أنا عندي عزيمة بعد يوميين … وأبى طريقة عيش ولحم .. والحشوة مهمة عندي لأنها من نظري من أساسيات العيش واللحم . ..
أبى طريقة يديدة غير اللي انا أسويها … أبى الفزعه منكم …
لا تبخلون علي في وصفاتكم … أبى كل اللي ياكل يوم العزيمة يمدح الأكل .. وبكون شاكرة لكم …
ويزاكم الله ألف خير ..
سلقي البيض و حمري البصل و خليه على صوب
وحمصي جميع أنواع المكسرات ( صنوبر . كاجو . زبيب …… )
وسلقي المشروم ( الفطر ) ينباع في قواطي
واقلي البطاطس الجاهز إلي في الاكياس ينباع في الجمعيه
خلطي جميع هالمكونات ما عدى البيض في جدر ونثريه على العيش
أما البيض غمسيه في ماي ورد منقوع فيه زعفران لمده دقيقتين عشان ياخذ اللون الأحمر وصفيه في الصينيه
ان شاااء الله تعيبج طريقتي
الحين بسم الله نبدأ
اللحم:
اول شي غسلي اللحم وحطيه في جدر فيه ماي وخليه يفور
وكل شوي شلي الرغوه او الزباد ما اعرف شو يسمونه شلي كل شوي جيكي على الجدر لانه يفور !
تاخدين بصل … اذا كان اللحم وايد تزيدين في مقادير البصل …والبصله الوحده تنصفينها من النص .. وتحطينه في الجدر مع اللحم
بعدين تحطين ملح ملعقتين >> اميه تستخدم الملاعق مال الشوربه لي يشابهن الملاعق الصينيه !! كبار هم شوي وفيهن قاع اكبر من ملعة الاقل بشوي
كركم ملعقه وحده صغيره
بهارات البرياني ( الفلفل الاسود .ورق الغار . والجرفه الحبه الصحيحه ..الخ ) وهو جاهز في الجمعية تلقينه .. نظفيه يعني تشغلينه من الوصخ اذا كان فيه !! تاخذين منه مقدار كميه بسيطه >> ع قوله اميه جنج تغفينه بديج ^_^
لين ما ينضى اللحم .. اظهرين تحطينه في الصينيه روحه ..
والماي مال اللحم لي مع البهارت لا اجبينه اعزليه في مله ثانيه
العيش:
(العيش المفروض يكون منظف ومغسول)
اتيبين نفس الجدر لي فورتي فيه اللحم لا تغسلينه .. حطي دهن ..
تحطين حبيتين طماط ..جنجلان ..شبت "كزبره" وفلفل اخضر بعد
وتحط 2 ماجي اذا العيش وايد
ملعقتين بزار
ونص ملعقه ملح
تشيطينهم كلهم
وخلاف .. خذي ماي اللحم لي عزلتيه في مله وضيفي على المقادير لي فوق
بعد ما يفور عندج
اشغلي العيش عن الماي وضيفيه للجدر
وبجي خلصنا من العيش خليه ينطبخ ع نار هاديه
الحشو:
محتايه تفورين نخي بروحه .. بس اذا كان معلب ما يحتاي تفورينه
تقطعين البصل صغار واااااايد جنه مفروم
تاخذين اللومي اليابس وظهرين الحبوب لي فيه وتقصينه من النص ويستخدم مع اليلاف ماله ..تقريبًا مقدار 4 حبات
تقلين الزبيب روحه وخليه على صوب
وتقلين المكسرات ايج مشكل (كازو صنوبر الخ ) بعد روحه
تفورين البيض كمن حبه ..وتيلفينه خلاف
وتقطعين البطاط شرائح بس شوي كبار هب رفاع ..وتقلينه روحه
الطريقه:
البصل تشيطينه في الدهن
ضيفي اللومي اليابس معاه
حطي ملح و الكركم شويه بس
اضيفين النخي
والمشروم الجاهز بس تقصينه من النص
وضيفين البزار
والماجي
وصلصلة الطماط .. اذا بغيتي احمر وايد تحطينه الكميه لي في العلبه كلها واذا تبينه شويه احمر تحطينه ملعقتين تقريبًا
اضيفين البطاط
اضيفين الزبيب للحشو
واخر شي حطي البيض لي سلقتيه قبل فوق الحشو وتغطينه الين ما يستوي الحشو عندج
هني نحط من الزعفران لي ودنتيه اول شي >> تحطين شويه فوق الحشو وشويه تغمسين فيه البيض المسلوق بس قبل ما تحطين البيض في الحشو عشان اللون
اللحم مره ثانيه
بعد ما تخلصين من الحشو .. تيبن اللحم وتقلينه شويه وانثري عليه شوية هيل مطحون
وقت الغرف
ملاحظه .. اضيفين من الزعفران لي ودنتيه فوق العيش بس ملاحظه قبل ما تبندين عن جدر العيش
وبعد ما يسكر العيش.. تغرفينه
وفوقه تحطين اللحم لي قليتيه مع الهيل
واخر شي الحشو
وبالعافيه عليكم
ولا تنسين الروب مع الخيار والسلط ^_^
الله يحفظها ويخليها هي لي يالسه تعطيني المقادير ^_^
