تكملة موضوع اختنا المغتربة ــــــ و الغباء النسائي في مجتمعنا PART1

السلام عليكم

العنوان وايييييييد كبير
و لكن يستحق وقفة

مب ف خاطرج يمر الشهر و ريلج يعطيج 500 درهم
لو ان ال 500 ها تكفيج يمكن للبترول بس من باب جبر خاطرج و تحسين ان عندج ريل

مب ف خاطرج بتسيرين تسوين شعرج و مكياجج لعرس حميتج
و يقولج تفضلي حبيبتي هاي 1000 لج تكشخي

مب ف خاطرج ريلج ياخذ موترج و يدفع تأمين موترج و المخالفات و كل شي
مب ف خاطرج ف بيت يكون ملك لكم ما تيلسين ف حجرة و حمام و عندج درون يهال

تذكرت مووضوع خاص شوي

تقول لي تريييت احمل من سنين و يوم حملت
قلت له خاطري اراجع ف مستشفى خاص
اخاف ع الياهل اللي اترياه من 7 سنين
يمكن يكلف 2024ولا 3000 و تقول لي رد علي
ادفعي من راتبج ما يخصني
والله يا دانة نزلت مني دمعة
ما ابغي فلوسه
بس لو قال لي يفداج المستشفى و يفداج كل شي
لاجل أول مولود وانا بروحي اراجع عادي بدفع من جيبي

بنات منو منكم هي الربان و هي القايد
هي الاساس و هي عمود البيت
هي تودي و اتييب
هي تدفع و تسوي
هي الريال و الحرمة
راتبها ضايع ع مصاريف البيت المستشفى اليهال مدارسهم
ولو نشوف لحالتها المادية صفر لا بيت لا سيارة لا حياة شرات العالم

كل وحدة تقول الصدق عشان ابدأ موضوع
الغباء النسائي في مجتمعنا
ها الغباء مب بس نحن نسويه
حتى بعض امهاتنا الكبار اللي وصلن 40 و 50 سنة
مع ذكر امثلة و امور منتشرة بينا و نحن ما ندري

بأمانة وقفة
مع نفسج
؟؟؟؟

و ابغي إجابة و لي عودة مع التفاصيل

انا لاني ما اشتغل بعدني ادرس فهو مجبور انه يصرف علي والحمدلله مابا اظلمه بس يحاول يسويلي كل شي

وقلتله يوم بشتغل راتبي مايخصك فيه ولازم تعطيني مصروفي الشهري وانا اذا حابه اشتري شي للبيت او للعيال فالمستقبل او اساعدك فمن طيب خاطر بس انت ماتجبرني وللحين يقولي لا راتبج مايخصني فيج ومصروفج بعطيج بس بنزله لل 1500 عاد ان شاء الله مايتغير كلامه عقب

هلا اختي

حلو الموضوع خصوصا انه نشوووف واايد حريم جي واذا قلتيلها تقولج ريلي مسكين مديوون

تخيلي ويانا مدرسااات يعني زميلاتي بالعمل وبالتدريس ينزل بدل السكن ع الريل وفوق ها مسكنهاا بحجره وحمام ولا بملحق صغير وياهله

غير انهن دوم اسمعهن يسيرن يتشرن اغراض البيت لا بعد ريلها يدق عليها يقولي شو اللي ناقص >>يعني تحسينه هو الحرمه

غير الكمالياات الثاانيه ويوم اقولهن ليش جي يردن اونه ما يقصر علينا ولا مسكين مديون >>اونه ما يقصر وهو مسكنج بحجره وحمام واغراض البيت انتي تبيبينها وهو كل مره يساافر ويا ربعه >>حق السفره تظهر البيزااات

ولا تشوفين اشكالهن تعبانااااات من كثر المراكض ورا البيت وهو تقولين ولا جنه ولد 18 مهتم بعمره

انا براااي الحرمه تيلس بالبيت وريلهااا يتكفل بمصاريفهاااا لانه ملزووووم فيها

حتى لو الحرمه اشتغلت يمكن تستحي تطلب او اذا طلبت بيقولهاا ما عندي خذي مصرووفج بس لو سفره سيده تظهر البيزاات

يعطيج العافيه ع الموضوع

الصراحه بتكلم عن نفسي انا مااداوم وماعندي خدامه وعندي ولدين وريلي كل شهر يعطيني 7000 هال طبعا لاغراض البيت الراشن واليهال ويوم اوديهم العبهم ومصروفي بس يوم نطلع وياه هو يدفع للاكل اذا بناكل برع والاغراض الملابس ومدارس اليهال وسيارتي والمخالفات كله عليه هو ،،،،،، الخ واذا نقصته هو فلوس لين اخر الشهر طبعا مستحيل اي يقولي بس انا اعرف لاني دوم اجيك البوك خخخخخ ف احط له من مصروفي لان يتم لي لين اخر الشهر من هال 7000 مرات يتم 3000 مرات اقل مرات اكثر،،، وانا يوم اخلص هال 7000 اوقاااات مثلا اقوله ابا ومحتايه ومايقصر اللهم لك الحمد لاني مب من النوع اللي يلعب بالفلوس ف اغلب الاحيان يتم لي

بس ريلي مستحيل يقتنع اني اداوم وانا اساسا من نفسي ماابغي اداوم واحس عندي احساس اذا داومت بستحي اقوله ابغي فلوس هو مابيقصر وبيعطيني المصروف بس احس مابيكون لي ويه اخذ وانا اداوم ^^ هذا رايي انا طبعا و انا مع الاخت اللي قالت

وانا اقول اغلب البنات اللي اعرفهن اللهم لا حسسسد ساكنات مع اهل رياييلهن في ملحق صغييييير وماشاء الله كللللهن رياييلهن ضباااااط من رتبه رايد وفوووووق يعني اللهم لا حسد كل واحد ريلها يستلم فوق 60 وللعلم ربيعاتي موظفات وكل وحده تستلم 30 الف وفوق الله يزيدهن لكن ولا وحده فيهن عندها سياره عدله ولا بيت ولا حتى انهن ساكنات في ايجار اللهم ياخذن شنط ب 14 الف و 20 الف وكل وحده طبعا عندها مال 5 عيال و 6 عيال وهذيل ربيعاتي الروح بالروووح وانا ادري ان رياييلهن ماعليهن دين يعني راتب الريال اذا 60 والحرمه 30 احسبوا كم فالشهر ؟ احس يرومون يبون لهم قصرررررر في سنه او سنتين وياخذن احلى السيايير ويعيشن حياه صححح احسن بدال ماتصرف ع شنطه كل شهر 15 و 20 الف …. انا لو مكانهن مابفكر اني اداوم بيلس اجابل عيالي اخير لي

واسمحووووولي لو طلعت برع الموضوع شوي بس تحمست خخخخخخ

المشكله ان حريم وايد يسون كل شي لانها تشوف انها لو تركت الامور عليه ما بيسوي شي فتقول اييب بنفسي وبلا ويع راس
وهالشي اللي مخرب الرياييل بهالزمن استوو غاسلين ايديهم من اي مسؤوليه
طبعا هاي الاغلبيه الا ما رحم ربي يعني يادوب عددهم قليل جدا اللي قايمين بمسؤولية بيتهم

ردج اختي شوكولاته اختصرتي علي كلام وايد و لازم الحرمة من بداية الزواج تحط النقاط عالحروف .

هالشي شفته بعيني