خلاص قررت واتخذت قراري لمواجهة الخيانة الزوجية

السلام عليكم يااعضاء ويامشرفات
كيف حالكم عساكم الا بخير وعافية

عندي لكم موضوع جدا مهم وهواني خلاص قررت كيف اواجه خيانة الزوج والاعيبه في البلاك بيري والواتس اب والانستقرام

الصراحة يوم كنت جدا مهمومة وكنت أصلي وانا اصيح وانا يالسه افكر تفكير عميق جدا جدا قلت فبالي لا التفكير ينفع ولا الشك ولاالوسواس فقررت
اول شي لو شفت ريلي ماسك الموبايل وقاعد يتكلم ويستغفلني ويتحراني غبية مافهم دائما بستغفر دائما بردد

استغفر الله العظيم الذي لا اله الا هو الحي القيوم واتوب اليه
ياجبار اجبر بخاطري ان كنت تعلم ان زوجي يتكلم مع بنات فأسألك يارب ان تهديه هداية من عندك يارب وان تسخره لي وتحنن قلبه عليه وتقذف حبي في قلبه كما قذفت حب عائشة في قلب النبي صلى الله عليه وسلم

قررت
احافظ على قراءة القران يوميا وادعي ربي ان الله يهدي زوجي
قررت
ان ادعي بين الآذان والإقامة يوميا بهداية زوجي وان الله يعمي بصيرة كل وحده يكلمها
قررت
اذا هو طلع مع ربعه وكنت بروحي اني اسجد لرب العالمين واصيح بسجودي وادعي لربي من كل قلبي ان الله يفرج همي ويهديه ويهديه

قررت اني اتوكل على الله سبحانه ولا احزن ولا اتشكى لاي انسان في الدنيا واذا تضايقت بصيح لرب العباد فقط
قررت اني افكر بالجنة واجمع حسنات لي للاخرة و بفرح ولا اكتئب عشان انسان محد يستاهل فهالدنيا التعب والارق والتفكير وقلة النوم والبكاء المرير

وبلاخير اقولكم احسنوا الظن بالله لان ربي هو الوحيد القادر على كل شي وترى الزوج مب كل شي انا صح احب زوجي جدا بس مع موضوع الخيانة والتعب النفسي قررت استوي بليده مثل مايستغفلني انا بدوري بلجأ لرب العباد فقط يمكن طيبتي اللي دمرتني بس الطيبة مب عيب العيب من البشر اللي قلوبهم مستوية بنك يحبون اي وحده حتى لو وحده محتشمه هم يركضون وراها انا مابلوم البنات الانسان الملام الاول الزوج

اللهم صلي على محمد وعلى ال محمد كما صليت على ابراهيم وعلى ال ابراهيم

الله يثبتج ع صبرج ويرد ريلج لج مثل اول واحسن
وان شاءالله ما بعد هالحزن غير السعد
موفقه عزيزتي

والنعم بالله، لكن الدعاء ي اختي ما يكفي

اليوم يخونج بالكلام، باجر وين بيوصل بالخيانه !
الحياه الزوجيه تتطلب من الوحده انها تتغاضى عن
تصرفات عشان الاستقرار لكن التغاضي عن الخيانه
وهالامور مصيبه، خاصه اذا وصلت للزنا، عن نفسي
اشوف انه الريال ياخذ الثانيه ولا انه يلف ويدور
ويقع ف الحرام، واجهي ريلج وكلميه شوفيه هل يبا
يستمر ع هالحاله ولا بيعقل وبيجابل بيته ك زوج
مسؤول عن حرمته، اسأليه هل بيرضى ع نفسه اذا
كان ف مكانج ! هل يرضى ع عمره انه حد يخونه !

الزوج مب كل شي لكن الهدايه بيد رب العالمين والعمر
مره ف ليش تعيشين ف صياح وهم وهو مب حاس فيج،
اتخذي خطوه تغير مجرى حياتكم للأحسن + ادعيله بالهدايه
سواء بتدخل من حد من اهلج او تكلمينه مباشره بأسلوب حازم
وتحطين النقاط ع الحروف عشان يفهم انه الموضوع مب عادي
شرات ما يشوفه واذا هو راضي بالحرام ف لا ترضينه ع نفسج
واطنشين الموضوع لانه ما بيأثر الا عليج دامج ساكته وهو بيعيش
حياته . .

الله يهديه ويسخره لج ويرزقكم الذريه الصالحه

انا واجهته 3 مواجهات وحلفلي انه ماعنده اي علاقة واني ماليه عينه ويحبني موت وانا الانسانه اللي يتمناها والحين اجوفه احيانا يوم اي صوبه يغير اتجاه موبايله وهوحس اني شاكه وداىما يراضيني بالكلام الحلو
الله يهديه
مشكورة حبيبتي على الاهتمام

انا احبه كثير هاي مشكلتي

الله يهدي ريلج ويهديج ويهدينا ويصلحنا يارب

ويسعدج ان شاءالله

بشكل عام احس دامنا صرنا بعصر الهواتف وسهولة التواصل مع الجنس الاخر

للاسف الشديد صار طبيعي تلقين الشباب والمتزوجين يكلمون وحده لو شوي يجرب حتى لو بالكتابه

البلاكبيري تويتر واتساب انستغرام الخ صعب علينا نراقبهم ونمنعهم

الحرمه لو راقبت ريلها اسميها بتكتشف بلاوي

فـ الاحسن لنا ننسى او خلينا نقول نحاول نتغاضى اذا الامر فقط كتابي

اما اذا حست صدق الامر يباله وقفه هني تشد عليه وتواجهه