الام رافضه تزوج بنتها الكبيره والصغيره ؟؟

السلام عليكم ورحمه الله

ومبارك عليكم رمضان

الصراحه والامانه الامانه الموضوع مايخصني يخصني بنيه اعرفها وجريبه مني

البارح كانت ترمسني ب التفلون وكسرت خاطري من الصياح وانا كنت اصلي القبام وماعرفت ارد عليها عدل

قلت لها برد عليج عقب وللحين مارديت عليها .. واهي تعرف اني اشارك ف المنتدى واكتب ..

المهم

هذي اربيعتي عندها خوات ماشاء الله كلهن معرسات ماعدا البكر البنت وهي الصغيره تقريبا عمرها 22

البكر فهمت من اربيعتي انها ماعرست للحين لانها تبا تتزوج واحد مب اماراتي ( عماني ) واهلها رافضين الفكره ابدا ابدا وطبعا البنت عنست الحين ماشاء الله عمرها يمكن 30

والله امانه لو تشوفونها بتقولون هذي حيه والا ميته انا يوم رحت بيتهم قلت لربيعتي والله حنا ف الامارات هههههههه اختها هيكل عظمي من الهم والغم وماتضحك

وامانه انا بروحي اعرف ناس من فريجنا تجدمو لهالبنت بس اهي رافضه الفكره ماتبي غير الريال العماني

الله يهديها انا قلت لربيعتي اقروو عليها يمكن الريال مسوي شي ؟ والله مادري والصراحه مابدخل بتفاصيل اكثر لان البنت يوم نرمسها بالزواج من حد ثاني تصير مينونه وتعصب وتتخبل وتزاعج

وامها قالت لها ندفنج ولا تاخذين مب مواطن بس حالها يكسر الخاطر والله العظيم وانا ابي حل لهالبنت

لا وظيفه وجسمها يكسر الخاطر وكل يوم تشكي الحال انا لا سياره لا ثياب لا مصرف لا زوج وانتو بنات وتعرفون

العله الثانيه الحين ف اربيعتي اللي اهي اختها >> طلعنا ف الاخت يينا ع الاخت الثانيه ع قولت امها

ختها الصغيره اللي اهي اربيعتي عمرها 22 تبا تتزوج واحد امه هنديه ومواطن وصدقوني مايعيبه شي واربيعتها تبي تزوجها لاخوها وانا قلت لها اوكي شوفيها امها رافضه تقول الريال امه مطلقه ومب مواطنه وانتي بعدج تدرسين

الصراحه انا هني شفت ان العله هب عله الريااييل عله امهم لان وايد بنات ينخطبن من ريااييل امهاتهم مصريات او ابوهم متوفي او مطلق ف اربيعتي البارح متصله وتقول اكره امي تخيلو

الله كريم ماعرفت شرد عليها حاولت ارمس امها بس امها مال اول تعرفون عاد كيف

شو الحل ؟ افيدوني جزاكم الله خير

لـآ حول ولـآ قوة آلـآ بآلله

مآدري شو آقول لج ><

آلله يرزقهن بآلزوج آلصآآلح يآآرب ..وخلهآ تكثر بآلدعآء ف شهر آلفضيل ^^

وآلله يهدي آمهآآ يآآرب ..~

الله المستعاان00عزيزتي المشكله ان الام متحكمة بمصير بناتهااا

وين ابوهن وليش مااله دور بالموضوع ؟

وأصل الانساان ماا يشكل عيب او مشكله لكن امهن تفكر ليداام 00يعني حااسبه

حسااب المستقبل وعياالهن ومصيرهم 0

لكن في ديناا الاسلاامي لاازم البنت تشااور ع المعرس الي نتقدم لهاااا

والدنياا مااا تنخذ بالعصبيه بالعكس لازم يكون هناك حواار بين الاهل وبنااتهم بهالمواضيع0

من رايي ان البنات يتفاهمن مع الوالد والوالدة وكل وااحد فيهم يوضح وجهه نظره

وبالاقنااع يكون الرفض أو الموافقه 0

الله ايسر امورهن ويرزقهن الزوج الصاالح ياارب

مصطلح العنوسه اندثر >>> الحين كل البنات يتزوجوا حتى لو فوق الـ 40 عادي خلاص انسوا هالمصطلح

بالنسبه للبنت العوده خل يشوفها مطوع ويقرا عليها وخل ياخذونها بالسياسه عشان تتخلص من إلي هي فيه

بالنسبه لـ ربيعتج 22 سنه بعدها مب مخلصه دراسه الواحد الحين لازم يضمن مستقبله بشهاده ووظيفه الدنيا ما منها امان

والام من حقها تختار الافضل لبناتها واكيد هي تشوف شي البنات مب شايفينه وطبعا الام ما بتسوي شي الا في مصلحة بناتها

وصي ربيعتج وقولي لها عليج بالدعاء في الشهر الفضيل

والله يرزقهم الازواج الصالحين

تسلمون ع المرور والمشاركه

الله ييسر امورهن ويرزقهن الازواج الصالحه …