جهاز الرنين المغلق ؟؟؟؟

السلام عليكم ورحمه الله وبركاته
رجعنا مره ثانيه لجهاز الرنين المغناطيسي المغلق اللي يشبه القبر اعوذ بلله منه

مثل هذا

حبيت اعرف منو دشت الجهاز مع تخديررر وشو كانت حالتها بعد ماطلعت هل تعبت من التخدير تحت الجهاز او عادي؟؟؟
انا الحين بصراحه طلبت تخدير بسبب الحين الجو بارد وايد وسببلي الربو والكحه وخشمي مسدود فصعب ادش بلجهاز وانا هاي حالتي ووافقو على التخديررر وغير هذا حالتي تعبانه يعني توتر وقلق وخوف ابا حد يطمني؟؟؟

المشكله الجهاز في مستشفياتنا جديم وايد وهلجهاز يسبب الضيق والاختناق والهلع للي يخاف من الاماكن المغلقه ولمده ساعه تقريبا
ياريت لو يحطون لنا جهاز الرنين المفتوح جهاز مبسط وحديث ومصغر على الاقل الواحد يكون مرتاح لا خوف ولا شي
نفس هذيلا

المشكله اني حصلت هالجهاز ( الصوره الاخيره )بس هو غالي لكن مب مشكله المشكله انهم مايعطون تخدير طبعا لان انا يايبه الورقه من برع وصعب اكون بلجهاز وانا فيني الربو ويحتاج ساعه تقريبا

طولت عليكم والسموحة
ودعواتكم الحلوة لي ان الله يشفيني ويسهل وويسر اموري ان شاءالله

الله يشفيكي اختي ويعافيكي اختي انا بعرف ان ممكن بجهاز الرنين تطلبي يحطولك قرآن عشان ترتاحي اطلبي ممكن تلتهي وتنسي وترتاحي
الله ما يضرك يارب ويعافيكي

انا خلاص تعودت عليه لان لازم كل فترة أعيده ،،،،،

الأجهزة اللي عندنا فالحكومي كلها مغلقه ويختلف حجم الجهاز من مستشفى لآخر ،،،
و كل ما كان المكان ضيج اكثر كان أدق فالنتيجة واسرع فالوقت ،،،،

انا جربت في مكانين المكان الاول كانت المساحه اللي داخل اكبر بس تميت ساعه كاملة داخله و هم من نفسهم حطولي قران فاذني ،،

المكان الثاني كانت المساحه على قدي بالضبط المكان ضيج حتى ايدج مافي مكان تحركينها بس المدة اقل تميت نص ساعه بس مرات تمر بسرعه ومرات تكون بطيئة بس ما رضو يحطولي قران قالو ما يستوي تميت طول الوقت اسمع صوت الجهاز وادعي ،،،

بس انا الحمدلله تعودت عالمكان احس ما يحتاج تخدير نص ساعه بسرعه تمر ،،،

أختي سويته مرتين , عادي , الحمدلله ما حسيت بالخنقة ولا بالخوف , كان عادي عندي من أنه كان مرة تصوير لكامل الجسم وخذ وقت قريب الساعة . , وما كان فيه قرآن ومرة يبوا يحطوا لي موسيقى ورفضت ( مستشفى أجنبي ) ومرة وما كان فيه شي . بس المزعج هو الصوت مال الجهاز لأنه عالي بس عادي هي فترة بسيطة وبتخلصي وبتفتكي منه , أشغلي نفسج بقراءة القرآن أو بالتسبيح والإستغفار . وشخصياً ما أشوف أنه يحتاج تخدير أو تنويم حتى لأن التخدير له روحه مشاكله بس هذا وجهة نظري الخاصة وأنت شوفي شو بيريحج . ربي يشفيج أختي .

بسم الرحمن الرحمن الرحيم

السلام عليكم ورحمه الله وبركاته

اللهم يا مشافي يامعافي واللهم يا من شفيت نبيا أيوب من سقمه أشفي ختيه J44Z وجميع مرضى المؤمنين و

المؤمنات والمسلمين والمسلمات أجمعين آمين يارب العالمين ونسأل الله العلي القدير أن يوفقكم ويسدد خطاكم لما

يحبه ويرضاه أجمعين آمين يارب العالمين والسلام عليكم ورحمه الله وبركاته

تسلمون خواتي اشكر كل وحده ردت علي وجزاكم الله خير لكل وحده طمنتني ودعتي الله يوفقكم ان شاءالله يارب

والله ياخواتي من سنه ونص انا دشيت الرنين وبغيت اموت لا اروم اتحرك ولا شي واتحملت وبصراحه تعبت نفسيا يعني ابتدديت اخاف من الاماكن المغلقه والضيجه قبل ماكنت اخاف من ا شي والحمدلله بس الرنين غيرني فجاه ماعرف شصار فيني احس برعب وخوف
وبصراحه احتاج التخدير ماروم اتم فلجهاز بدون تخدير بسبب اول شي الربو ماروم اتنفس لاني اكح وايد وثانيا نفسيتي تتعب
المهم ربنا يسهل عليا يارب وقدر الله وماشاء فعل

تسلمووووون لي

والصلاة والسلام على سيدنا محمد وعلى اله وصحبه وسلم….