هالسالفة مب لي
انا غير صاحبة القصة
الموهيم على لسانها تقول
زوجي انسان غيور بطريقة مب طبيعية عمري 23 سنة و زوجي 25 سنه
تزوجت ابن عمي و هو ولد بين اربع بنات و انا بنت بين سبع اولاد
ف بطبيعة الحال كنت وايد اروح بيت عمي من كنت صغيرة و تطورت علاقتي ببنت عمي لدرجة صرنا نلبس نفس الشي اقعد ف بيتهم لالايام و هي كذلك و لكن يوم خلصنا من الثانوية بدا ولد عمي يسوي حركات و يلمح و انا صديته طبعا و بنت عمي بعد ما رضا لها الغلط
و يوم شافني صاده عنه كلم عمي و صارت الخطبة و كنت معارضة بشده بسبب اخواني وايد يتطنزون عليه لانه ما طلع له شنب بسرعة و صوته صوت ياهل لين خلص الثانوية لعلمكم حتى واحد من اخواني نفس الشي يعني هالشي منتشر ف شباب عايلتنا
طبعا انا رفضت ف البداية لانه وايد يتمصخرون عليه اخواني لين تميت اصيح و عقبها يوم صار كل شي رسمي سكتو عنه
و تم مصر عليي و مرت عمي بعد و صارت الخطبة و الملجة و العرس خلال 3 شهور
و بدت غيرته اللي مش طبيعية
يقول لي انا اخاف عليج من اخوانج
نحن ف بيتنا عادي نسلم ع بعض انا و اخواني يعني بوسه ع اليمين و ع الشمال مثل كل الناس
الاحضان عندنا ف البيت عادي
لانه امي تربوية و ابوي بعد و دوم يقولون الحضن مهم للكبير قبل الصغير ف عادي
بس الحمد لله ما عندنا سوالف و خرابيط و متفوقين و مؤدبين و الكل يشهد لنا
و لانه ابن عمي ف يعرف و يلاحظ خاصة يوم نكون ف بيت جدي
يقول لي تخبلت عليج يوم شفت اخوانج يحضنونج يوم العيد فديتهم كانو مداومين اثنين من اخواني كانو مداومين تقريبا 15 رمضان لين يوم العيد الصبح يعني ما شفتهم الا ف بيت جدي الضحى يعلني فداهم
و يوم عرسي اخوي اللي اصغر مني بسنه طاحت دمعته يقول لي من اللي بيواسيني و يساندني ف دراستي و حياتي و حضنني اكثر واحد من اخواني قريب مني كأننا توأم
اشتد الحوار بيننا ف ثاني شهر من العرس
كنا راجعين من شهر العسل و بنفس السوم اخواني الكبار مسافرين دورة
ف قعدت اصيح متولهه عليهم و كنت اكلمهم ف الدرب
ف ريلي عصب و قال ليش تصيحين عليهم اقول له اخواني ما شفتهم صار لي شهر و اللحين هم عندهم دورة 3شهور يعني مابشوفهم
عصب قال لي ما بيطيرون لا تخافي و المهم و عدت السالفة ع خير و مرت الثلاث شهور و رجعو اخواني بالسلامة
طبعا نحن الله لا يغير علينا ف بيت ابوي نحب نحتفل لانه ما عندنا عيد ميلاد و خرابيط ف دايما نتريا المناسبات علشان نسوي بارتي
ف مسوين بارتي و ابوي الله يحفظه مسوي لهم مفاجئة لانه اول مرة يغيبون هم الاثنين هالفترة كلها
امي كانت لابسه و كاشخة فقالت لي اللبسي اللبس الفلاني لانه بنطقم كلنا نفس اللون مع ثيم البارتي
يعني لبس عادي بس مخصر شوي يقول لي ما تلبسين هذا ملفت و فاتن و مدري شو
بخبركم شي بيت عمي عكس بيتنا تماما
هم وايد رسميين و وايد مشاكل بين عمي و مرته و اكثر المشاكل بسبب ولد عمي لانه كان دلوع و تصرفاته شكرا وايد دلوع ماماته
بس اخر شي عمي دخله الجيش الحمد لله الحمد لله اصطلب و صار ريال بمعنى الكلمة الحمد لله
لكن بيتهم كئيب بعض الشي بس والله حبوبين
و عمي تزوج حرمة ثانية من اهل جدتي ف زادت الفجوة بينه و بين زوجته الاولى
بنات عمي عسل والله عسل شوية عليهم يحطوني ف عينهم و انا مب راضية اطلع من بيتهم بسبة طيبة قلبهم والله
بس مرت عمي تغار مني تقول خذتي ولدي مني
لانه وايد متعلق ف امه وايد وايد لدرجة كان ينام عندها تخيلو عندها بنات بس هو ينام عندها يوم تمرض
حتى لو عمي موجود ما تطلب منه شي كله تطلب من ريلي والله عادي عندي هذي امه
لكن يوم تزوجنا بدت علاقته بامه تخف و صار ما يبات عندها و يدلعني
هو يحبني بس وايد يغار
يعني عادي يبوسني قدام امه و يحط اللقمة ف فمي
انا اقول له لا تسوي هالحركات قدام عمتي يقعد يضحك يقول انتي حلالي
هي ماخذه مني موقف منزمان قبل اتزوج لانه بن عمي غلط عليي و اتهمني فانا رديت عليه و شتمته
و منها و مرت علمي تقول لريلي كيف تحبها و هي شتمتك قدام الكل
حاطتني ف بالها الله يهديها
نرجع لموضوع الغيرة
ما يخليني اقعد ف بيت اهلي غير ساعتين و يتصل فيني عشرين مرة
ف البداية كنت استانس انه ما يستغنى عني بس عقب صار الموضوع مزعج
ماشي شي اسمه صديقاتي مع انه عندي شلة صديقات والله حبوبات و مؤدبات و بنت عمي من ضمن هالشلة لكنه ما يبغي علاقتي فيهن تستمر
انه ما فيهن ادب لانه شاف هداياهن لي
انا غلطت يوم فتحت الهدايا قدامه
لانه كم وحدة متزوجة ف هداياهم كانت قمصان نوم و رومنسيات ف هو تخبل يقول هذيلا قليلات ادب
ممنوع اروح عرس حد من ربيعاتي
ممنوع عزايم ربيعاتي
ممنوع اروح معاهن شوبنق حتى لو اخته معانا
و اذا عرس حد من الاهل يقول لي لا تكشخين
بذمتكم يعني معقولة عرس بنت عمتي و اروح بعبايتي و خاصة بنت عمتي ما قصرت ف عرسي لبست و كشخت فستان و تسريحة
و صاير وايد يشك
ممنوع اطلع مع اخواني قلت ما عليه
بس يوم اروح بيت ابوي مرتين ف الاسبوع بطلوع الروح
يقعد يسوي لي تحقيق شو قال لج اخوج؟ شو لبستي؟ وين كنتي قاعدة؟ و هم كيف قعدو ؟
3 مرات يكون عندنا عرس و اكون راجعة من الصالون اغير لبسي و يسوي لي مشكله علشان ما اروح العرس
فعلا اقعد اصيح و ما اروح اقول ما بزعل زوجي علشان عرس فلان و علان
يصدمني ف كل مرة يقول لانه خاطري فيج ما اخليج تروحين العرس
و اخر مرة عاد انحرجت لانه ف كل مرة اكون مع البنات ف الصالون و اخر لحظة ما روح ف يفهمون السالفة والله انحرج
يسالوني هاه ليش ما حضرتي و يضحكون فاهمين السالفة
ف زعلت و كبرت السالفة و ضربني والله اني ما اقر معاه ف شي و هو يعترف يقول لانا اسعد انسان
بس غيرته و منعي من الخروج هم المشكلة
يعني عادي اسبوع او 10 ايام ما اشوف انسان غير حمياتي
طبعا يوم ضربني كبرت السالفة و رحت بيت ابوي و اخواني ما قصرو فيه و قعدت ف بيت اهلي مدة عقب تأسف و خذني و عشنا احلى ايام
دام ماشي طاري طلعة و لا عزايم يعني ماشي ضرابه
يوم نروح بيت يدي يقول لي لا تعقين العباه
نحن نقعد من الضحى لين صلاة العشا معقولة اتم ف العباه
هذا بعض من حياتي افضفض لكم
اشكر اختي التفاؤل طبعي سلفتني النك نيم
الله يهديلج اياه
و اللي مخفف الموضوع انه راح دورة 3 شهور و عشت فيهن احلى ايامي بلا نكد و لا هم
انتو متخيلين كيف يعني ممنوع اقعد مع اخواني
يقول لي سلمي عليهم بالايد بس
و عندي خالي بعد سوالف و ضحك و ريلي يقول لي خالج هذا لازم تقطعين علاقتج فيه
و خالي خبيل وايد يستفزه هو اخر واحد من اخوالي اكبر مني باربع سنين
خالي حبوب وايد و سوالف دوم يهلكنا من الضحك والله يهلكنا من الضحك و انا و اخواني متعلقين فيه لانه كان يسكن عندنا اخر 3 سنوات قبل اتزوج ولد عمي
و دوم نسوي مغامرات انا و خالي و اخواني نروح الالعاب ف القرية العالمية نروح مطاعم و سوالف حلوة بس اللحين يا ويلي والله ما اتجرأ و خالي يقعد يستفزه
اللي يخليه يعصب انه اخواني وايد يدلعوني بس بحدود و انا وايد وياهم خاصة اخوي اللي اصغر مني بسنه و خالي
لانه ماعندي خوات ف علاقتي فيهم قوية و نفضفض لبعض
يعني حدود بس هو يشوف انه هالشي غلط
يعني اخواني يوم يروحون السوق و يحصلون شي حلو اييبون لي
والله احيانا تكون كوب و مج و فلاش واشياء عادية اللي يطلع هدية مع الوجبات و ف معارض التوظيف
يعني شي عادي
قلت له انت تعرف علاقتي باخواني كيف كانت ليش خذتني
يسكت ما يرد
بس تعبت
غيرته مب طبيعيه زودها الله يهديه بسم الله
قوليله حبيبتي اقنعيه قوليه هذول خواني احبهم وانته بعد احبك انته ريلي وتاج راسي ونصفي الثاني
فليش تسوي جي حاولي معاه
الله يعينج والله انا بروحي ماعرف شنو ارد
حبوبة انتي لا تعانديه يوم بيقولج شي قوليله ان شاءالله ومن عيوني ..اذا انتي بتعاندي وهو بيعاند السالفة راح تكبر ..فانتي كوني الكبيرة وحاولي تكسبيه بالكلمة الطيبة .هو الحين عنده حب التملك وغيرة من أي حد يمسكج لانه يجوفج حلاله ويغار لانكم يداد صدقيني بمرور السنوات بتخف الغيرة ..بس انتي حاولي تمسكي عمرج ولا تراددينه بالكلام ..وانتي يوم بتسلمي ع خوانج أكيد مايكون موجود فسلمي عليهم براحتج ..
انا اقول احسن تفهمينه انه هو غلاته غير عن كل البشر ،
ومب معناته لو رابعتي فلانة او حضنتي اخوج يعني تنقصين من قدره
قوليله حبيبي انته غيييير العالم ف صوب وانته ف كفة بروحك < دلعيه خليه شوي ينتفخ
بس عاد خل يخف عنج شوية ويفهم انه بهالطريقة يالس يغثج
بس انا صرت اخفف من هالامور .. وهو بعد بدا شوي شوي يستوعب انهم اخواني