عساكم مرتاحين يارب
سبحان الله محد خالي من الهم وانا عندي مشكلة لازمتني من طفولتي لين الحين وهي…..
"الوقوف على الاطلال"
انا وايد اتعلق فالاشياء والاماكن وابداً ما احب الوداع بعطيكم مثال
من تحولنا عن بيتنا الجديم وانا شي فيه مات واحس ان استوا شرخ في نفسيتي وطبعاً نحن من تحولنا سنين ومنين مرت
وسالفة هالبيت سااالفة لو اشرحلكم واوصفلكم غلاه ما بوفيه
هالبيت كان مرتع طفولتي ضمنا كلنا ولي ذكرى في كل زاوية فيه وبتم ريحة البيت في بالي
انا ما كنت ادري ان بنتحول وقتها وكنت هذاك الوقت صغنونة وبايتة في بيت خالتي
فالليل سرت من بيت خالتي للبيت اليديد بدون لا حتى اشوف البيت نظرة اخيرة واودعه
من وصلت البيت اليديد وانا منتفخة احيد عمري ما انسى الموقف والكل فرحان وكان نفس اليوم عيد ميلادي
سويت مناحة جنه حد ميت عندي وامي مستغربة! ليش كنت اصيح هالكثر
وعقبها بكمن يوم سرنا البيت الجديم نشل اللي بقا من الاغراض و دخلت البيت ودخلت الغرف ومشيت في ممراته حسيت كانه شخص
ميت ازوره وخنقتني العبرة وتقطع قلبي وهني ينطبق قول الشاعر علي بن رحمة الشامسي:
اذا مريت صوب الدار الاول .. اشوف الدار تذريها الذواري
اخف السير في دربي واحول .. واطالع من يمين ومن يساري
واعيد اشوف واذكر عام الأول .. واشم الدار وتقفر الأثاري
تقول الدار ماضيكم تحول .. ولا يبقى لكم في الدار طاري
آلا يا ليت ذاك الوقت طول .. وخلا الماي في مجراه جاري
صروف الدهر والدنيا تهول .. تشف لحد والباقين خاري
وتاخذ من حقوق الناس الأول .. وتعطي حد لو هو ما يداري
على اللوحات ممنوع التجول .. وجيش الحب معلن بالطواري
مثل ما قال راعي الوصف الاول .. كلام الليل يمحيه النهاري
ومن بعد سنين على الموضوع لين الحين اصيح بحرقة ويتقطع قلبي عليه احس جزء مني خليته هناك
والله ما يهون عليه هذاك المكان وكل الذكريات الحلوة والايام الحلوة اللي قضيتها فيه
يوم بكبر ابا اشتري البيت هذاك واعيش فيه واحيي كل ذكرى حلوة عشتها فيه…
اصيح على كل مكان قضيت فيه طفولتي بيت يدوه اللي انهدم و بيت خالي اللي تحولوا منه هم ولا مفتكرين في بيوتهم وانا اصيح على الايام اللي عشتها في هالاماكن
انا مب معرسة واقول اذا يا يوم وخليت اهلي ما اتصور شو بيستويبي لو اسير عن امي @@!
تصوروا وحدة مثل حالتي هذي الجماد اصيح عليه كيف اقرب الناس لي وايد احاتي هالموضوع…
الاحظ ان محد يهتم بهالاشياء غيري يعني ما اشوف اخواني وايد يتذكرونه ويصيحون عليه مثلي
هالمشكلة ما لها حل وانا ما اقدرانسى هذاك المكان ولا ابا انساه اصلن!
منو منكم يعاني مثلي ….؟؟
انــــا بعد تونا من 3 سنوات اتحولنا بيت يديد
وانا ليييييييييين اليوم كل ما امر عند بيتنا الجدييم اقول يااااااارب ردنـــي هالمكان
الله يبعــد عنج الهم والضيح
والله ما ادري شو اقولج
أنا نفسج صياحة وماأحب أشياء *يمكن الناس يحسونها عادية *تروح مني~
وأول ما تزوجت قعدت اصيح بالفندق لزوجي وأقوله ودني عند أمايا وهو يضحك علي ويقول لي عاد انتي قلتي لي انج صياحه واتحبين أهلج وما تستغنين عن أمج وخواتج بس ما اتوقعتج جي!!!!
بس مع الوقت تعودت لأن هذي سنة الحياه,بس عانيت وااايد فالبدايه~
يعني اتعلق في كل شي يخصني من طفولتي لين الحين وصعب صعب اتنازل عنهم بسهوله لاصقه فيهم هههههه
ماعرف احس مارتاح اذا فقدت شي منهم
وبين فتره وفتررره احب اطل عليهم واتذكر كل شي حلوووو
غاليتي ^_^
في اشياء ( أحاسيس وذكريـــات يتحكــم فيها عقلنــأ اللاوعي )
هذا العقل سبحان الله يخزن كل شي في الصغر ,, الي نذكره قليل ,, لكن اذا رحنا عند أخصائيين ..
وناس تخاف ربها وعارفــة شغلهــا ,, يقدرون يطلعون كل ذكريـــات الطفولــة
عقلنـــأ اللاوعي بالاساس هو الي يتحكم بمشاعرنـــأ ,, وبما أنه تغذى في بدايتــه بذكريـــات الطفولــة
فشي عادي تتعلقين باي شي يذكررج فيها ,, سواء بيت ,, دولـــة , حد من أهلج ^_^
يعني هي مشاعر ايجابيــة الحمدلله ,, فانتي لازم تستغلينها وما تجلبينهــأ حزن ,, الماضي كان جميل الحمدلله
لكن باذن الله حتى الحاضر والمستقبــل بتوكلي على الله وارادتي بيكونن جميلين وحلوين ^_^
وان شاء الله جي ادربين عقلج اللاوعي على التعلق بحاضرج ومستقبــلج بعد
ان شاء الله اختي أكون أفدتــج
وربي يجعل كل ايامج فرح وسعـــأدة ^_^
انا من عرست وأحن لبيت اهليه .. احنا ساكنين فله من يوم عمري 6 سنوات عشان جي ما اذكر كيف كان شعوري عقب ما تحولنا كنت بيبي ههه
بس الحين من عرست احن لغرفتي فبيت اهليه