بطلب من الغالية على قلبي العضوة ميمية88 راح أقدم لكم اليوم طريقة الكنافة النابلسية بالإضافة إلى أكواب الكنافة بالمكسرات نبدأ بالمقادير :
400 جرام من الكنافة وأنا أفضل في هذي الوصفة الكنافة الطازجة ونلاقية حالياُ في المخابز
200 جرام من الجبن العكاوي المقطعة والمنقوعة في الماء (وننقعها قبله بيوم ونبدل ماي النقع كذا مرة لحد ما تصير عندنا جبنة حلوه ونتخلص من كل كمية الملح).
لون الطعام البرتقالي
عدد 2 صينية وحدة صغيرة لخبز الكنافة فيها والصينية الكبيرة لقلب الكنافة بعد الخبز.
½ كوب خليط من الزبدة والسمنة (الزبدة راح تعطي الكنافة ليونة والسمنة راح تعطي النكهة)
قطر أو شيرة الله يخليها امي ويطول في عمرها كانت مسوية كمية كبيرة عسب تعرف رمضان كلي يوم يا قطايف يا كنافة يا جلاش
الطريقة:
في البداية في طبق عميق وواسع نقطع الكنافة إلى قطع صغيرة وعلى فكرة هذي مرحلة وايد حلوه لانج وانتي تقطعين اتحسن اني الكنافة جنها شعر وحدة وانتي ياسة تشدينة خخخخ فإذا كنتي منقهرة من وحدة اتخيلي اني هذا شعرها وعندج إياها .
بعدين انضيف كمية الزبدة والسمنة بالإضافة إلى نص ملعقة صغيرة من اللون لأحمر وما نكثر لاني اللون بعد النضج يصير برتقالي غامق. ونحاول نخلي الزبدة والسمنة تندمج بشكل جيد مع الشعر قصدي مع الكنافة .
وهذا شكل الكنافة بعد ما اندمج الزبدة والسمنة واللون بشكل جيد
وبعدين نفرد الكنافة في الصنينية الصغيرة بشكل متساوي ونوزع الجبن الحلو على كامل الطبق ونحن في البيت يحبون الكنافة تكون طبقة خفيفة وطبقة الجبن بعد خفيفة لكن ممكن تخلين الطبقات أكثر وهذا راجع لذوقج عزيزتي ميمية .
وبعدين انييب قطعة من محارم المطبخ ونضغط على الكنافة بشكل جيد عسب نسحب الماي المتبقي في الجبن. لاحظي .
مرحلة الخبز.
الكنافة ممكن تخبزينها بطريقتين .
الطريقة الأول انج اتشغين عين الجاز الكبيرة وتحطين الصينية وتمين تدورينها عليه لحوالي 20 دقيقة لحد ما الكنافة تنضج الجبن يذوب. (بذمتكم منو عندها بارض في رمضان توقف عند الجاز كل هذا الوقت. )
الطريقة الثانية انج تشغلين الفرن من فوق ومن تحت وتحطين الصينية في الرف الأسف واتخليها الصينية هذي خذت 20 دقيقة بالظبط لحد ما نضجت لكن كل ما كانت طبقات الكنافة والجبن كبيرة كل ما احتاجت إلى وقت أطول في الفرن.
وبعدين انطلعها ونقلبها في الصينية الأكبر ونرش عليها القطر أو الشيرة وممكن تزينينها بالمكسرات أو الفستق.
وهني سويت أكواب الكنافة بإستخدام صينية الكب كيك . بنفس خليط الكنافة والزبدة حطيت شوي في الصينية وبعدين ملعقة من المكسرات المشكلة وممكن تحشينها بالقشطة أو الكستر .
وندخلها الفرن لحد ما تنضج وتتحمر ونقلبها في صحن التقديم .
وأتمنى تكون الكنافة حازت على رضائكم أحبتي
جدا سهله واسلوبج اسهل
ممكن سوال ما نقدر نستخدم اي جبنه ؟؟؟؟عير هااااااااااااااااااااي
تسلم ايدج ع الكنافة ^_*
تسلم ايدج غناتي
والله كلمة مشكوره ماتوفيج
حبيبت قلبي
يسلموووووووو عيني كفيتي ووفيتي ولا بعد
بسويها وبصورها وبعرضها
يسلمو يسلمو يسلمو