انا اتدرب في مكان عشان مشروع التخرج ان شا الله و لا بعد مكان حريم ليش مسمينة حق الحريم ما اعرف .
الموقف الاول:
المهم من فترة انا كنت يالسه ووحده من الموظفات يالسه حذالي تعلميني الشغل و عاد هاليوم زجام و بلاعيم و حما يعني زين اني شايله عمري و سرت الدوام و انا احينة مندمجه في الكمبيوتر و يدخلي واحد شاد حيله و يقولي بالمصري ليه ما تضحكيش ؟ ترى التضك كويس. شوفتى التقرير اللي على ام بي سي في برنامج نواعم اللي يضحك يعيش اكثر . و عاد انا >.< شوي و خاطري اعطيه بكش و كمن هزبة بس طلع ريال عود قد الوالد و جان اشوفه بذيج النظرة و طاف طبعا و قلت بيني و بين عمري ما بحرق اعصابي عشان ناس ما تسوى و تخيلو كل الموظفات يضحكون و يرمس مع الثانية و جان يقولي اخر شي يبختو اللي بيضحك ^^ جان اسويله طااااااااااااف بس حسيته شوي و بيعطيني بكس . و الله انقهرت يعني انا ما تربيت اني اسولف و اضحك مع ريايل غرب و احينه و الله استوى عادي مع الناس يستغربون اذا ما رمستى مع ريايل .
الموقف الثاني :
وحده من الكستمر قالتلي ابا رقم الفاكس جان اقولها حاضر بي استريحي جان ترد على بطريقة غير مباشرة يعني السالفة مطولة بطريقة مووووووول مب حلوة و الله قلت بيني و بين نفسي و الله الشره مب عليج على انا اللي قلت حرام توها يايه من الشمس خليها تريح شوي. بس و الله شي بنات و حريم قمة في الذوق و الادب .
الموقف الثالث :
المهم بعد عيد الاضحى اختى سارت تتحنى جان اسير و اتحنى وياها لاني من زمان ما تحنيت .. بعد بكم يوم داومت في الكلية كانت يالسه مع ربيعاتي يالسين نعد و نرتب و جان يدخلون هالاستاذين واحد اجنبي و الثاني سوري . هو يالس يرمس و انا عاد مندمجه مع اللي في ايدي جان يقولي فلانة: قلتة نعم
انتي ليش متحنية انتي ملجتي ؟ جان ارد عليه و اقوله لا بس عشان العيد و طبعا و يهي احمر و جان الثاني سوري يقول عاااااادي اصلا انتي يوم بتعرسين بتحطين حنا و انتي ليش تستحين وايد؟ انا اول ما اشتغلت في الكلية كنت وايد استحي بس احينه شو فيني عااادي . بس و الله من هالكلام لا اراديا نشيت و طلعت برى بعد 5 دقايق رديت و طبعا ربيعاتي ميتين من الضحك على . و طبعا انا قافطة و مشيت عشان اخلص الشغل اللي بيدي لانه عليه درجات و هم من النوع اللي يحب يسولف بس انا ما احب اعطي مجال . اقول بيني و بين عمري انا ما تربيت جي . و عادي حتى البنات يسولفون يضحكون ولا يلسون على الدرج . شو ها على الدرج نحن وين يالسين ؟ قلنا عاد بس مب لهالدرجة . حتى مثلا يوم ابا اسير الكلاس و حد من الاساتذة جدامي , احترام حقه اني اخليه هو بالاول بس تصدقون شي بنات عادي ازين حاسبي شوي و بتدعمينه ؟
و الله حتى يوم انتي محترمه نفسج يحسسونج كانج يايه من كوكب فضائي
بس حبيت افضفض ^^
بالعكس لا تخلين حد يحبطــج
انتي ماشاء الله عليج مميزة نفسج بادبج وحشمتج واحترامج للغير
صح ان شي بعض البنات الله يهديهم نسو معاني هذي الصفــأت
بس انتي لا تتأثرين بحد دامج تسوين الصح ورب العالمين راضي عنج ,, فلا تحاتين
والمواقف صدقيني كلنا نمــر منها
لكن واثق الخطى يمشي ثابتا
عسى ربي يديمها فيج أخلاق طيبــة ^_^
والصبـــر مفتاح الفرج 
والله مااااااااااااااااااعرف شو اسوي وياهم كل واحد يمر ويعلق كل واحد ايي ويقولي قصة حياته جنهم يعرفوني من 20 سنه احاول اني ما اعطيهم مجال قد ما اقدر لكنهم ما يفهووووووون ويقولون انتي ليييييييش واااايد تستحين والله دوم ارد البيت متظاااااايجه حسبي الله عليهم ,,
ابي اوقفهم عندهم حدهم بس كيييييف؟؟؟؟؟
ترا إنتِ الصح .. أنا مثلج أعاني من هالمشكلة .. أنا بطبعي هادية في الجامعة .. دكاترتي كلهم يعرفون هالشي بس في نفس الوقت أنا من البنات المتوفقات والدكاترة يشهدون لي بهالشي ,, بس بعضهم من النوع اللي يسولفون ويضحكون ويا البنات ولا كأنه هو شخص غريب . .وكذا مرة يحاولون يسولفون وياي ويضحكون بس أنا طآآآف .. فعرفوا إني ما أحب هالسوالف .. فقاموا ما يضحكون وياي وآيد ..عسب ما يتقفطون .. فلا تسويلهم سالفة وخليج مثل ما انت وارفعي راسج ولا يهمج من حد .. إنتِ الصح وراسج لازم يتم مرفوع ,,
دمتِ بود عزيزتي ..
لان في بنات هالايام ما يخصهم فالاخلاق والتربية بس بعدها الدنيا بخير اتاكدي من هشي …