حفل الملجه

السلام عليكم ورحمة الله وبركاته

اليكم تفاصيل ملجتي وان شاء الله يعيبكم الترتيب

الملجه كانت في البيت يوم الجمعه تاريخ 07/09/2019 وهاي احداث اليوم من طأطأ لسلام عليكم

الساعه وحده سرت الصالون وشفت مالت الشعر اول شي راويتها فستاني كنت مصورتنه بالموبايل والاكسسوار مال الشعر واختارت الاستايل على ذوقها وانا عندي ثقه عمياء في ذوقها

سشورت شعري ورحت فوق عسب الميك اب حطولي ماسك اون ماسك العرايس يسوي ريلاكسيشن بعد الماسك حطييييت ايدي ع خدي اتريا العروس لي قبلي تخلص .. حليلها غمضتني مكيجتها وسوت لها الشادو واذا بها فجاه تدمع وعاده مالت الميك اب عيوز وشويه وغده وما تتحمل ردت تحاول تعدلها وتدمع وتعدله وتدمع والغوا والزين خاست برع تتريا دورها خذت يمكن ساعه ونص وبعد طلعت بتسوي وشعرها وبترد جان اقول ما بدهاش يا بت خذي اكشن سريع قلت لها انا حفلتي تبدا سبع والحين اربع ونص وقالوا لي انتي بتظهرين خمس ونص شوفيلي حل قالت دخلي وانسدحت ع الكرسي مالها وبدت تشتغل في ويهي .. خلصت وشفته حلو عيبني يناسب ملجه نزلت تحت ولقيت البنات صفوف طوابير عسب التسريحات قلت يا دي النيله ما بخلص اليوم انا حطيت ايدي ع خدي مره ثانيه ويلست اتريا واتريا واتريا خلصن الهنتين لي قبلي ويا دوري وبدت تشتغل فيني فجاه لقيت الكل يطالع ومركز ويقولي تسريحتج حلوه وايد واكسسوار الشعر وايد حلو وانا يا الله طريت حلجي من الوناسه ابتسامتي من اذني اليمين لاذني اليسار والحلو في اللي كانت تسوي شعر انها كل ما تحط ايدها تسمي وتذكر الله وها الشي واااايد ريح نفسيتي

المهم خلصنا ع الساعه 6 ونص ووصلنا البيت ع الساعه 7 جد الناس وصلوا والرياييل برع وعفسه والعياله وحاله اضطرينا نوقف بعيد عشان ندخل لان الخيمه داخل البيت ساده ما نروم ندخل بالسياره

دخلت وهذا كان شكل اليلسات بعد ما حطوا الورد .. بسيط

طلعت فوق ولبست فستاني

هه وبعديييييين؟

تدخنت ودورت جلوس لاني من محبات الجلوس جدا وراعية الصالون كانت حاطتلي لون مات المهم ظبطت نفسي ويلست اتريا لين يت المصوره وبدت تصور .. عجيبه المصوره تقولي عطيني نظرة انطونيو بانديراس المثيره اونه !! قلت ما اعرف اسوي شراته انا .. تقولي لا اون ***ي لوك !! حركات ها المصوره

شوي ين ربيعاتي ويلست اسولف وياهن وهذربت عليهن لين طار الجلوس وتعشوا الناس ودخلوهم داخل البيت عشان يشوفوني انا (مصدقه عمري ) شليت المسكه واستعديت

كانت بشكل كره قبظتها لولو ونازل منها شي غريب في اخره ورد ازرق ومن النص تحت سلاسل كرستال

قبل لا انزل حسيت بلوعه ودوخه ويركضون يدورون سفن اب وشربي ويلسي وسوي لين تحسنت الاوضاع نزلت وقلبي يرقع لا اله الا الله امه امه مش حريم !! بس الحمد لله كنت حاطه عدسه والرؤيه عندي ظبابيه فما يت عيني في عين حد كنت امشي بدون ما اشوف طبعا منطلقه كصاروخ سكود واضطرت اختي العوده تربع ورايه وتقولي شوي شوي مشيت بس مب حلوه المشيه احس جنه شي معروض ويتفرجون عليه اف وصلت لمكان الذهب ووقفت اتريا بعلي يدخل طبعا طولت واقفه لان الاخ رفض انه يدخل اون وايد حريم داخل واخيرا دخل ووقف بعيد انزين ليش فيني برص !! اون مستحي قالوله اوقف عدالها .. قرب وتم واقف يطالع وسرحان .. هلووووو الاخو لبس الشبكه خلنا بنسير نيلس لسه الليل طويل !! نبهته اخته وبدا يلبسني الشبكه احتاس في العقد ما عرف يسكره قال لاخته انتي كملي وكملت المسكينه لانه سكر العقد غلط ع الجلد

وهاي الدبل

لبسنا الحمد لله وسرنا نيلس وبدات الحشود والافواج تهل وحده تبوس يمين والثانيه تبوس يسار لين ما فجي عورني !!

وهذا كان مكان الشبكه .. طبعا المصوره لين نزلت تحت تصور الورد جد خلاص كانوا الاطفال الدباديب الشياطين المتنكره في صورة يهال قاضين ع الورد .. الظاهر كانوا فاميلي سايز وايدهم طويله زياده عن اللزوم .. لكن ما عليه براويهم في العر بربطهم بسلاسل واغلال

وهاي سلة المشموم نثروه جدامي وانا ادور ع المعازيم

ها وبعديييييين؟

يابوا الكيكه

وحده من الصغاريه عيبها شكلها واشوفها يايه من بعيد مندفعه وجان تحط صبعها في نص الكيه تلحس الايسكريم !! يعني بعد مب الطرف لا النص !! زين ما فريت المسكه ونتفتها ..

قصينا الكيكه وشربنا العصير بالطريقه البايخه لي ما احبها اون كل واحد يشرب الثاني لكن ريلي ما شاء الله فجاه شد حيله وقال لا بشرب من نفس الكاس ونفس الصلب وانا رافظه وبعد مشاورات ومناورات رضخت وشربت وشرب بس ربكم فوق شرق يوم شرب لانه كانت فيه ظحكه

بعدين سرنا فوق نتصور انا وهوه وطبعا يعني تعرفون الحركات ما يحتاي اقولكم واعلمكم خلصنا وقلت له بس روح هلك يتريونك قال بروح بعدين بتعشى وياج على اساس انه يوعان وبيتعشى ويوم يلسنا ناكل انا غسلت الصحون وهوه يطالع !!

بعد العشا قلت له روح بيتكم انا تعبانه باجر تعال
وبس
روح
وانتهت الحفله ..

بس خلاص فركش!

الله يوفقج

الله يهنيج بحياتج

الف الف مبروك

الله يهنيكم و عقبال العرس ان شاء الله

وايد عيبني الفستان لانه مستور ماشاء الله

الف مبروووووووووووووووووك وعقبااااااااااال العرس يااااااااارب ^_____^

تسلمين الغاليه .. كلج ذوق

مبرووك فديتج

الله يووفقكم ان شااء الله

الله يبارك فيج الغاليه .. تسلمين .. لاني انا ما احب الكت والمشلح وايد