حبيت فيه أن كل وحده عندها ولد يعاني من صعوبة التعلم ان تتدخل وتخبرنا عن تجربتها مع ولدها وكيف واجهت هالمشكله ..ووين ولدها يدرس ..ومنويساعده في الدراسه ..وكل ما يختص بهالموضوع …
عني انا سالفتي طويله ووقتي الحين ضيق ..فياليت الاخوات يسردن اللي عندهن …
أنا بغيت أسأل كيف عرفتن انه ولدج او بنتج عندها صعوبة تعلم
على اي مقياس عرفتي
هل وديتيهم عند مختص واهو حدد لج وقال ها صعوبة تعلم
هلا اختي انا اعندي ولد صعوبه التعلم…
هو درس في الحضانه كان عمره 3 سنوات وبعدين من الروضه الى الان في مدرسة المواكب الخاصة
ولدي صف اول ابتدائي.. هو ماشاءالله عليه في البيت حركي وايد .. بس في المدرسه يكون هادي والمشكله مب في الهدوء المشكله انه ما يشارك… كل ما ارمسه اقوله ماما شارك في الصف رمس الابله ..يقولي زين بشارك
والمشكله الثانية والاهم هو استيعابه بطئ واااااااااااااايد وينسى بسرعة … احس هو مب فاهم شئ .. على فكرة هو عمره 6 سنوات يعني سنه زين للمرحله اللي هو فيها .. يعني يوم ايلس اراجعله احس ان هو مب فاهم شئ ومايعرف بعض الحروف .. مايعرف يقرا.. انا اشوف اللي وياه ماشاءالله يقرون بس هو نص الحروف مايعرفها بالانجليزي او بالعربي.
هو في الاناشيد والقران ماشاءالله عليه يحفظ بسرعة
وكل اسبوع يكون عنده املاء عربي وانجليزي .. العربي عندهم املاء حروف يعرف يكتبهم بس المشكله في الانجليزي يعطونهم فوق 6 كلمات وايلس اعلمه ويحفظ بس يوم يعطونهم الاملاء مايكتب شئ بس خرابيط ماعرف ليش.. ماعرف كيف اتعامل وياه.. قولولي كيف اتصرف وياه وابا ولدي يكون من الاولاد المتفوقين
بس هو يوم كان في الحضانه ماشاءالله عليه كان يعرف الحروف بالعربي والانجليزي واتعلم بعض الايات واتعلم الصلاه والحين من دخل الروضه احس استيعابه قل وايد,,
قولولي كيف اتصرف وياه,,,