الموقف خطير و الناس لاهيه!!

السلام عليكم و الرحمه

صار لي فتره مادخلت المنتدى.. انشغال بالدوام و جيه

و الي خلاني ادخل.. اني حبّيت ارسل رساااله عاااااااااااااااااااااااجله.. للأهالي و الأخوات ينشروها بينهم لخطووورة الموقف الي قاعد يصير =(

أمانه أمانه.. الي تروم تنقل الموضوع.. تراني أنا لطّوف محلّلتنها.. انشري الي قاعد يصير.. خلي الي راقد يوعى.. ماعاد فيها رقاااد و ساهيين عقب اليوم..

بحكم شغلي كـ مدرّسه.. فاحدى المدارس الثانويه.. فأنا اختلط بالطالبات.. من الساعه 7 لين 3 العصر

يومياً و بشكل كبير..

1) نبدأ الصبح بالطابور.. و تيي الطالبه .. حاطه مكياج = الروج و الجحال و المناكير.. و الشعر بف شكبره

ننصح. و نخالف.. و انذاار.. بس مثل ما يقوولون ايد وحده ما تصفق.. البنت تطلع من بيت اهلها و هيه شاخطه الجحال من عينها لين خط شعرها!! وين سايره؟ @_@!!

صراحه انا مدرّسه.. بس والله حتى كريم اساس ما احط.. بس عشان ما يقولن البنات ليش حلال عليج و حرام علينا.. << طبعن بغض النظر.. هن بعدهن طالبات.. اعمارهن 15 و 16 لاحقات على المكياج

2) سالفة البويات.. و قصّات شعر شوجي و غيرها .. و التشبه بالبويات.. و اسلوب المشي.. و كل وحده مع حبيبتها.. و ما بخفي عليكن الي قاعد يصير.. البنات ينخشّون فأماكن و تصير بينهن اشياء الواحد يستحي يقووولها
زاخّين كم وحده اكثر من مره.. والكلام ينتقل عن ان فلانه و فلانه يتلاقن فالحديقه و يسوّن المنكر!!!
أو يتلاقن في بيوت بعض و اونهن يدرسن

طبعن فالمدرسه كل مكان له مناوبااات .. مدرّسه تحوط فكل مكان.. بسبب كثرة هالحركات صايرين نرااااقب

البنات استوى عادي عندها تحوط جدام الكل .. و تقول هاي حبيبتي.. وانا سنقل.. ولا تيكن @_@

3) سالفة الموبايلات صراااااااااااااحه ياأهاااااااااالي دخيلكم.. انتبهوا على هاي السالفه ما أقول لا توثقوون ببناتكم ولا بقول لا تدلعونهن.. بس والله الي شفناااه فالفتره الاخيره فووق ما تتصورووون

تخيلوا الموبايل تيّيبه معاها المدرسه ليش؟؟! و نكتشف بنات انهن يشترن لربعهن موبايلات من ورا علم اهلهن

و الايبود.. و الكمبيوتر.. و يالسه على المسن فالمدرسه! انزين اذا ربعج مداومات.. من هاي المتفيجه ترمسيها على المسنجر!! << الاداره يوم تجوف بنت بلابتووبها لازم تفتشه احتياطا.. و الله لايراويكم المحادثات مع الشباااب =(

و نفس الشي.. الموبايلات.. تتصل الاخصائيه بأخر رقم متصله فيه البنت او مطرشه له مسج.. والله العظيم يطلعوون شبااب للأسف

ما أقوول كل البنات يرمسوون شباب.. بعضهن ينسنّه بالغلط و هيه يالسه تتجهز للدوام و البعض يكونن متصلا ت بأهلن او اخواتهن

بس ليش احط عمري في موقف اخلي الواحد يشك فيني

4) اهم نقطه للأسف للأسف.. الزمن هذا ما خلا الواحد يعرف يفكّر.. اخر شي.. البنت تطلع من المدرسه.. تركب ويا ربيعها؟؟؟؟؟؟؟؟؟ تخيّلوا يا جماااااااااعه
والله العظيم يوم تخبرني البنت.. انصدمت!! تباني اساعدها و اخلي الاداره تتستّر عليها!! =(

بنت فالثانويه!! توّها 15 تطلع ويا شباب.. و تقريبا 7 من ربعها نفس حالتها.. يعرفن بعض على الشباب و يطلعوون من المدرسه كل واحد بربيعته؟؟؟؟؟

بتقوولون دوور المدرسه وين! بخبّركم.. الاداره تحط مناوبتين اخر الدوام.. يجوفن البنات و ينظمن حركة الطلعات.. بس بحفظ ويه كم أخو انا؟؟ بحفظ ويه كم دريول؟؟

انا عن نفسي مرات لازم اخلي اخووي ينزل دريشة السيّاره عشان اجووفه وانا متغشيه! فما بالج بالغريب..

بس وين دووور الأهل؟؟ لاتسمحين لبنتج تروح مع أي وحده من ربايعها ولا تسير ويا الدريول إلا جيه

البنت تخلي الدريول يوصلها المكان الفلاني و تقول له بسير ويا فلانه .. و ايي الحبيب و يشلها

تخيّلوا شهر كامل على هالحاله؟؟؟؟؟

طبعا هالسوالف كلها الأهل بيعرفون عنها

بس ليييييييييش نتريّا لين تطيح الفاس بالراس؟؟

وحده منهن اربيعها يهددها بصورها…….. تخيّلوا يا ناس بنت 15 توزع صورها؟؟

اليهّال الحين من الابتدائي و الموبايل فايدهم.. ليش هالحريه الزايده؟؟ اذا مأمنين ان الولد مربّاي و البنت مسنّعه.. لا تأمنووون من رفقااااء السوووء

البنت الي رمستني فموضوعها و تريد واسطه والله من بناااااااااات عرب وناااااس بس الربعه الخايسه هي الي سحبتها وراها

و قعدن يهدّدنها .. بالفضيحه عند الشباب لو ما اشترت تيلفون معاهن و طلعت مع اي حد يعرفنها عليه..

5) نقطه أهم.. الصلااااااااااااااه.. البنات.. نحوّشهن للصلاه.. صلاة الظهر يأذن و هيه تسووولف و لا عليها.. مسوين لهن فسحة صلاه.. ولا يعبرنها.. تيي الصبح تسأليها صليتي الفير؟؟ تقول لا ماشي وقت نشيت الصبح عقب ما تلبست اخواتي مستعيلات بيتأخرن
لا صلاه و لا عبااااده وين بيعورها قلبها يوم تسوي المنكر؟؟
والحجااااااااااااااااااااب..!! نص الكشّه برا.. و الصدر القميص مفتوح عنه.. القميص ينحسر لين قبل الكووع.. اونه هب حلو نازل!! لا حول ولا قوة إلا بالله! انزين لو خطف عامل؟؟ بتغطين شو ولا شو..؟

على هالاشياء تستاهل البنت كف.. طرااااااااق يردها لربها شوي.. و تخافه .. بيعورها الكف اليوم.. لكن باجر بتقول الحمد لله و يزاهم الله خيييييير …

المطلووب..
يلساااااااااااات النت الي 24 ساعه البنت فالمسنجر.. و مسنجرها عمره ما يطلع Offline
يلسي وياها.. جوفي وين تدخل .. و مع من تسولف.. ما فيها شي لو قلتي لها عطيني باسوورد ايميلج هاي مصلحتها!!

والله مرّات تيي وليّة امر.. تقوول.. ليش بنتي درجتها ناااااااازله؟؟ البنت 24 ساعه على الكمبيوتر تحل الواجب!! كيف ترسب! << الام كبيره فالعمر.. و ما تعرف للكمبيوتر.. البنت يوم تسألها امها قالت لها اخلص واجباتي.. و البنت يالسه من هالمنتدى للثاني.. و من مسنجر للثاني

و المسنجر.. كله مكتووب.. الحب سوى فيني و الحب خلاني.. سألي بنتج. .. طالعي شو تحط من صور فالمسنجر.. نصهن يحطّن صورهن .. ولا عليها.. ماتدري يعني ان البنات يسرقن صور بعض فالمسن و يحطنها على اساس انها صورهن؟

الفيس بوك.. ياهل فالثانويه.. و عندها فيس بوك؟! @_@ و عندها نت لووق.. و عندها أهوال الدنيا كلها.. مرات توصلني طلبات اضافه على الايميل.. ادخل االرابط.. القاه رابط فيس بوك.. افتحه اجووف الصور.. و الشعر برى,, و الجسم استعراااض.. و مترصصه!! لا حول ولا قوة إلا بالله
ها بالنسبه للنت

بالنسبه للموبايل.. والله العظيم ولا أجذب عليكم.. طالبه من طالباتي قالت لي مره على المسن.. أبله ممكن تطرشي لي رصيد؟؟؟ انزين ليش ما تطلب من اهلها؟؟ ممكن أهلها مايدرون بالموبايل؟ ممكن انها تصرف رصيد وايد؟ و ممكن وايد اشياء الله اعلم..

انا صراحه عقب هذا كله.. ضد ان العيال كلهم سواء بنت او ولد يطلعون لهم تيلفونات.. لاحقين عليهن.. مش من زوود الاشغال .. إلا اذا بيكون مراااااااااااقب استخدامه مع الأهل..!!

وأخيرا.. طلعات البنات شلل مع بعضهن؟؟؟؟؟ وين ؟؟ رايحه المول ويا ربايعها.. انزين هالبنات لو تعرض لهن شاب ما يخاف ربه.. من بيوقف معاهن.؟؟؟؟؟ من بيرده عنهن؟؟
البنات يفضفضن لي مرات.. يقولن.. سرت السينما امس.. شفت فلانه..(وحده من ربعها) و شيلتها على جتوفها عادي.. ولاّ .. ابله انا يوم اسير المول و يا ربعي.. الشباب يقوولون جيه و جيه @_@

هاي بنت توها مراهقه!! كلمه توديها و كلمه تييبها.. ما تعرفون شو بيصير باجر..

والله يوم تيي وليّة امر تقووول ما رمت لها البنت فالبيت!! دخيلكم سوبها الي تسووه فيها! والله يعورني قلبي عليها.. ام ما تروم لبنتها؟؟

ادري اني طوّلت عليكم.. بس لو انتوا الأهل.. ما دريتوا .,, ولا وقفتوا للبنات.. من الي بيوقف؟ ايد وحده ما تصفق.. الأهوال قاعده تزيييد.. هذا الي ندري عنه.. غير الي ما ندري عنه ..

احتمال يكون مكان الموضوع غلط.. بس العلاقات العائليه.. انسب مكان حسيته لهالطرح

والسمووووووحه لو غثّيتكم بالكلام .. بس خاطريه ضاااااااااااايج والله على هالأجيال..

الله يرحمنا برحمته امييييييييييييين