تجربتي مع البررررد والجفاف !! أحكي لكم كيف كنت ووين صرت الحمد لله بعد زبدة بودي شوب

اقلطن يا صبايا حياكن..

<< تصب قهوة.. وتقدم تويكس ههههههه

وشلونكن.. عساكن بخير.. ولهت عليكن.. ماش ما تنشافون وش هالقطاعة يا كافي!! << اخلصي!! وين الموضوع!!

معليش لزوم أوسع صدوركن شوي مع هالبرد اللي طب جميع!!

الموضوع يحكي قصة شوكولاين مع
The Body Shop Body Butter

شوفو الله يسلمكن.. هذه يا بنات تجربتي الخاصة.. وحبيت أفيدكم.. اللي تقرا وتحسن انها استفادت من المعلومة.. وجربتها وضبطت.. لا تبخل على أختها بدعوة حلوة.. يا عسى ربي يوفقكم أجمعين.
واللي بس بتمر مرور.. تشجعني بكلمة حلوة.. عشان أتشجع أنزل مواضيع ان شاء الله أكثر

الغاليات.. أنا وربي كنت الين دخل الشتاء.. أموت من الجفاف في جسمي ويديني.. بالذات ايديني.. طبقات من الجلد تتشقق أتعذب منها.. وما كانت الكريمات اللي جربتها تفيدني بشكل عميق.. بس تهبطني شوي وبعد كذا يرجع..

هالسنة..بديت من الخريف أرطب جسمي ويديني بطريقة جديدة.. الفرق!! شيء غير طبيعي! نعومة وارتياح يا ربي لك الحمد. (مع العلم جربت كريمات واجد.. بس هذا اللي جاب نتيجة صدق!)

كنت أكره زبدة بودي شوب.. الحين صرت مدمنتها!
بعد ما أستحم كل يوم مباشرة.. أدهن جسمي فيها.. واذا بالليل.. أدهن رجولي وألبس شراب دافي..
الحمد لله فرق السماء والأرض!!!
وبالدوام أو إذا طلعت زيارة أدهن ايديني بكريم نيفيا -دوم معاي بشطنتي-..

الزبدة شوي ثقيلة.. عشان كذا تجيب مفعول حلو.. وعن نفسي أحب اللي بالكاكاو..
Cocoa Boddy Butter
بس اذا تبين اخفهم ريحه انصحك بزبدة اللوز البرازيلي (الثاني اللي بالصورة).
Brazil Nut Body Butter
انا الكاكاو ما يتعارض مع عطوري.. بالعكس متناغم.. فأنتي واللي يناسبك.. عندهم أنواع واجد.. طبي وتخيري..

انا جربت الفازلين برضو.. بس صراحة ما عجبني.. يدبق من ثقله!! ونتيجة الزبدة على جسمي أروع من الفازلين.. والزبدة أقدر ألبس وأروح لأي مكان بعدها.. عكس الفازلين أشيل هم الين حطيته. (وعلى فكرة مجربة كريم الفازلين.. برضو ما فادني! ومجربة نيتروجينا اللي صجني فيه أخوي ولا فادني نهائيا!) ومجربة دوف ومجربة جونسون بعد ماش.

وسلامتكم

ملحوظتون موهيمتون: يا خواتي الغاليات الموضوع من تجربتي الخاصة.. ليس منقول