بالأرقام أسعار تكلفة العبي الزهيدة و الأرباح الخيالية

السلام عليكم

وانا اتصفح المنتدى مر علي موضوع وحدة تدور على عباة بـ 500 او اقل

البعض رد عليها وقاللها مستحيل تلاقين بهالسعر الحين

في هالموضوع وبالأرقام ابى اخبركم انه معظم اللي يفصلون عبي شجعين في وضع ارباحهم

وبحسب معاكم الكلفة التقريبة للعبي اللي تتفصل عند وحدة مواطنة في البيت
( مع ملاحظة انه المواطنات هن اللي ضاربات بالسعر)

1- طاقات عبي قماش الصالونة والانترنت والجريب السعودي تنشرى بالجملة بالطاقات من سوق الجملة في دبي وتطلع تكلفة العباية الوحدة من الخام فقط في حدود 100 درهم للعباية كلها واذا فيها قصات ما عليها بنزيد عليها ويصير 150 درهم مع انه اقل

2- المواطنة ما تدفع ايجار لأنها تكون تكون استغلت غرفة عندها في البيت وما تدفع للرخصة يعني مهما خسرت فيه في النهاية ما تدفع شرات المحلات ( المحلات تخسر اكثر)

3- كلفة التفصيل : راتب الخياطة الفلبينية الوحدة صاحبة الخبرة 1500 درهم شهريا واحسبي هالخياطة كم عباية بتفصل خلال الشهر مب اقل عن 20 عباية لأنها ببساطة عباية وخياطتها أسهل بوايد من الفساتين يعني العباية الوحدة تكلف 75 درهم من راتب الخياطة أو حتى اقل مع ملاحظة انه بعض الخياطات تكون رواتبهم اقل 1000 درهم لأنه ما عندهم خبرة وهذيلا معظم اللي يشتغلن في البيوت هذيلا الفلبينيات بس لكن لو خياط هندي ولا خياطة هندية بيطلع ارخص بوايد

4- معظم المواطنات وليس الكل يستخدمن الكلف الجاهزة اللي تنباع بسوق الجملة يعني بتشتري طاقة كاملة للكلفة او الليس تطلع الطاقة بالكثير 200 درهم وفيها تقريبا اكثر من 10 وارات ويطلع لج الوار بـ 20 درهم و في العبي البسطية العباة الوحدة تكلف تقريبا 1 وار اما العبي الثقيلة بتكلف على الكثير 3 ورات يعني العباية بتكلف 60 درهم وخلصت العباية

تطلع تكلفة العباية السادة مع التفصيل = 100 درهم خامة + 75 درهم تفصيل = 175 درهم

واذا اتفصلت عند خياط هندي بيطلع ارخص بوايد

وبيبيعونها عليج مش اقل من 220 درهم

تطلع تكلفة العباية اللي فيها قصة واسعة ومركب عليها كلفة وبخامة صالونة مثلا = 150 + 75 + 60 = 285 درهم

وبيبيعونها عليج مش اقل عن 1500 درهم

متأكدة الحين بتقول وحدة لا أنا شغل عبيي شغل ايد مش تركيب
اوكي اتفقنا

معظم شغل الايد هاليومين موضة اللي يشبه تطريز المخورات

والمخور مع الكريستالات لما تخورينها عند هالمحلات بالكثير وفي بوظبي ياخذ 600 الى 800 اذا كان الشغل ثقيل

بنقول 800 تطريز + 150 كلفة الخامة لقصة واسعة + 75 كلفة خياطة فليبينة = 1025 درهم

وما عليه بضيف عليها سعر الاغراض والخامات اللي ماراح تخطر على بالنا ( ومتأكدة انهم يشترونها بسعر الجملة وسيتخدمونا حق كل العبي مش مخصوص حق عباتج -بكملها لـ 1500 درهم

لكن هم كم يبيعوننها

مش اقل عن 3000 درهم

وعلى فكرة معظم القصات مش تصميمها الشخصي تكون ملطوشة من المحلات ولا من مصممين ثانيين

وتقولج من تصميمي الشخصي وهناك اهيه ما تعبت ولا شي

طبعا كلها ارقام تقريبية ممكن تزيد وممكن تنقص لكن هذا هو رينج الأسعار

أنتظر اراؤكم وتعليقاتكم

أوافقج الراي مليوووووووووووووووووووووون بالميه صح لسانج والله عرفتي تحسبينها مثلي………..
والحمدلله رب العالمين في حياتي مافصلت عند مصممه ولا عند مصمم وعباياتي مايتعدن ال1200
والكل يسأل من وين…………؟؟؟طبعا أقول عند مصممي الخاص……..ههههههه ترا الخقه صارت موضه هالايام..

منو يقول ما شي عبي ب500 تعالي عندنا في راس الخيمة بتحصلين عبي على 300 – 500 لحد 700 وبس واذا يبت كلف من عندج اتكون في حدود 270-300 درهم أمسات سارية السوق وشفت الأسعار 00000 يا ناس عباة ب1000 ولا 2024 درهم مب حراااااااااااااااام بتقولين بيزاتي وعندي وعادي أقولج مب أبرك تتبرعين بها لعائلة محتاجة أو لجمعية خيرية تكون خير لج في الدنيا والآخرة بدال ما تعجيينها لعباية تنلبس لبسة ولا لبستين
أنا ما أعترض على لبس العباة والكشخة لكن في حدود المعقول

صح كلااااامج وكلنا نأيده ،،

بس شو بنسوووي ،،

احنا ما عدنا موديلات او افكار والحين كل وحده تحب تتميز بعباه والحريم قامن يغلن كل ما ايهن لو يراعوون في الأسعار بيحصلووووون الناس تشتري اكثر

شكرا اختي على الموضوع واوافقج الراي ان اسعار العبي غاليه بس ليتكن يوم تتكلمن ما تحددن واتقولن مواطنات ولا انتن ما عندكن وطنيه.. ,وما عندكن غير المواطنات اتحطن عليهن واتهاجمنهن.. .. وبعدين هن المواطنات بس اللي رافعات اسعار العبي .. الا الوافدين امبالغين ورافعين اسعار العبي وموصلينهن من 20,000 وطالع لان عارفين ان في ناس ادور على الخقه.. ومقارنه بين اسعار الوافدين واسعار المواطنات ولا شي.. ومنو قال ان المواطنه ما تدفع ايجار او سكن العمال… اذا وحده ولا هنتين حاطات ملحق لخياييطهم فمب كلهن امسويات جيه.. الا يدفعن دم قلبهن على الايجارات والويز.. واذا مستهينه بقدرت المواطنات في التصاميم فانتي غلطانه.. تعالي عنا في جامعة زايد وشوفي اصول الابداع والتصميم في كل المجالات من تصميم اللبس والنعول والعبي والاكسسوارات… ولا جان ما شفتي بعد يقلدن عبي المواطنات..
ما شي يحرق قلبي الا يوم اشوف وحده تنتقد بنات البلاد وجدام كل الجنسيات.. عممو عن غلاء اسعار العبي ولا تخصصن واتقول المواطنات فيهن وفيهن..
وانا اختار دوم المصممات حسب حلات موديلاتها وماشالله عنا نسبة كبيرة من المبدعات ولا امانع ادفع في العبي طالما ان الموديل حلو وراقي

صدقج والله وبالعكس ارخص بواااااااايد من الي كاتبتنه انتي

مره وحده كاتبه ان المصممه الفلانيه تييب الليس من فرنسا اونه والله يوم شفت كم من عباه حقها والله ان موووجود في محلات التركيب هي بس مركبه عليه فصووص وانا شايفتنه يعيني والله لو خذته مابيطلع علي اكثر من 30 درهم بس واذا بالجمله اكيييد اقل بوايد

وفالاخير كل وحده لها راي وين تفصل

شكرا اختي ع الموضوع… انا شفت موضوع البنت اللي كانت ادور ع عباه اقل عن 500 وردوا عليها انها ما بتحصل الحين بهالسعر وبالفعل استغربت… انا امس مطلعه عباتي مع الشيله وفيها حركات ومسوتنها ب 280 براك… طبعا هو قال لي اكثر بس كنت بذبحه واخر شي سواها لي بهالمبلغ…
وكل اللي شافوها اليوم مدحوها وقالوا بيسوون مثلها…

حراااااااام اني افصل ب 1000 او 2024 وكل شهر او شهرين اروح افصل غيرها…
ترا بنتحاسب ع البيزات اللي نصرفهن…

بالأرقام أسعار تكلفة العبي الزهيدة و الأرباح الخيالية

اترك تعليقاً إلغاء الرد