزرنا فيها بعض المتاحف ورحنا عالسيتي سنتر مالهم وسكنا في فندق وااايد حلو عبارة عن فلل وتطل ع بحيرة البط وكان دورين ..وفيها مطبخ وملعب .للجولف …
وتم بحمد الله من نيوزلاند اللي صدق اتحفتنا بالطبيعة الخلاابة وغيرت نفسيتنا ومعروف عنها ان جوهاانقى جو في العالم .. ولاتفوتكم بالنسبة لأنسب وقت لزيارتها هو شهر من 12 إلى 4 لأن الجو يكون حلو ورائع وماتنفع تزورونها في الصيف لأن يكون عندهم شتا والبرد يكون قارص ومابتستمتعون ..
مشكوره على هالتقرير الفنتك