تجربتي مع شامبو الحصان للي يعانون من التساقط الفضيع

السلام عليكم
هلا بنيات حريييييم .. شحالكم ..
حبيت اخبركم عن تجربتي مع شامبو الحصان .. وحمام الزيت .. وسيروم الصبار ..
# أول شي أخبركم عن طبيعة شعري :
شعري قصير لجتوفي .. ومجعد ..غليظ .. وانا من النوع اللي دايم يملس شعره ..وماكان يتساقط ..
فجأة بدى يتساقط ويتساقط لدرجة اني يوم اسحيه تطلع الشعرة كاملة من فروة راسي بطولهااا .. وتطيح جدامي ويوم عن يوم قام يطيح ويتساقط اكثر واكثر .. لدرجة حسييت اني بتقرع ..
المهم من بعد معاناة وتجربة الزيوت على شعري .. مثل ماتعرفون منها اللي ينفع ومنها اللي ابدا مافاد .. ومنها اللي عطى نتيجة في طول الشعر بس بدون مايوقف التساقط اللي عانيت منه .. وخلى نفسيه داون وقلت خلاص بوقف ومابستخدم اي شي .. المهم قريت في المنتدى عن شامبو الحصان .. وسويت بحث عنه في القوقل وقريت فوايده .. بس ماعرف لازم اجرب عسب اقتنع فيه .. والحمدلله ماسارت بيزاتي ع الفاضي ولاتجربتي ولاوقتي اللي قضيته وانا استخدم الشامبو ع الفاضي ..

# ثاني شي بخبركم شو اللي استخدمته :
– استخدمت شامبو الحصان اللي يوقف التساقط ويطول الشعر بطريقة سريعه وملحوظة ..
– حمام الزيت مال شامبو الحصان اللي يساعد في توقف التساقط ويطول الشعر بعد ويعطيه نعومة حلوة لو انها بسيطة ويقوي من فروة الراس ويغلظ الشعر ويكثفه .. وينبت الشعر في اماكن الفرة اللي مافيها شعر ..
– سيروم بزيت الصبار اهم خاصية له ينعم الشعر ويقوي ويغذي بصيلة الشعر ويطوله .. ريحته حلوة وطبعا ماتغسلينه للمرة الثانية اللي بتغسلين فيها شعرج ..

# طريقة استخدامي للمجموعة :
– أول شي أغسل شعري عادي بشامبو الحصان وافركه على راسي لمدة ثلاث دقايق .. من بعدها اشطفه بالماي – ثاني شي احط حمام الزيت على شعري واحط عليه غطاء الشعر لمدة 15 دقيقة ومن بعدها اغسله عادي ..
– ثالث شي من بعد ماسشور شعري عادي وأجففه احط السيروم على فروة راسي يعني من الجذور على كامل شعري وبس .. وطبعا الزيت ماينغسل الا المرة الياية اللي تبين تغسلين شعرج فيهاا ..

# جم طولت لين شفت النتايج :
– النتيجه من أول اسخدام وهذا اللي أبهرني وخلاني اتشجع استمرعلى هالمجموعة ..
ومن بعد كل غسلة تشوفين النتايج واضحه أكثر على شعرج .. ومن بعد شهر بتشوفين شعرج تغير كلياااا وتحسن بشكل رائع وحلو وملحوظ ..

# وشو النتايج اللي شفتها وحصلتها :
– وقت تساقط الشعر مية بالمية وهذا اهم شي عندي ..
– طول شعري بسرعة وبشكل ملحوظ وبعده للحين يطول ومايمديني املسه الا مرة ثانية طول شعري..
– شعري صار كثيف والكل لاحظ هالشي ..
– صارت فيه حيوية ونعم شوي وبسهولة امشطه وعلى راحتي ماصرت اخاف امشط شعري من بعد ماكان يتساقط ويطيح بشكل فضيع ..
والحمدلله على كل النتايج ونفسيتي وايد مرتاحة وصرت مااحاتي شعري واوقف عند الجامة واتحسر ..

# انا ماكتبت الموضوع الا بعد تجربة مني .. والصراحه حبيت اساعد وانفع البنات اللي بعدهم مالقوا الحل النهائي لشعرهم ..وحرام اخليهم واشوفهم يعانون ويديورن من موضوع لموضوع ومن منتج ولمنتج .. ومن زيت ولخلطة يديدة .. والله تعب ترى ..ترى كانت حالتي جيه كرهت كل شي آخر شي وطفشت ..واتمنى صدق انه يكون الحل النهائي لمعاناة شعوركم ..
وتوكلوا على الله بنات ..
واتمنى انه يكون موضوعي ملم وشااااامل وواضح فيه كل اللي تبونه من أسئلة ومعلومات .. *_^
ولو تبون اي مساعده عادي بنتواصل ع الخاص *_^
بالتوفيق للكل