الاردن

اليوم الأول
– بعد الوصول والراحة في مكان السكن ولنفترض ان الوقت الان هو وقت غداء فسنذهب للبحث عن طعام
افضل المطاعم لغداء جميل في مكان جميل ومميز وساورد مطاعم في شارع الجاردنز حيث انه شارع معروف وسهل الوصول اليه
– جبري المركزي يقع في منتصف شارع الجاردنز واسأل اي شخص سيدلك عليه، يوجد قسمين في جبري ، قسم مطعم بوفيه فاخر اسمه ارض الديار وقسم مطعم عادي بالطلبات القسم العادي هو على الشارع الرئيسي.
– مطعم ريم البوادي مطعم مشهور ويقع في شارع الجاردنز قرب دوار اليوبيل وهو مطعم لديه كل انواع الوجبات واراجيل وجلسته رائعة
– مطعم طواحين الهوى ويقع بعد دوار اليوبيل مقابل عمان مول.
– مطعم قصر الضيافة وهو مطعم يقع في شارع المدينة المنورة وانت قادم من شارع الجامعة وبقربه حلويات عرفات الشهير.
– – مطعم المنقل للدجاج المشوي على الفحم ، مطعم رائع جدا وسعره ممتاز وصحي 100% .
بعد الغداء اذا اردتم العودة للراحة فريحو شوي ونامو نهار عمان طويل ، اذا بدكم تكملو المشور يلا بينا يلا بنكمل.
من شارع الجاردنز روحو على المول الشهير مكة مول واذا كان معكم نفيجاشن موضعكم سهل واذا ما معكم استعملو النفيجاشين اليدوي اسألو اي حدا من الشباب الطيبة في المطعم الي اكلتو في وبدلوكم ، وعمان ما بتضيع بس شوي كبيرة ما تخافو ما بتضيعو ان شاء الله.

المهم اذا وصلتو مكة مول اذا معكم ولاد صغار في كثير العاب تلعبوهم فيهم وفي بولينج للكبار وفي نادي رياضي بس ناسي باليوم كم.
اتمشو واتسلو في مكة مول حتى تزهقو، بس لا تتعشوا في عشان نعشيكم عشا تقليدي أردني حمص فول وقصص طرمة
بس تزهقو من اللف وتتعبو ، ارجعو على شارع الجاردنز اكيد اعرفتو الطريق واذا ما اعرفتو اسألو كلو بدلكم، اهم اشي ديرو بالكم في السواقة يعني المسا بتصير عمان ازمة كثير والكل بفيع والبلد ملاينة فديرو بالكم اول ما توصلو شارع الجاردنز دورو على اسماء هاي المطاعم
-حمادة
– ابو جبارة الي في الجاردنز مش ابو جبارة الكبير الي في شارع المدينة المنورة ماشي
– الكلحة ( الكلحة الي بكون على يمينكم وبكون قبلو جسر وبكون في نفس السايد تاع مطعم الطازج.
بس توصولو اي مطعم منهم جربو السندويشات كلو سندويشات لانكم راح تزهقو الحمص في عمان خذو سندويشات وخلي الولاد يوكلو في السيارة مش غلط بتغيرو جو.
واذا مش حابين في السيارة كلو في مطعم الكلحة لأنو الوحيد بينهم الي قعدتو حلوة وواسعة، ابوجبارة الي في الجاردنز ما في قعدة.
المهم اذا فيكم حيل لسا ممكن تعطوها شيشة – الشيشة مضرة بالصحة ها- او اذا بدكم روحو الولاد على البيت واطلعو طشو انتو لحكالكم بدون الولاد _لئامة- بس الواحد بطلعلو لحالو شوي.
جيبو معكم بلاس ستيشن خلي الولاد ينلهو.
ممكن اذا بدكم توخذو لفة بشوارع عمان عشان تتعرفو عليها وتحضرو حالكم ليوم جديد.
 
اليوم الثاني-

طبعا بعد سندويشات الفلافل الي اكلتوها اكيد مش جاي على بالكم تفطرو لانكم شبعانين، وبقترح عليكم تصحو بكير ودقو سلف السيارة وعبوها بنزين وخذو بطريقكم مية وشوكلاتة وشيبس واسحبو حالكم على جرش في كثير يافطات بتلاقوها مكتوب عليها جرش وكل ما اطلعتو ابكر بتخف الشمس عليكم، المهم امشو بدها جرش ابو ساعة من عمان مع الازمة وبس توصلوا جرش أسألو عن اثار جرش اذا ما بتحبو الاثار لا تروحو ، يعني هيا كلها عمدان وهيك اشياء وفي بازار صغير قدامهم في محلات ، ما بنصحكم تشترو من هناك الا اذا بتفاصلو مليح.
المهم في دفع مصاري تذاكر حوالي دينار او نصف دينار وبتدفعو نفس تذكرة الاردني، ولا تنسو تيجيو قناني مي معاكم من عمان او من اي دكانه على الطريق، لأنو سعر زجاجة الماء غالي هناك يعني ابو دينار بدل 30 قرش وانتو اولى بمصاريكم، المهم مش غلط تتمشو وتتصورو بين العمدان، وفي جرش خلو التذاكر معكم، في متحف صغير شوفو برضو اذا جاي على بالكم.
طبعا طول الطريق لجرش راح تلاقو بسطات خضار وفواكه اشترو بس فاصلو.
بس تخلصو الاثار ممكن تسألو الناس وين محمية الغزلان في ساكب و بدلوكم، واذا شفت انو الجوع اكلكم ممكن تروحو توكلو في واحد من مطعم جرش وبتذكر واحد حلو ومرتب اسمو البيت اللبناني اكلو زاكي وقعدتو حلوة.
بعد ما توكلوا اذا حابين تروحو على المحمية روحو اذا مش حابين اعطوها ترويحة لعمان. بس توصلو عمان اعطوها شاور ونومة عصورنية

بس تصحصحو من النومة ، اذا كثر تعبانين لسا من المشي ما الكم الا تحضرو فيلم كوميدي عائلي منو بتتسلو وبتريحو في كذا سينما في عمان بس ممكن تروحو على البركة مول في الصويفية.
اذا ما بتحبو السينما وحاسين فيكم نشاط انطلقوا لمدينة الجبيهة للالعاب الترفيهة ويفضل تروحولها في يوم يكون الشعب في مداوم يعني ما تروحو خميس او جمعة او سبت بتكون ازمة.
بعد ما توصولوا وتلعبو وتخلصو ، اذا جوعتو وجاي على بالكم شاورما انزلو عند البوابة الشمالية للجامعة واسألو عن مطعم الضيعة وخذو شاورما عربي او سندويشات ، شوي وجباتهم صغير فاعملو حسابكم تزيدو الوجبات عن عدد الاشخاص عشان ما حدا يكون جوعان.
وبعدين اعطوها ترويحة.

بخصوص الجماعة الي راحو على السينما وريحو ممكن تروحو بعدين على الصويفية تتمشو في شارع الوكالات وتتسلو ، واذا حابين اسألو عن كلاج عمر وخذو منو حلو، اشي غير الكنافة.
 
اليوم الثالث:
يعني اي نعم الواحد في اجازة بس مش غلط يصحى بكير ويستمع بالطش بكير ، اليوم اذا صحيتو على الساعة 8 او 9 الصبح مليح ، غسلو والبسو اشياء مناسبة للمشي ، لبس خفيف ولطيف وبتحمل دعك، وما تفطرو بدنا نفطركم فطور مرتب وخفيف لطيف عشان تتغدو اشي دسم ، اسحبو حالكم وروحو على وسط البلد – والطريق لوسط البلد سهلة وسلسة يعني خلينا نحكي انكم صرتو تعرفو الجامعة الأردنية بدنا اياكم توصلو الجامعة الأردنية وتخلوها على شمالكم وبتظلكم ماشيين في هذا الشارع دغري – سيدا- شو ما اجاكم طريق امشو ستريت راح يجيكم نفق – اسمو نفق الصحافة- وانزلو من تحت هذا النفق وتابعو طريقكم دغري وبعدين بيجي جسر وتحتو دوار – هذا اسمو دوار المدينة الرياضية- اطلعو من فوق الجسر وخليكم سيدا، وامشو راح يجي كمان جسر وتحتو دوار كبير –اسمو دوار الداخلية- بس تطلعو هذا الجسر خليكم على اليمين – ما تروحو سيدا على الجسر الثاني روحو يمين – بتيجيكم اشارة خليكم متابعين دغري- بكون على يمينكم مبنى كبير كلو جيش من برة والشارع بكون ون وي طبعا مقابل الجيش في عمارات فيها مكاتب سفريات وباصات وفي مكتب جت "اتذكرو اسمو ومكانو عشان راح نحتاجو" ، المهم ظلكم ماشيين دغري واطلعو على يساركم راح تلاقو ساحة كبيرة– مجمع العبدلي سابقا- وراح تكون فاضية برضو خليكم دغري ، بعد هاي الساحة راح تمشو شوي وبس تيجكم اشارة مرور بعد الاشارة مباشرة وقفو على اليمين وانزل يا سيدي خليك تفطر فطور غير شكل، اسأل عن مخبز صلاح الدين ، واذا حظك حلو بتلاقي بخبز قدامك، بتوخذ كمن كعكة وبتحط فيهم زعتر – وجبنة مثلثات- وبيض- مش كلو مع بعض حط زي ما بدك، وفي مطعم لقدام شوي ببيع فلافل خلي معك كم كعكه فاضية وحط فيهم فلافل وبتلاقي كمان قهاوي صغير بتبيع شاي اذا حاب تشرب، وجرب هالفطور وادعيلي.
وما احلى البساطة.

بعد ما تفطر كمل طريقك راح ييجي جسر صغير وبعدو نفق ، لا تطلع على الجسر ولا تروح صوب النفق، قبل النفق والجسر خليك على اليمين وامشي بتكون وصلت وسط البلد، ومباشرة ظلك اطلع على اليمين حتى تلاقي مجمع مكتوب على مجمع الفحيص وفي تحتو محلات – ومكتوب عليه مواقف سيارات- صف سيارتك في وانزل اتمشى في وسط البلد، طبعا هو هذا مبنى باركنغ سيارات، مش متذكر الساعة بنصف دينار او اكثر او اقل، عموما احسن ما توكل مخالفة او ما تلاقي محل تصف، وخلي كرت الموقف في سيارتك وبس تروح بالسلامة بحاسبوك الشباب الطيبة.
راح تلاقي ناس بغسلو سيارات، اذا حاب يغسلو سيارتك من برة خليهم يغسلوها، الغسيل بدينار وبتدفع بس ترجع.
في وسط البلد بتلاقي محلات ملابس واحذية ودكاكين ومطاعم ،أسأل عن مطعم هاشم عشان تصورو وتعرف مكان لتفطر في يوم ثان، وأسال عن قهوة ومطعم "جفرا" من افضل الاماكن للجلوس العائلي في وسط البلد. واذا لم تكن من محبي الشيشة يمكنك ان تتغدى عندهم فقط .
المقاهي الاخرى القديمة من الخمسينيات مثل بلاط الرشيد وكوكب الشرق كلها تصلح للشباب اكثر من العائلات.
تمشى للبنك العربي القديم واحفظ وين موقع حبيبة في الزقة وشوف الناس كيف بتوكل كنافة على الواقف، وبعد شوي بجيك سوق الذهب، ومجمع الشابسوغ في كثير محلات ذهب، بس الذهب غالي احكي للمدام بنشتري بس نروح.
ووادخلو سوق البخارية القديم الحديث، ببيبعو مطرزات واثواب تقليدية، ودائما دائما فاصلو في اي سعر نزل من 25-35% من السعر .
وفي محل اسمو "كابتيلو" اذا بتحب تشتري بهارات او فريكة ناشفة او حلقوم او من سلوى. واذا ما بتحب تشتري خذ فكرة عن الاسعار
واذا ما بدك تشتري من هذا "الكابتيلو" انا بدلك على محل ثان ارتب في شارع المدينة المنورة بدلكم عليه في يوم أخر
المهم روحو عند الجامع الحسيني الي صار قريب عليكم ولو سألتو اي حدا بدلكم عليه، صورو مكان الوضوء الخارجي ، واذا بتحب الكتب الدينية العلمية الثقافية القانونية في ملاصق للجامع مبنى صغير كلو مكتبات بتبيع كتب.
اذا اتعبتو من المشي خذ عصير من المحل الي قبال الجامع الحسيني، واذا اتعبت كثير من المشي وقف تكسي وخلي يوديكم على الساحة الهاشمية والمدرج الروماني وحتى لو ازمة شوي ريح حالك وانبسط واتطلع.
نصيحة اذا بدك تركب تكسي لا توخذو من قدام المسجد الحسيني ، اسأل عن سبيل الحوريات امشي لهناك واقطع الشارع وخذ تكسي من هناك اقربلك واسهلك.
خلي ينزلكم عند المدرج الروماني وشوفو المدرج واتمشو في الساحة.
وبس تخلص ارجع بتكسي على مطعم القدس.
لا تنسو اي اشي في التكسي – اول ما تطلع اتأكد انو شغل العداد-

طبعا اذا ما بتحب تركب تكاسي وقرفان من المشي وخلصت من اللف والشراء صار وقت الغدا وما بدك تروح للمدرج الروماني والساحة الهاشمية نفس الاشي خلي وجهتك مطعم القدس ، وارجع بطريقك كأنك رايح لسيارتك وأسال عن مطعم القدس ، واكيد بتكون لمحتو وانتا بتتمشى بعد ما صفيت السيارة.
ادخل المطعم – هو مطعم شعبي بس نظيف واكلو زاكي، يعني ما تحكم على المطعم من شكلو، المهم في صالة فوق للعائلات وممكن تقعد تحت الي بريحك، اطلب شو ما بدك وجبات ، فريكة- منسف- مقلوبة- بامية- فاصوليا- بس انا بنصحك بالمنسف والفريكة والصرر، وبعد ما توكل لا تنسى تطلب تحلاية صحون كريم كراميل في العادة بنزلولك اياهم ضيافة ومش غلط تعطي بقشيش اذا عجبتك التحلاية.
بعد المنسف والدسم والتحلاية ظلك طالع على سيارتك واعطيها ترويحة للتريح والرفرشمنت.
نصيحة نصيحة دير بالك على محفظتك ومصاريك وموبايلك في وسط البلد- اتحاشي المشي في الازمة- لاتطلع فلوسك كلها اذا بدك تشتري-انتبه لعدد الفلوس الي برجعلك- انتبه على اولادك.
صليت واتحممت ونمت ولقيت العصر اذن صلي وانوي على حدائق الحسين- وبتلاقيها في شارع المدينة الطبية- في كذا طريق الها – اذا سألت ودلوك الناس هيك وصلت، واذا معك النوفي ولا الجارمن بتوصل على خير.
اسهل طريق ادلك عليها اوصل شارع الجاردنز من جهة الجامعة مثلا وبس توصل دوار اليوبيل امشي كأنك رايح على مطعم ريم البوادي وما توقف عندو لانك ما صارلك زمان متغدي.
وظلك ماشي في الشارع دغري سيدا- وراح تشوف جسر كبير ما تطلع من فوق الجسر ، لأ انزل من تحت الجسر وخذ الدوار راح تشوف كازية قدامك اننا بدك تروح يسار، يعني لف الدور نص لفة وروح يسار، وامشي ستريت بعد شوي على اليمين راح تبين معك الحدائق – الدخول مجانا- واذا كنت هناك قبل السبعة وما كان يوم ثلاثاء روح على متحف السيارات الملكي –شوف السيارات الملكية، وبس تخلص اتمشى في الحديقة وبس تتعب روح على كافية الحديقة اقعد اشرب عصير او شيشة او قهوة واتمتع بالهويات الحلوين.
بس اتخلص من الحدائق روح على شارع الوكالات في الصويفية او روح على السيتي مول- او روح على الشميساني اتعرف عليها وكزدر فيها بسيارتك.
او لفلف بالسيارة وين ما رجلك توديك ما بتضيع في عمان، بس لفلف جوا عمان مش براها.
 
اليوم الرابع

ما في مشكلة مبارح اصحيتو بكير واتعبتو وانتو بتمشو ، اليوم يلا سماح نامو لل10 او 11 مش مشكلة ، اليوم خلينا بأماكن قريبة عليكم مش غلط يعني .
بدنا اياكم تروحو على الشميساني المفروض انكم يعني مرقتو فيها في الايام السابقة ، المهم اذا ما مرقتو فيها خليكم تروحو عليها وتفطرو في مطعم بجنن وقعدتو حلوة واكلاتو زاكيين كثير، بتطلع من بيتكم وبتوصلو دوار المدينة الرياضية وطبعا انا دايما بفترض انكم بتيجو من جهة الجامعة الأردنية يعني بدي الجامعة تكون على شمالكم وانتو سايقين .
المهم بس تقربو على دوار المدينة ما تطلعو على الجسر كأنكم رايحين على وسط البلد ، لأ ادخلو الدوار ومباشرة خذو يمينكم يعني بس تشوفو الجسر خذو اقصى اليمين وبس توصلو الدوار مباشرة ادخلو يمين ولا تقطعو الدوار، بعدين ظلكم ماشيين دغري بتجيكيم اشارة بدي اياكم تروحو يسار في هاي الاشارة- وانتو واقفين على الاشارة بكون اسواق السلطان على يساركم ، واذا بتطلعو على اليمين بتعرفو انو هذا شارع الجاردنز – المهم الاشارة شوي ازمة بس عادي المهم خذو يساركم وامشو في هذا الشارع الي دخلتو خليكم دغري بتيجكم اشارة ظلكم دغري راح تشوفو شركة مكتوب عليها القدس للتامين على يمينكم كمان ظلكم ماشيين دغري وامشو كمان شوي بتشوفو على يساركم سنتر اسمو فود سيتي ( زي كارفور- اذا محتاجين اشياء للبيت ممكن تشترو منو) المهم امشو كمان دغري بس توصلو وتشوفو قربتو على مبنى كبير اسمو بنك الاردن خذو يساركم وراح يكون الشارع شوي ازمة – على اليسار قبل ما تدخلو الشارع الصغير راح تشوفو زلاطيمو وصيدلية المهم ادخلو الشارع وخليكم على اليمين اول شارع على اليمين ادخلو وخليكم يسار وبمجرد ما تدخلو يسار راح تشوفو على يمينكم لبناني سناك في باركنغ ورا المطعم بدينار الساعة (هيك الاسعار في الشميساني غلاية بس احسن من مخالفة ) صفو في مش غلط اريحلكم.
وانزلو افطرو عندو سندويشات مع كوكتيل روعة والمنيو تاعتهم بتجنن ، واسعارو معقولة . والقعدة حلوة اقعدو في اعلى طابق من القعد الخارجية فيها شجر وشلالات وصوت مية حلوة. وصحة وهنا
بس تخلصو اكل خلو سيارتكم وانزلو اتمشو في الشميساني راح تلاقو مطاعم وكافيهات بالهبل وهذا الشارع في الليل كلو بكون مليان، امشو لشارع الثقافة واقعدو اتسلو بمعرض الصور والاكشاك.
بعد ما تخلصو بكون اذن الظهر اذا بدكم تصلو ارجعو بطريقكم لعند الفود سيتي في مقابلها مبنى كبير اسمو النقابات المهنية ممكن تصلو في المصلى تاعو او في مسجد خلف مبنى النقابات صلو في.
مش غلط تدخلو مبنى النقابات المهنية وفي باركنج جوا بتصف بنص دينار ، في مرات بكون في معارض صور ومرات بازارات ، وفي بتلاقو بيانات النقابات في الشؤون الرسمية معلقة، واذا بدكم تسبحو في جوا مسبح مغطة ومسكر ومش مختلط طبعا وفي ايام رجال وايام نساء السعر دينار او دينار ونص للشخص اشي مثل هيك.
عموما بعد هالرحلة للفطور لسا نشيطين انتو بقترح عليكم تروحو على جبل الحسين تتمشو وتتعرفو عليه وتشوفو يعني يمكن شوي حر الدنيا بس مش غلط يعني ممكن تمشو، وجبل الحسين هو عبارة عن مجمعات ومحلات تجارية وشارع طويل جدا هو وشوارع متفرعة ، وفي كل انواع المحلات ودائما يا اخوان فاصلو في السعر فاصلو فاصلو فاصلو يعني لا تشترو مباشرة ، وعادي اطلعو من المحل اذا ما عجبكم السعر وراح يرجع ينادي عليكم .
عشان تروحو للحسين من الشميساني بدي اياكم توصلو دوار الداخلية ومن هناك بتطلعو الجسر الي نزلتو في على وسط البلد بس هاي المرة بتظلكم دغري وما بتروحو يمين ، وبس تنزلو بعد الجسر بتكونو وصلو سوق جبل الحسين ، امشو لقدام واذا لقيتو مجمع عادل القاسم على يمينكم ممكن تصفو سيارتكم المهم دورو على صفة وانزلو اتشمو في الحسين، راح تتعبو من اللف لأنو كبير.
ملاحظة مهمة جدا جدا طبعا في طرق كثير اسهل واقرب من من هاي للوصول من الشيمساني لجبل الحسين بس صعب اشرحها لانو راح توهو يمكن لأنو فيها زقق كثير ودخلات وفي جسر لسا ببنو في وكل مرة بغيرو الطريق، عموما ممكن تسألو وانتو في الشميساني كيف نوصل جبل الحسين وراح يدلوكم الناس، الطريقة الأولى هي الطريقة العامة والتي يمكن استخدامها دائما. وممكن تلاقو كثير يافطات مكتوب عليها جبل الحسين.

المهم بعد ما خلصتو جبل الحسين بدكم تروحو بدكم تلفو وترجعو تطللعو من فوق الجسر وتتسهلو على بيتكم تريحو تتحممو وتعملو رفرش.
اذا جوعتو في جبل الحسين عندكم كثير خيارات للأكل
ممكن تسلكو وتجربو سندويشات مطعم جواد – ورنوش للكوتيل والسندويش- وبوظة الكيلاني عصير وبوظة
ممكن توكلو في مطعم غيث ومطعم المنقل ومطعم اجواد – وانا بفضل غيث عندو تنوع رهيب
وفي شاورما الكرم والضيعة
مليان مطاعم الحسين .

عموما انا بنصحكم ما تتغدو غدا دسم عشان نعشيكم عشاء محرز وحلو وما راح تنسو . سلكو حالكم بسندويشات وخلو الاكل الدسم للمساء.

هسا صحصحتو وصليتو العصر ونمتو وقمتو جوعانين ، يلا بينا يلا على مشاوي عمان الي في الدوار الثامن ، بما انكم صرتو تعرفو طريق حدائق الحسين – ومكة مول وستي مول وصعكم صار سهل، المهم اوصلو مجمع جبر في شارع مكة وانزلو في الشارع المكتوب عليه عبدالله غوشة الشارع الي في الماكدونالدز ومقابلو مطاعم كثير مثل شاورما الريم وشاروما الكرم وشاورما الغزال. ظلكم ماشيين دغري في هذا الشارع وبيجكم نفق و دوار اسمو الدوار السابع، لا تدخلو النفق وروحو من فوق وما تدخلو الدورا خذو اول يمين من الدوار وامشو دغري راح يجيكم دوار اسمو الدوارا لثامن وفوقو جسر لفو الدوار لفة كاملة واول دخلة يمين بعد ما ترجعو ادخلوها.
وخيار أخر انزلو من تحت النفق واول يمين بعد النفق ادخلو فيها وأسالو اي حدا عن مطعم عمان بدلكم عليه. ( المنطقة المقابلة الكم صارت الصويفية)
وومكن كمان تروحو من حدائق الحسين ، خلو الحدائق على يمينكم وظلكم ماشيين دغري وبس تشوفو جسر كبير ( زي جسر دوار الداخلية والمدينة الرياضية) انزلو من تحت الجسر ولفو الدوار وادخلو يسار ومجرد ما تدخلو يسار امشو شوي واول دخلة على اليمين بعد ادخلوها بتوصلكم للمطعم ويمكن تكونو شفتو وبين معكم.

المهم بس توصلو كلو مشاوي وانبسطو والي بشيش يشيش ، بعد ما تخلصو اذا حابين تتمشو في الحدائق روحو على الحدائق ، حابين تحضرو سينما روحو على مكة مول او سيتي مول او البركة مول .
وتصبحون على خير ليوم جديد في ربوع عمان

 
اليوم الخامس

اليوم خلينا نروح على اربد ، وشوي الطريق بعيد من عمان يعني بدكم حوالي ساعة ونص تقريبا، بما انكم ما بتعرفو الطريق وشوي الطريق ممكن تكون ازمة المهم توكلو على الله وفللو السيارة بنزين، وحضرو زجاجات الماء وانطلقو-وخلو معكم جلن ماء للغسيل مليان.
مش ناسي الفطور ما يهمكم انتو بس اتوكلو على ربنا.
اربد تقع في شمال الأردن وهي من المحافظات الكبيرة وتمتاز بالقرى يعني مدينة اربد 3/4 قرى ، وبس فتحت فيها جامعة اليرموك انتعشت اربد وصار من اشهر مناطقها منطقة الجامعة وشارع الجامعة الشهير.
مدينة اربد مدينة سهليه ومن اشهر مواقعها الاثرية ام قيس والحمة السياحية (وهي نبع مياه معدنية مثل ماعين ولكن على اصغر) ومنطقة الباقورة الشهيرة، وهي تطل على الاراضي الفلسطينية المغتصبة واقرب نقطة للجولان المحتل، وهي موقع عسكري ولكن يمكن الدخول له وهي تقع في الاغوار الشمالية.
عموما نعود لاربد وكيف التوجه اليها، يوجد طريقين لاربد الطريق القديم وهو عن طريق الوصول لصويلح ومن لحاق اليافطات المكتوب عليها جرش- اربد وهو طريق قديم ( وليس قديم بشوارعه) وهو قديم كونه هناك شارع جديد يسمى شارع الاردن وهو مشروع عملاق ربط عمان بشمال الأردن بطريق واسعة وكبيرة ، وللراغبين في الذهاب عن طريق شارع الاردن ما عليهم سوى الوصول لمنطقة الجبيهة عند التعليم العالي وسيجدون شارع كبير ويوجد العديد من اليافطات عليه تدل على الطريق لاربد.
عموما الطريق لاربد لن تتوه ومجرد ما سيرتم على اي من الطريقين ستجدون يافطات كثيرة تدلكم على اربد، عموما انا من محبي الطريق القديم حيث أنه يذكرني بأيام الدراسة في اليرموك، سنفترض اننا قادمين من الجبيهة وسنصل صويلح وقبل الدخول الدوار ستجد علي يمينك شارع منحدر ويوجد العديد من الناس ينتظرون الباصات وستجد باصات واقفة على اليمين انزل من هذا الشارع واتخذه خليللا ، سيكون هذا الشارع في انحدار وستمشي فيه ، هذا الشارع يؤدى الي مناطق عديدة مثل صافوط وستجدون كنيسة على يساركم بعد أن تمشو 7 دقائق من الدوار، والرجاء عدم السرعة اولا حفاظا على سلامتكم وثانيا حفاظا على سلامة نقودكم حيث ان الشارع يوجد فيه العديد من الرادرات، وانتبهو لا يوجد في الاردن سرعة زيادة مسموح بها، يعني اذا السرعة 100 يجب ان تمشو 100 وليس 110 او 120.
وهذا الشارع يصل لمخيم البقعة وستجدونه على يمينكم بعد 10 دقائق من الكنيسة وهو مخيم للاجئين الفلسطنيين وقد تم فصل المخيم عن الشارع الرئيسي فلن تكون واضحة معالمه كثيرا.
عموما ستواصلون السير في الطريق الرئيسي ولا تنحرفو عنه – اه صح من اتبع الجدول وذهب لجرش في اليوم الثاني سعرف طريق اربد بسهولة.
المهم اتبعو الاشارات واستمرو في السير وتمتعو بالطبيعة ، ستجدون العديد من البسطات لبيع الخضار والفواكه ولهذا طلبت منكم احضار جلن مياه للغسيل اذا عجيكم شيء كلوه واستمتعو، انصحكم بالابتعاد عن شراء الرمان من ذوي البكمات لان بعض الناس ممن لا يخافون الله يصبغون الرمان باللون الاحمر لكي يغشو الناس ولذلك ابتعدو عن الرمان.
ودائما فاصلو في السعر، المهم تبعد جرش 80 كيلو عن عمان ومن صويلح حوالي 75 كيلو ، ستصلون لمنطقة اسمها النعيمة وهنا انتبهو جدا لا تستمرو بالسير بخط مستقيم عند الجسر ، بل يجب أن تأخذو يساركم ، سيكون هناك يافطات ولكن انتبهو لهذا الموضوع .
انصحكم ايضا بالخروج مبكرا من المنزل في هذا اليوم حيث أن ام قيس تبعد عن اربد حوالي 30-35 كيلو وهي تقع في جبل وستحتاج وقت للوصول اليها.
المهم بعد هذا الجسر ستمشون وتتابعون وستصلون منطقة تدعى الحصن وهي منطقة من مناطق اربد، وعشان الفطور ستجدون العديد من المطاعم للحمص والفول والسندويشات ونصيحتي لكم أن تجد مخبز وتشترو منه خبز شراك او طابون سخن وتستتمعو بأكل الخبز الطازج مع حبات فلافل وايضا يوجد العديد من محلات الالبان واللبنة الطازجة يمكن عمل سندويشات سريعة في السيارة والاستمتاع بالتغيير.
احضرو معكم معالق بلاستيكة وسكاكين وكاسات وصحون الاستمتاع بالتغيير والخروج عن الروتين جميل جدا.
ولمن لا يحب ذلك يمكن ان تشترو سندويشات وتسلكو حالكم، المهم لا نريد منكم التوجه مباشرة لام قيس بل نرغب منكم الوصول لمنطقة جامعة اليرموك وبوابة الاقتصاد وستجدون العديد من المطاعم ومن اكثر المطاعم تنوعا هو مطعم الضيعة الخضراء, تبعد جامعة اليرموك عن الحصن حوالي 15 دقيقة، وعند الوصول لجامعة اليرموك- بوابة الاقتصاد يمكنكم الافطار هناك في مطعم يسمى رياشي وعمورة – ابودريد- وهو من افضل مطاعم المعجنات وبشكل خيالي لذيذ ، اسألو عن ولن تندمو وخذو من فلافله الرائع. في هذا الشارع ستندهشون لكثرة المطاعم فهي لخدمة طلاب الجامعة، يوجد محلات فلافل تعمل فلافل على الصاج وهو لذيذ جدا- مطعم الضيعة يعملها- ومطعم عربي شرقي- واغلب المطاعم.
ابو دريد يعمل فلافل عادي.
عموما اذا اردتم السير في هذا الشارع يمكنكم التمشي.
بعد الافطار توجهو لام قيس وأسألو اي شخص سيساعدكم ان شاء الله- صح يوجد مدينة ملاهي مصغرة في اربد قرب الجامعة.
المهم ام قيس تحتاج حوالي 30-40 دقيقة من اربد ومن الممكن ساعة فلا تزهقو او تملو وخذو حذركم في السواقة فقد تواجهون شوارع ضيقة وصغيرة وغير معبدة 100% .
عند الوصول لام قيس ستنسون كل الرحلة الطويلة من جمال المنظر.
ام قيس منطقة قديمة جدا واصلها روماني وهي مطله على الجولان وفلسطين وبحيرة طبريا ، طبيعتها جميلة جدا ويوجد فيها اثار وقلعة صغيرة ، يوجد مطعم في بيت روماني قديم وقد نسيت اسمه للاسف يمكنكم التجول والجلوس فيه واذا اردتم الغداء فتغدو فيه ،له اطلاله رائعة.
بعد ام قيس يمكنكم السؤال عن طريق الاغوار الشمالية للتوجه لمنطقة الباقورة ورؤية نهر اليرموك والاطلالة الرائعة.
بعد الانتهاء من هذه الرحلة أسألو عن الطريق لعمان أنا متأكد ستكون الساعة حوالي الرابعة او الخامسة عصر، ومن الأفضل لكم عدم التأخر اكثر من هذا في تلك المناطق كون القيادة في النهار أفضل من الليل خصوصا لمن لا يعرف الطريق ، في الصيف تغرب الشمس بعد السابعة مساء.
ستصلون المنزل وترتاحون وقد تغفون فالمشوار طويل، في المساء اذا رغبتم في الخروج انصحكم بالذهاب لمنطقة الرابية وهي منطقة رائعة ليلا يوجد فيها العديد من الكافيهات ومن اكثر الاماكن التي احبها هناك دونية كافيه كافيه واسع جدا ونظيف ومرتب ويتأخر حتى الساعة الثانية صباحا.
او يمكنكم الذهاب لشارع مكة لمطعم زعتر وزيت حيث يمكنكم ان تتعشو فيه معجنات وفطائر وفخارة بيض واحذركم سعره غالي جدا.
ولمن لا يرغب في العشاء فيه يوجد بقربه كافيهات واحد اسمه بيستاش كافيه والاخر كافيه كبير يدعى بلمندو ويوجد أخر للامام نسيت اسمه.
يوجد لديهم جميعا وجبات طعام مثل البرجر والستيك وما شابه وعصائر وارجيل ، انا احب بيستاش حيث أن جلسته مطلة وجميلة جدا.
الوصول للرابية وهذه المطاعم في شارع مكة سهله جدا، للوصول لزعتر وزيت ، وبما أنكم تعرفون كيف الوصول لمكة مول فزعتر زيت يقع في الجهة الأخرى من شارع مكة اي اذا وصلتم دوار الكيلو –بدل أن تأخذو يمين للذهاب لمكة مول يجب أن تأخذو يسار – وستجدون مجمعات المطاعم على الشارع الرئيسي ، اغلب المطاعم لديها باركنغ خاص بها.
والرابية للوصول اليها من ذات الطريق عند الوصول لزعتر وزيت خلوه على يساركم وستجدون بعده اشارة مرور اقطعو هذه الاشارة وخليكم في المسرب اليسار وستجدون اشارة اخرى ولا تعملو يوتيرن ولكن ادخلو يسار من هذه الاشارة وأسألو عن دونية ، ولا تخربطو مع محل ثاني يسمى لي دونيه، دونية الذي اخبركم عنه هو على شكل فيلا كبيرة جدا وامامه دوار صغير وهو منفصل وليس في مجمع. وهو كبير جدا، قد يكون الاسم تغير ولكن أسألو عن دونيه الكل يعرفه في الرابيه.
يمكنكم كذلك التجول في الرابية واختيار مطعم او كافيه ثاني والخيار لكم.
الرابية مليئة جدا بالمحلات ومتنوعة.
وليله سعيدة.

اليوم السادس
اليوم سنذهب لزيارة البحر الميت وهو كما هو معروف اخفض منطقة على سطح الأرض على ذمة العلماء، ويتمتع البحر الميت بملوحة عالية جدا ويمكن لمن لا يعرف السباحة ان يسبح فيه براحة، وهو ذو خصائص علاجية لبعض الامراض نتيجة للملوحة العالية، وكذلك يستخدم الطين الخاص به كعلاج.
يوجد العديد من الفنادق في البحر الميت لمن يريد الميبت ولكن بشكل عام يكفي قضاء نهار واحد هناك خصوصا انه البحر الميت ليس بعيد عن عمان حيث يمكنكم العودة في نفس اليوم.
من افضل الشواطىء المقبولة اسعارها هو شاطىء عمان السياحي

ويقع على بعد كيلومترين من فنادق البحر الميت يقع شاطئ عمان السياحي حيث يتوفر فيه احواض للسباحة وعرف لتبديل الملابس واماكن للتنزه يمكن ان يرتادها الزوار غير الراغبين بالأستفادة من خدمات ا الفنادق حيث يحظون بخدمات ممتازة مقابل رسوم قليلة

المهم سنبدأ الرحلة، يمكن الاستيقاظ مبكرا والاستعداد للخروج من السكن الساعة الثامنة والنصف ، يوجد عدة طرق للبحر الميت والبحر الميت يقع في منطقة الاغوار وهي مناطق حارة في الصيف ودافئة شتاء ويغلب عليها الطابع الزراعي ، يوجد طريق من مدينة السلط وشخصيا لا انصح به لصعوبته نوعا ما، ويوجد طريق سهل جدا وسلس وهو طريق عن طريق ناعور ومرج الحمام.
للوصول للطريق السهل يجب ان نصل الدوار السابع او الثامن ومن ثم لحاق اشارات المطار الدولي ، وفي الطريق ستجدون يافطات كثيرة تشير لطريق البحر الميت ولن تتوهو باذن الله ، من الافضل حمل هويات شخصية لافراد العائلة حيث ان منطقة الاغوار هي منطقة تؤدي لفلسطين المحتلة ولذلك قد تجدون مقصات تفتيش في مناطق مختلفة منها ولكن غالبا ما يكون المقص الثابت هو الوحيد وقد يسألون ويرغبون في رؤية اثبات الشخصية لراكبي السيارة وهو امر روتيني وعادي جدا.
المهم لا تنسو احضار بعض الامور الاساسية معكم مثل الغيارات وبعض المناشف والمشروبات والسناك الخفيفة .
وطبعا محبي السباحة سيتمتعون في هذا اليوم وسيجربون مكان سباحة جديد.
وللعلم شاطيء عمان السياحي يتكون من شاطئين واحد درجة اولي واخر درجة ثانية، الدرجة الاولى افضل ولكنه اغلى سعرا.

عموما بعد الانتهاء من البحر الميت سترجعون لعمان وانصحكم بالتوجه لعمان قبل حلول الظلام لعدم معرفتكم بالطريق.
اود ان انوه ان الجو سيكون حار في الصيف في مثل هذا المكان ويفضل ان تتطلعو على درجات الحرارة المتوقعة قبل التوجه بيوم او يومين.
المهم عند العودة لعمان وبعد الترييح وانا متأكد انكم ستكون متعبين من السباحة والمشوار ولذلك سأذهب بكم لمطعم وكوفي شوب جميل ورائع جدا وذي اطلالة خيالية.
هذا المكان هو مطعم وكافية الاورينتال وهو يقع على طريق السلط عمان في منطقة السرو وقبل جامعة عمان الاهلية.
الطريق للمطعم هو سهل ويسير ، الان انتم تعرفون دوار صويلح الذي ذهبتم منه لجرش ، نريد منكم الوصول لهذا الدوار والاستمرار في الطريق بشكل مستقيم حيث ستدخلون سوق صويلح وخذو حذركم في القيادة فالشارع مزدحم جدا وهو سوق المهم استمرو في السير وسيأخذكم الشارع باستمرار للأمام ، وستصلون لجسر وتحته نفق فاطلعو على الجسر من فوق واستمرو في السير، وستصلون منطقة جميلة تسمى الكمالية وهي ضاحية سكنية هادئة ، استمرو في السير حوالي 10 دقائق ومن ثم ستجدون على يمينكم مجمع تجاري ضخم وكبير جدا وفيه مسجد صغير في أخرهذا المجمع ستجدون مطعم الاوريتنال ، المطعم هو قبل جامعة عمان الاهلية ومحطة البنزين ولذلك اذا شاهدتم محطة بنزين على يمينكم فاعرفو ان المطعم خلفكم.
اسعار المطعم جيدة وطلته جميلة في الليل وهو منطقة باردة نوعا ما لذا من يشعر بالبرد بسرعة او كان معه اطفال يفضل أخذ ملابس او شيء ثقيل للدفء.
كل المحبة والتقدير