بطرح سالفتي من جديد واتمنى تسااااااااعدوني بدعيلكم من كل قلبي دخيلكم دشو

السلام عليكم ورحمة اللة وبركاتة..هذه أول مرة أشارك فيها فها القسم..
ما بطول بدش فالموضوع….((طولو بالكم علي القصة طويلة شوي))

أنا بنت عمري الآن 24 سنة من وانا صغيرة يعني من الصف الساس أو الأول الأعدادي وانا فخاطري شاب عمرة الحين 28 سنة ربين مع بعض فنفس الفريج واحنا عوايدنا عادي نختلط ببعض ونتداخل كانا اهل واحنا فعلا كنا اهل قبيلة وحدة..

المهم كبرنا ودشيت الثانوية وما زال هالشاب فخاطري وهو بعد ما كان يفكر فغيري((وما زال)) شاب متدين خلوق عمرة ما طالع البنات ولا كلم بنت والكل يشهدلة حتى الشباب فالحارة يطنزون علية احيانا ويقولون عنة انة مو شغلة البنات..
من دشيت الثانوية والشباب يتقدمولي شاب ورا شاب والوالد يوقف كل شي ويقول انا ما بكلم البنت فهالمواضيع إلا بعد ما تخلص دراستها الجامعية وإلى يبي ينتظر ينتظر ..هاالشاب ما تقدم انتظرني لحد ما خلصت دراستي الجامعية ..

المهم خلصت دراستي وبدوء الخطاب بالوفود على الوالد ومن ضمنهم هالشاب ..
تقدم ولد خالي ورفضته بحجت مكان عملة بعيد جدا ويطول يعني ينزل كل ثلاث اسابيع ست ايام وسبب ثاني اهلة متعصبين ويحبون التحكم في النساء كانهن جواري..
تقدم ولد جيرانا ورفضته لأنهم ناس يحبون المشاكل والتعامل بالشعوذه فكل امور حياتهم وانا ماحبيتهم ولا حبيت ولدهم لانه يقول بخذها وبكسر خشمها وخشم اهلها.. الوالد كان موافق خوف من المشاكل ويخاف يسولي عمل وسحر بس انا اصريت على الرفض..
تقدم فارس الاحلام بس تدرون ابوي شوقالي وهو يشاورني فية..
((تقدملج فلان وما تبينة لانه ما عنده اهل وفقير وانا مب موافق علية وشو رايش فولد فلان؟)) ((يعني يخبرني للعلم والموضوع انتهى)) انا طبعا انصدمت الشاب تقدملي ونرفض وحتى بدون ما ياخذون شوري.. وهو بعد انصدم وياته حمة رقدوه فالمستشفى بسبتها..تعرفون سبب الرفض الرئيسي ان خالت هالشاب خبرت الوالد ان بينا علاقة والناس تتكلم علينا وطلعت كلام الله لا يسامحها والوالد صدق لانه لاحظ ان هالشاب هو الشاب الوحيد إلي وافقت علية مع انة فنظرة اقلهم مستوى .. وإلي يقهر اكثر أن هالخالة ضيعت على ولد اختها وخطبتني حق ولدها طبعا انا رفضت لان تصرفها هذا منتها النذالة وخاصة ان هالشاب معتمد عليها في موضوع خطبتي حقة لان تأثيرها على ابوي وايد قوي وهي خذلتة وخطبتني حق ولدها شفتو النذالة كيف؟؟..انا كرهتها وما زلت اكرها وهي تحب تقهرني ومصرة تزوجني ولدها مع انها تدري اني ما احبها ولا احب اسمع اسمها والوالد يسمع كلامها ويبيني اوافق على ولدها وانا ارفض والوالد الحين زعلان علي ..
انا محتارة ارضي ابوي وافق على ولد هالخايسة الكذابة الحقودة مع العلم ان ولدها شاب مب زين وراعي بنات ومرة مسوي حادث وكان شال وياه بنت ونفضح ..هل اوفق علية وانا ادري بكل هذا عشان ارضي الوالد .. وكيف اخذ واحد يفكر فغير وانا افكر فغيرة ..

المصيبو إني احب هالشاب وما اقدر انساه ..لاتقولون إذا تزوجتي بتنسينة صدقوني ما اقدر والله العظيم ما اقدر.. شورو علي بسرعة ترا بتخبل

وكلي أمرج للخالق

والله بيفرجها إن شاء الله

استخيري ربج والله يجدم لج إلي فيه الخير

والله يسهل امورج انشاءالله ويحقق إلي فبالج

استخير ثم استخيري ثم استخيري

وربي وفقج

حبوبة مشكلتج بسيطة وما يبالها كل هالتعقيد …………….

وين الصراحة اللي بين البنت وابوها ؟؟؟؟؟؟؟ ما سمعت بالاية الكريمة : (( ياابتي استاجره )) في قصة نبينا موسى !!!

يعني من هذيك الايام في صراحة بين البنت وابوها في مثل هاي المواضيع ……….

يالله حبيبتي دقي الحديد وهو حار وسيري خبري ابوج انج تبين الشاب اللي تقدم لج قبل لا يطير من ايدج وتبكين عليه طول العمر ………..

يالله شو تتريين ………

الله يوفقج ويستر عليج
اختكم

لاحول ولا قوه الا بالله
الغاليه صلي الاستخاره وربج يفرجها عليج باذن الله