اهرب من واقعي لكن الواقع عيا ينساني :(

يالسة وضايقة فيني الدنيا ومن الضيج اصيح واحاول امسك عمري والله ان دموعي بروحها تنهمر من الضيج الي فيني

لو تذكروني كنت منزلة موضوع لاني كبرت ولا حد تقدم لي واقرب الناس يعايروني ويتحرونها غشمرة ومن داخلي اتقطع

والي تشوفني من بنات اهلي تدعيلي بالزوج والي تروح للعمرة ويوم ترجع تقول جدام الكل دعيت لج بالريل قسما بالله كلامهم سجاجين في قلبي ولو انهم يبون الخير بس لا يتكلمون جدامي تعبت خلاص احس الكل يطالعني ومستغرب لين الحين ولا حد فكر فيني وكبرت وشكلي باين عليه الكبر

اللهم لا اعتراض

بنت عمي ياية تبشرني بان اختها الي كبري ربت ويابت الياهل الخامس فرحت من خاطري لكن يوم رحت غرفتي تميت اصيح على حالي لاني صرت اجامل الناس ويوم اروح عندهم ما عندهم غير يدعون لي ويجرحوني بالكلام ويعلقون بطريقة غير مباشرة

وكل ربيعاتي الي في الدوام والموظفين الي في القسم عندنا معرسين وكلهم اصغير عني تخيلو شكلي اكسر الخاطر والله ويوم تعرس وحده من القسم الثاني الحريم والرياييل يدعون لي اااااااااه ياقلبي

قسما بالله يالسه ااكتب لكم وانا اصيح

تعبت من الناس ومن كلامهم
شو ذنبي اذا ما ياني نصيب

امي و ابوي و اخواني كلهم يقولون متى بتعرسين وتفكينا ولو انها بغشمرة لكن تعور القلب

قمت اربي عيال خواتي واخواني ويعقونهم علي يوم يسافرون او يطلعون

والي يعذبني يوم البنات الي يرمسون جدامي ويقولون لي كيف رياييلهم دلعوهم في اعياد ميلادهم او مناسبة حلوة او في العيد وانا حليلي محد يفكر فيني وبالعكس انا الي اتذكر مناسبات كل حد واروح لهم وكلهم يحبوني لكن كلامهم يعور قلبي وايد لان كل بنات عمي وخوالي وخالاتي الي اصغر عني عرسوا ويابو عيال

ادري وايد رمست بس من الضيق سامحوني فديتكن

في خاطري سالفة وابى اخبركن عنها
في حد يانا الدوام يخلص شغل خاص فيه وشافني وشفته بس ما ادري من شفته تمنيت انه يكون من نصيبي
و استغفرت ربي ومرت الايام وشفته لازم زبون دايم في المكان وكل ما اسمع انه موجود اتي صورته في بالي وحتى لو كنت برع صورته ما تغيب عن بالي ابد يابنات والله
صليت الاستخارة وقلت يارب لو هالانسان خير اجعله من نصيبي ولو شر لي ابعده عني
والين يومكم صورتة ما تغيب بس انا متاكدة ما بيفكر فيني
لان وايد بنات احلى عني واصغر وهو ماشاء الله كل المواصفات الي فيه تتمناها كل بنت
وكل ما احاول انساه ولا افكر فيه القى عمري اصلي وادعي ربي يكون من نصيبي

بنات ادعولي بالزوج الصالح ولو هالانسان كان صالح يكون من نصيبي ويرزقني الزوج الصالح
دخيلكن بنات الي سايرة العمرة او عندها حد هناك تقولهم يدعون لي

والله ان اختكن في ضيجة

لا تقولون لي لا تفكرين و عيشي حياتج
لاني عايشة حياتي لكن يوم ابى انسى الف سؤال انساله من كل حد هذا غير التعلقيات
والحمدلله انا انسانة متحجبة و اصلي و اقرا القران والحمدلله على نعمة الدين

ادعولي بنات

بس انتي وااايد حسااسه ويوم تروحين غرفتج تفكرين بكلامهم..يختي عقيه ورى ظهرج ولا يهمج احد داام ربي ان شاء الله راضي عنج هاي اهم شي ((وحطي ببالج قضيتنا في الدنيا نرضي ربنا وبس ))

وكــل شي بوقته حلووو وان كبرنا دووم نقول الحمدلله^^

وعادي والله داام انه ماكتب لنا ربي لين الحين لازم نرضى ونفرح لان كــل اللي يكتبه ربنا لنا خير

اسال الله ان يرزقني وايااكي وبنات المسلمين بالازواج الصالحين اللي يخاافون الله فينا ..

هو القادر والولي على ذالكـ

الغلا كل تاخيره فيها خيره

ولا تستعجلين بالنصيب

واذا على الكلام محد بيسلم من احد لا من قريب ولا من بعيد

الاقارب عقارب والربع يقرصونج من تحت لتحت

فديتج والله
والله اني شوية واصيح ماعليه يالغالية هالشي بيد الله ومكتوب مهما سوينا
الله سبحانه يختبرج واكيد له حكمة بالهشيء وبعدين الواحد يحاول يخفف على عمره

شوفي شو انت موظفة وغيرج يتمنى الوظيفة
شوفي انت عندج اهل وغيرج من غير اهل
شوفي انت عندج بيت وحياة خاصة وغيرج حالته صعبة
شوفي انت صحتج طيبة وغيرج يتمنى الصحة
شوفي انت مسلمة تعرفين ان كل شي مكتوب وتعرفين شي اسمه الصبر
وتعرفين ان لكل شي أجر .. تعرفين ان الانسان يصبر ويصبر نفسه بالدعاء
يشكي لربه ويتقرب منه

ياغالية اقري سورة البقرة و استغفري واايد وادعي من خاطرج
سبحان الله ماتدرين كيف بتكون حياتج لو تزوجتي ممكن تكون مشاكل وهموم
علشان جيه الحياة مب بس زواج
حياتنا عبادة وتقرب لله وصبر وامور كثيرة .. الزواج مب كل شي والله واايد بنات
يقولون ياحظ البنت اللي مب معرسة مرتاحة

الله يوفقج يارب ويسعدج

وبتسمعين بشارات حلوة