مرحبا خواتي ..
الأفكار براسي تدور وتدور وتدور وكل مالها تزيد وماعندي حد أكلمة عشان تطلع من راسي قبل لا ينفجر ..
عقب المشكلة اللي صارت معاهنا خف الوضع .. مااقول مافي مشاكل بالعكس .. كل يوم سب وصريخ وإهانات مافي استقرار وطول الوقت خوف وتوتر يعني هذا صار روتين ..بس المهم مانقع البوكس .. من اسبوع أمي وابوي سافروا للعلاج .. قلتلكم من قبل أمي راعية عمليات وامراض .. السبب الرئيسي لسفرها ان احتمال تسوي عمليتين فركبها .. بس السبب الثاني وهو وايد مهم ان صارلها كم شهر ومعتها ماترحمها من الوجع ان مااكلت حرقتها وانتفخت وان كلت ترجع اللي اكلته وأي شي تاكلة مثل النار على معتها طول الوقت معصبة ومتضايقة من الوجع والله يااخواتي أن بطنها تنتفخ مثل الحامل يوم أييها الوجع تسير عن دكتورة تقولها جرثومة وثانية تقولها في ورم وثالثة تقولها قولون عصبي وكل وحدة تعطيها دوا غير فحص الدم والبول والبراز كل شي اوكيه مو عارفيلها قلنا فرصة دام سارت هناك تتعالج من معدتها .. أبوي مول مول مووووووووول مب مهتم ييلس يطنز يوم تقوله وديني الدكتور أحس معدتي بتنفجر يقول ليش فيها قنبلة ..!! عديم أحساس ومايحس غير بنفسه .. فيها جرثومة بالرحم من شهوور ومو قادرة تتعالج منها لأن معدتها ماتتحمل مضاد حيوي يوم تاخذ مضاد اييها أسهال يومين 3 ورى بعض لين الله يعزكم ماتقر تقعد من الوجع تحت ..ريولها تعورها خصرها دوم يعورها من آلام الرحم ومعدتها تحترق .. قلبي يعورني عليها مابيدي حيلة واهل امي مافيهم خير مايسألون عنها ومالنا حد غير الله .. امي توها دشت الأربعينات بس ملامحها التعبانة مكبرتها وهادة حيلها ..
ساروا بانكوك يت بتسوي فحوصات لمعدتها قالها لازم مناظير من فوق ومن تحت لأن شاك ان في ورم وبعد المناظير لازم ياخذوا عينة من الورم يعني يكلف آلاف وهي ماعندها هالمبلغ وابوي مو مستعد يتدين عشانها ..يقول ورانا مدارس ومصاريف وانا ماعندي بيزات ..
طيب ياناس عن لبس تنازلت عن طلعات تنازلت عن رفاهية وعيشة كريمة بلا مذلة تنازلت .. بس حتى عن صحتها وعلاجها ..!!
مافيه إحساس .. يوم أسمع كلامة أتخيلني واقفة قدامة واطلع اللي بخاطري واحد بلا احساس وبلا ضمير بلا قلب بلا انسانية اصلا انت مو انسان خاطري اقولة نحنا الحين عاجزين أمي عاجزة وانا مااقدر اسوي شي لها بس بيجيك يوم بتضعف بتدور الدنيا وبتعجز وبعدين قلوبنا اللي مارحمتها كيف بترحمك ..!! بس بعد الكلام مايفيد فيه ..
مقهورة يابنات قلبي يعورني .. مابيدي حيلة اساعد أمي .. مافي دراسة مافي شغل وموضوع زواجي متعسر ماشي اهل وسند ..
والله أني أفكر أهج اشرد اضيع أنسى اسمي وانسى من انا واهيم .. طول الوقت تفكير ومحاتاه .. أدعي واستغفر واصلي ارتاح .. بس الهموم والتفكير وراااي وراي ..
من سافر حطلي 700 والبيت فاضي والحين ياقي 200 متمسكة فيها بالقوو .. أخواني يبون يطلعون يستانسون كلوا جبددي واكيد لو طلعت بتنصرف هذا بخاطرة مكان وهذا بخاطرة لعبة وهاي بخاطرها شغلة وعدتهم لو سافر ابوي أعوضهم بطلعات وآدلعهم شوي بس ماتوقعت يحطلي هالمبلغ .. هم صغار مايدرون بالوضع .. وانا تعبت من الوضع كل يوم قبل لاانام اسبح مخدتي بالدموع ..
أصعب شعور بالدنيا هو العجز 
بس الله كريييييييييييييييييييييم
بس مابزيدج هم وغم
كوني ع يقين ان الله هو ارحم الراحمين واحسني ظنج بالله
يالغاليه عليج بالاستغفار
ما اعرف شو أقولج والله عورتيلي قلبي
الله يكون في عونج وعون الوالدة وربي يخفف عليها كل آلامها
مافي حد من اهلج من صوب الوالدة او الوالد يساعدكم ؟
قوليله البيزات تبخروا من وين ناكل؟
الله يشافيلج الوالده
أولا أنت مواطنة وحقوق العلاج تكفلها الدولة وتوجد مستشفيات والنعم فيها ومجانا اذا تعثرت الآمكانيات بالخارج عليكم بمستشفيات الدولة
وحتي تقديم طلب للديوان للعلاج بالخارج علي نفقة الدولة فلا يكلف الله نفس فوق طاقتها والشفاء أولا وآخيرا بيد رب العالمين
وبنسبة لآخوانك حتي لو كانوا صغار حين يطلبوا الخروج خبريهم بس يرجع الوالد مش وقت خروج وطلبات
هونيها بتهون حبيبتي وتصلي بالوالد وطلبي مصروف للبيت واكيد ما بيقصر
الله يفرج كل مهموم ويشفي كل مريض
كما ذكروا الخوات لو كل واحد فينا قال عن وجعة لن تكفي صفحات المنتدي
أمي بين الحياة والموت وعايشة ببلد ثانية وأخواني جنبها بس لآخر الشهر بيسافروا لمكان عملهم وكلنا عجزين عن الحل كيف نتركها بروحها
والفيزا لهذة البلد الآن موقوفة فلا أستطيع السفر ما لنا غير الدعاء والشكوة لله
أنا مش مواطنة ..
الأهل موجودين بس لاعقولهم ولا قلوبهم صوبنا ولا يدرون عنا ..