استخدمت خلطات وااايد و ما حسيت اني استفدت منها اخر شي طحت ع منتجات و حسيت بتغيير كبير مب 100 % بس تقدرون تقولون للحين 70% لانه مثل ما تعرفون العناية بالشعر تحتاج لوقت طويل …
اول شي غيرت الشامبو اللي كنت استخدمه و استخدمت شامبو Restoring Shampoo من REXSOL
انا طبيعه شعري يدهن بالعاده عند الفروة… بس يكون جاف بالاطرف ف يوم استخدم للشعر الدهني يجف واااايد و يوم استخدم للجاف يدهن ف هالشامبو ريحني واااايد طبعا ماركه REXSOL فيها اكثر من نوع الافضل انج تستخدمين حسب اللي يناسبج …
سعره 65 درهم
ثانيا بديت استخدم علاج للشعر المتساقط اذا صحت الترجمه ,,,
من نفس الماركة REXSOL مدحتلي اياه الصيدليه يوم سرت اشتري الشامبو اسمه Hair Aid
تقدرين تستخدمينه الصبح و فالليل ويوميا … العلبه تكفي 60 الى 90 يوم شكله يشبه محلول العدسات … تحطينه على فروه الراس و تسوين مساج عسب توزعينه … يقلل من تساقط الشعر
سعره 130 درهم
المنتج الثالث اللي كل البنات يعرفونه الامبولات ..
انا طبعا استخدم امبولات فيتشي vichy
للي ما يعرفها
العلبه فيها 12 حبه … تستخدمينها 3 مرات بالاسبوع …. او حسب الحاجه ( العلبه الوحده تكفي لشهر فقط و اقل شي 3 امبولات بالاسبوع)
بعد غسل الشعر فالليل تنشفينه بالفوطه و تحطين الامبوله على الشعر و توزعينها على فروه الراس تكون المسام مفتوحه ف تتشرب المواد اللي فالامبوله تسوين مساج للشعر وبعدين يفضل بفتره تسشورين عادي و تمشطين و الامور طيبه … طبعا الامبولات مفروض تستخدمينها ع فتره طويله و بعد 3 شهور بتحصلون انه نبت شعر يديد وخف التساقط …
سعرها 235 درهم
اخيرا منتج معروف عند الكل وهو فاشكول الثوم … انا ما استخدمه غير مرتين بالاسبوع … وايد مفيد لشعر مغذي له
فالنهايه عندي ملاحظتين ..
الاولى : اغلب البنات يتحرون انه البلسم ينحط على فروه الراس و هذا شي غلط اسالو اي دكتور بيقول لكم يضر الشعر مفروض البلسم ينحط على الاطرف و ما يلامس الفروه ابدا … وفي ناس صح ينعم شعرهم بس يقولون انه يطيحه ف انا ابتعد عنه و استخدم حمامات الزيت احسن ..
الثانية : علاج الشعر او العنايه فيه يتطلب صبر و على فتره طويله عسب يتحسن … فلازم تصبرين عسب تحسين بالفرق يعني اقل شي 3 شهور … في بنات يبون بيوم وليله يصير فرق و هذا مستحيل يصير …
السموحه انه الصور من النت …
واتمنى اكون افدتكم …
تسلمين فديتج ويزاج الله خيررررررر وربي يحقق لج امانيج فديتج