اشحالكم بنات؟ عساكم بخير ^^
الله يسلمكم.. انا الحمد الله بديت الماجستير بس ف تخصص غير تخصصي
(تخصصي صيدلة و احينه يالسه اسوي الماستر ف شي يخص البزنس)
المهم.. حاليا انا ف المرحلة اللي شرات الفاونديشن
و سرت حضرت الحصص و خلصت من سالفة الحضور
و احينه كل شي اون لاين
طبعا خلال اسبوع.. كل يوم كان عندنا مادة و عقبها الاستاذ يحطلنا شو لازم نسويله (أساينمنت.. بروجكت.. ع حسب)
لين هني اوكي؟
طبعا البروجتات مال قوم بو 2024 كلمة حق كل واحد
فتخيلوا عندكم 7 مواد تقريبا
و كل واحد شي بروجكت حقه او اساينمنت او شي
و انا بنت اشتغل و دوامي شفتات و مخبرة الجامعة من قبل
و خبرت الدكاترة بهالموضوع و كلهم تفهموا
بس قبل ما نبدا.. كانوا يقولون إنه هالبروجرام صعب
لانه لازم نخلص كل ها ف فترة قصيرة (تاريخ 7 – 2 الديد لاين لكل المواد)
و نحن اصلا بادين تاريخ (17 – 1) و عقب كل استاذ ع راحته قام يخلي الاساينمنتس
و قالوا اللي ما بيتحمل هالضغط ما ينفع يكون ف الماستر و هالكلام
اونه هذا امتحان حقكم إذا ترومون تكملون و لا لا
و اللي ما يروم من احينه مفروض يطلع
انا ما اقول إنه لا صعب و لا سهل
بس شي ف حياتج ما درستيه و قضيتي حياتج كلها تدرسين شي ثاني
هل معقولة من يوم واحد بتستوين خبيرة؟
و بتعرفين شو تكتبين ف البروجكت؟
المهم اللي خلاني اكتب هالموضوع
إني سلمت شي من البروجتات و قالي الاستاذ هذا مب مستوى ماستر و احتشر عليه
و انا رديت عليه بايميل طويل إنه نحن مضغوطين و قلتله إنه رمسنا المسؤولة
و انا دوامي شفتات.. يعني الضغط عليه اكثر من اي حد ثاني ف الكلاس
و قلتله بشوف لو اروم اعدله و اسلملك اياه قبل 7 – 2
بس اسلوبه كان وايد وقح الصراحة.. يعني انا درست ف التقنية 5 سنوات و نص
و ما شفت هالاسلوب من حد..!
و انا الحمد الله ما شاء الله شاطرة.. مب إني كسلانة
و متخرجة من البكالريوس بمعدل حلو
هو اصلا يوم عرف إني 23 احس إني ما دشيت راسه
لانه اللي ويايه وايد اكبر عني
و طبعا خبرتهم اكثر ف مجال الشغل
عقب رمست شخص.. و قالي ترا كل اللي ف الماستر جيه يقولون
يعني يبينون إنج ولا شي.. و ما تعرفين شي ف الدنيا
لانه اونج دراسات عليا و عقبه بدشين الدكتوراه
و حتى قالوله اول مادش الماستر إنه ما بيفلح و خله يظهر من احينه
بس هو تم و الحمد الله هو احينه باجيله كورس اظن و بيتخرج
فهل صدق كل اللي ف الماستر جيه يكونون؟
هل يحسسون الطلاب إنهم ما يعرفون شي و من الصوب الثاني يعطونهم درجات زينة
ابا اعرف حد مر عليه هالشي
ملاحظة: بنات انا مستخيرة الحمد الله و ارتحت للجامعة و لتخصص = )
سوري بس كنت منقهرة 
و نبا نغير تخصصنا عسب ننتقل من وظايفنا لانه كراف و ارف من سالفة الشفتات = )
فالبداية اكيد الموضوع صعب .. بس انتي قدها وقدود دام انج غامرتي ودخلتي
صلي استخاره وشوفي عمرج هل انتي مرتاحه ولا لاء
عسب تتخذين قرار
أنا بعدني مادخلت برنامج الماجستير بس من معلوماتي عنه من الناس إن كلهم أجمعوا على أن دكاترة الماجستير بنفس الطريقة ماشيين مع الطلاب إحباط و ضغوطات ..
وهم مايكون غرضهم من هالشي إنهم يخلون الطلبة يوقفون ومايكملون … ابدا .. ولكن مثل ما قلتي هو مجرد تحفيز ودافع ويبون يحسسونكم بأهمية الشهادة اللي انتي بتدرسين لها إنها مش دراسة جامعية عادية مثل الدبلوم او البكالوريوس .. وهذا هو المطلوب في دراسة الماجستير ..
إنتي يوم بتفكرين تاخذين الماجستير تفكرين تفكير عميق جدا ومليون مره قبل لا تبدين فيه ب التخصص اللي بتدرسينه لان هالشهادة بتحدد ملامح مستقبلج الوظيفي والمهني والعلمي الياي بشكل كبير .
يعني شدي حيلج عزيزتي … وبالعكس من بغى شي سعى له بكل السبل
واسمحيلي طولت عليج ….
الله يوفقج وتبشرينا بتخرجج إن شاءالله …
وعقبالي يارب ^^