اول شي صلواااا عالنبي واذكروا الله
شحااالكن يااابنااات ان شاء الله بخير…
بناات والله اني اكتب مشكلتي واحس عمري مخنوووووووووقه ماااعرف شو اسوي
قبل كتبت مشكلتي في هالقسم اللي هي العجز الماادي اللي نعيش فيه
https://forum.uaewomen.net/showthread.php?t=255190
ومشكلة بيتنا الي ماااايكفينا
بنات بقولكم بيتنا دور وااحد فيه غرفتين انزين قبل كنا 5 اشخاص امي وابوي فغرفة وانا واختي الثانيه والثالثه فحجره
بعدين اختي قالت انا ايي كل ويييكند وابا غرفه ابويه قال ماعليه رحنا سوينا حجره بدال المطبخ والمطبخ سويناه ورا البيت وصغييييير
قلنا ماعليه الحمدلله اتيسرت
بعدين اختي عيبتها السالفه وقالت ابا اقعد عندكم على طووول انا وريلي وعيااالي لانهها ماخذه ولد عمي وعمي داايما يسويلهم مشاكل عسب يطلعهم من البييت ومااايدنون اختي (((بدووون سبب)))
ابويه قال مااعليه حياج الله البي اللي رباج وانتي صغيره مب عيزااان عنج وانتي كبيره…
المهم نسيبي فبيتنا ومانقدر ناخذ رااحتنا غرفتنا مجااابله الصاله بالضبط واول ماينفتح الباب نسيبي يااالس يعني ابداام انااخذ رحتنا صح متعودين معاه من يوم ننحن صغااار بحكم انه ولد عمي بس بعد مهما كان ريال غريب ونحن ماعندنا اخوان ونعتبره اخوااننا
شو نسوي اختي وين تيلس فالشاارع؟؟؟ مايهون علينا
انزين استوينا 11 شخص فالبيت مع اختي عيال اختي مقسمينهم فالبيت والغرف صغااااااااااااار يعني تقريبا 4 في 5 امتار
واليهال حد عند امي وحد عندنا فالغرفه والرضيع عند امه
قلنا ماااااااااعليه الحمدلله ع كل حاال
في رمضان استوت مشكله يدتي الله يحفظها ((مخرفه)) الحمدلله ع النعمه
طوول رمضاااان هي عندنا بحكم انه ابويه اكبر اخواانه
والله محد يقدر يتحمل هاليده وين ماراحت مايبونها لانها هي ساانها طوووووويل واايد تسب وتقول كلام ماله دااعي عمومتي كل واحد عنده بيت شعبي فبوظبي وهالكبر وكل واحد معاند مايبا يبني لهاليده غرفه وحااطين عينهم على بيتنا ويبونا نبني فيه غرفة لها ابوي يقول والله ماعندي مكان وين ابني البيت صغييييير
الحين هي عندنا متحملين كلامها السم والسب والشتم ماعندنا مكان نحطها ترقد فالصاله واذا استوا الفليل انزين نحن نبا نرقد لازم نقعد معاها ولا بتم تشتغل فالبيت وبتكسر الدنيا تودي الفرش فالحمام وتيلس هناك يعني هاليده برووحها قصه وساالفه
انزين البيت كل مايايينه يزحم اكثر واختي الثانيه اتي وتبا ترقد فبيتنا وين نحطها هي الثانيه مع اعياالها؟؟ ترقد هي وعيالها عندنا فالغرفه يعني نحن 7 اشخاص في غرفة وحده الحمدلله ع كل حاال…
امس يوم العيد بيت عمي يو بيتنا ورقدوا وهم بروحهم 8 اشخاص رقدناهم فالميلس ونحن الكيبل مالنا مايتحمل نفتح اكثر عن 4 مكيفات ولا بينفجر
بنات نحن وين نرووح هاي حالتنا كل يوم الحين نحن تقريبا 12 شخص فالبيت وين نحطهم الحمدلله ع كل حاال وغير خدامتنا وخدامة اختي يرقدون تحت الدري اللي يودي فوق السطح وبدون مكيف اللهم مروحه
الود وده ابويه ياخذلنا بيت عووود بس نحن على الله وعلى هالراتب اللي يحصله 5000 درهم تقريبا الحمدلله مستووووره
انزين بحكم انه وحده من خواتي مطلقه قدمنا على بيت فبووظبي واختي المطلقه لا تاخذ من الشؤون ولا تشتغل وابويه يصرف عليها
والحين نحن نتريا هالبيت والله يابنات البيت ضااق علينا وااايد صارلنا 20 سنه ساكنين فيه
نبا حالتنا تتحسن
والله نحن ناس ع قد حااالنا وانا كل يوم ادعي ربيي انه يفرج عنا
كم مره نزلو مال الاسكان ونتريا اسم اختي يكون موجود وماشي فايده والله يابنات نحن اولى من غيرنا
مره كنت ارمس اربيعه لي فبوظبي تقول نحن عندنا 3 بيوت شعبيه واحد ساكنين فيه والثاني مخلينه حق الدريول يروح يرقد فيه والثالث مخلينه حق السكوترات والدراجات مال اخواني والله العظييييييييييم انقهرت قلت ناس تطلع لهم البيوت ومايعرفون شو يسوون فيها ونحن هالبيت الصغير ونتريا الفرج
بنات والله اني ماااكتبت ولا اشتكيت لكم وفضفضت الا من زووود القهر وضيقة الحااااال
بنات شوروا علينا شو نسوي بيت وقدمنا وماطلع وفلوس ماعندنا عشان نشتري لنا بيت يديد وبيتنا ا كل مااايينه يزحم ويضيق
((الحمدلله ع كل حااااااااااااااااااااال))
بناات والله دعوه حلوه لنا تكفي ان الله يفرجها علينا
ويفرج على جميع المسلمين
تسلمين اختي عالدعوه الحلوه
الله كريم
الحمدلله على كل حال