بنات المتزوجات واهل الخبرة ساعدوني اختكم لله؟؟؟؟

السلام عليكم………
حبيت اعرض مشكلتي بعد مايأست من كل المحاولات قلت يمكن حد يعطيني حل استفيد منه انا صارلي خمس سنوات متزوجه والفرق بيني وبينه عشر سنين وهو ولد عمي انسان مثقف وجامعي دارس بررره لكن عقليته وايييد محافظ ماغيرته الدراسه بره كل شي عيييب عيييب وانا ابوي انسان متفتح وما حارمنا من شي عنده الانسانه المحترمه محد يقدر يغلط عليها لكن ريلي معقد حتى دراسة جامعه مايرظى اكمل عسب الجامعات اللي عندنا حنا في قطر كلها خلط تخيلوا انحرمت من الدراسه لهالسبب وسكت وهوفي ايام الخطوبه اكتشف انه مريض بمرض مزمن في الراس وهو ال ام اس مب وايد ناس اتعرف هالمرض هو نادر وخطير وياثر على جسمه ونفسيته وللحين ماله علاج شافي من المرض وانا لما عرفت ما قلت مابي بالعكس انا احبه وعمر المرض سبب يمكن انسان مافيه شي فجأه يموت الموت بيد رب العالمين لكن شنو اقولكم بداية الزواج طبعا كله خلافات بتقولون عادي وانا بعد لكن صج مافي حياة بينا مانتكلم واذا بنقعد مع بعض بنتكلم نتهاوش وكله عنده انه انا ماافهم وغبيه واهو اللي يعرف كل شي اسكت عنه رومانسيه معدومه ومايحب يطلع معاي ولا مكان تخيلوا بس اذا سافرنا بحكم مافي حجه اجازه ومافي حجة عندي شغل نطلع وهو مكشر بووومه اقول خلاص بتركه وبننفصل ماقدر عشان خاطر بنتي اتحمل ما احب انها اتعيش بين ام ابو منفصلين بس للامانه هو وايد يحب بنته وهو ترى انسان طيب لكن احس انه مايقدر يعيش معاي انا وهذا الشي وايد يجرحني اشوف غيري واشوف نفسي اتظايق اني عشت الهم وانا صغيره عمري الحين 23بس وانا للحين اللي يشوفني مايقول هاي عمري ولا متزوجه قولولي شسوي انا نفسيتي وايد تعبانه وماعندي ام اشكيلها امي الله يرحمها توفت من فتره ادعولها

الله يرحم والدتج ويغفر لها

ويشفي زوجج ويعافيه

تقريبا نفس عقلية ريلي كل شي عنده عيب ولا

تصدقين في بداية زواجنا كل يوم مسوية فيلم هندي

ولبسني غشوة وعباة راس وانا بعدني بنت 18 سنة وهو في عايلته ولا وحدة من اللي في سني ولا اكبر عني يلبسن نقاب ولا يتغشن

وممنوع اسير اعراس ووايد اشياء كانت تضايقني وايلس اقارن حياتي بحياة اللي حوالي

لكن هو بنفسه قال لي لاتعاندين معاي

وفعلا ودرت العناد وقمت اجاريه في اللي يبغيه واسوي اللي خاطره فيه

فكان يستانس وبجذه قدرت اجذبه صوبي والحمدلله خفت المشاكل

فنصيحة لاتعاندينه عيشوا حياتكم وخلوا بنتكم تحس انها عايشة في اسرة متماسكة

وعيشي حياتج بكل لحظاتها

واعتقد ان ريلج يحاتيج لانه مريض – اسأل الله العظيم رب العرش العظيم ان يشفيه ويعافيه –

فتفكيره في مرضه وفيكم متعبنه

فلا تزيدين عليه كفايه عليه مرضه فلا تكونين انتي والمرض عليه ارحميه من الحن بسبة الدراسة

والجئي لربج في كل وقت وعندج الاستغفار داومي عليه وبتشوفين الراحة ان شاء الله

مشكورة حبيبتي على اهتمامج بالرد انا والله ما احن واعاند عالفاظي بس لو احس انه يعاملني معامله حلوه انتي اتعرفين المره ماتبي شي غير الكلمه الحلوه اتنسيها كل شي ريلي بخيل بمشاعره وايد الله يهديه ولتعرفين انا ساعات اتقاظى عن سالفة الدراسه بس اتظايق لما اهلي وربعي يقولونلي ليش ماتكملين ومن هالكلام ولما اشوف البنات اللي قدي يسولفون عن الدراسه والجامعه والشغل احس بالنقص

لازم تسايسينه وتعودينه على الكلام الحلو وتكون معاملتج معاه بحب واحترام

ولاتناقشينه ولا تتضاربون واذا يغار حاولي تجارينه بحدود المعقول وحاولي تكسبين قلبه بكلامج الحلو

وانتي دلعيه وحبيه واهتمي فيه وعقب هو بيتعود على هالاسلوب وبيعطيج اياه

مشكلتج قريتها و حسيت إنج كاتبتنها من قلبج الغالية…..

حبيبتي فكري فيها من ناحية ثانية..لا تقولين إنج حاسة بنقص إذا البنات رمسوا..عن الشغل..قولي في خاطرج أنا عندي ريل….إذا رمسوا عن الدراسة..قولي في خاطرج أنا عندي بنت بالدنيا…

أنا يوم تشتد علي المشاكل دايما أحاول أذّكر عمري بالنعم….أرمس عمري بصوت عالي..أقول عندي ريل يحبني..شو أبا من اادنيا..عندي خوات أحبهم..شو أبا من الدنيا..عندي …أي شي..حتى لو عندج شنطة حلوة إتحبينها بعد عديها…بتقتنعين باللي عندج و بتقولين ماحد مستانس مثلي….

لو حسيتي إنج بتنفجرين..صيحي…طلعي كل إلي في خاطرج..(موب جدام حد)…صييحييي لين ما تحسين إنج خلاص موب كاسرة خاطر عمرج…
حبيبتي…حطي في بالج (فاقد الشي لا يعطيه)….حني عليه و عطيه عشان يعطيج

مشكوره حبيبتي على هالنصايح بحاول والكلام اللي تقولينه صح

احاول انشالله وشكرا عالنصيحه