اكلات الاطفال دون السنه

وبما اني في بريطانيا عندهم نظام هنيه اتي ممرضة فالبيت (الهلث فزتر) وتنصحني وتقترح علي اشيا تناسب ولدي وتخبرني عن الوجبات المغذيه والصحية

وانا بخبرج كذا وجبه من اللي خبرتني عنها :

أول شي ياريت تودرين السيريلاك اللي تستخدمينه لأنه والله اعلم مب اوكي حق اليهال

والدليل انه هنيه ابد ما يستخدمونه في بريطانيا

والدليل انه طعم السيريلاك مقارنة بالاشيا اللي مثله هنيه يعتبر حالي يعني فيه وايد شكر غير المواد الحافظه

البديل عندج في كارفور وابيلا ماركة Cow & Gate ماركة بريطانيه وشكلها كراتين متوسطه بحاول احط صورتها

ومكتوب عليه (organic) يعني عضوي مافيه مواد كيماويه ولافيه مواد حافظه

ومنه نكهات عيش ساده _ قمح _ فواكه

القمح والفواكه تستعملينه مثل ما تستعملين السيريلاك العادي يعني ماي او حليب وتخلطينه وياه وتأكلين البيبي

أما العيش عندي لج عشر وجبات ممكن وجبات مالحه وممكن حلوة

الوجبه الأولى: يوم تسوين مثلا صالونه دياي او لحم على غداكم وتكونين حاطه فيها جزر وبطاط و كوسه

عقب ما تزهب الصالونه خذي من هالخضرة اللي حطيتها فيها

واضربيها فالخلاط وزيدي شوية ماي عليها وحطي من العيش السادة وخلطيه واكليها اياه

الوجبة الثانية : اطبخي عدس (العدس مفيد لليهال) بالطريقة العادية اللي تسوونها مثلا على عشاكم

وخذي شوية من العدس اللي سويتيه وزيدي عليه شوية ماي وشوي من العيش الساده واخلطيه وتصير وجبه مفيده ومغذيه

والوجبه الثالثة : هاتي شوية بروكلي وشوية زهره (البروكلي مثل الزهرة بس لونه اخضر) وأسلقيهم بالماي
مع شويه ماجي او شوية زعتر وملح وكمون نتفه من كل شي … وعقب ما ينسلق عدل ضربيه فالخلاط
ونفس الشي زيدي عليه شوية من ماي السلق + العيش الساده

الوجبة الرابعة : هاتي شوية بازلا خصرة + شوية ذره ونفس الحركة اسلقيهم بماجي او زعتر وملح وكمون
واضربي فالخلاط مع شوية ماي سلق والعيش الساده

الوجبة الخامسه : اذا مسوين عالعشا فاصوليا خذي منه شوي وزيدي عليه ماي وعيش ساده وفالخلاط

الوجبه الخامسة: سبانخ مسلوقه مع شوية ماجي او زعتر وكمون وملح فالخلاط مع عيش ساده

الوجبه السادسه :هاتي مشمش مجفف اسلقي كم حبه من هالمشمش وعقب فالخلاط مع العيش

الوجبه السابعة : تمر + ماي مغلي + عيش ساده فالخلاط

الوجبه الثامنه : تمر + حليب + عيش ساده

الوجبه التاسعه : تين مجفف تسلقينه + عيش ساده فالخلاط

الوجبة العاشرة : حليب + شويه سكر نبات + عيش ساده

_____________________________________________

وعندج نفس الخلطات وبدال العيش حطي شوفان كويكر تصير عندج 20 وجبه مختلفة

وممكن اتدخلين الدياي واللحم و البيض المسلوق حسب العمر

وعندج الفواكه واللي تقدرين تسوين منهم وجبات

الوجبة الاولى : اسلقي حبه جزر صغيره واضربيها فالخلاط مع تفاح + كمثرة و شويه عصير برتقال

الوجبة الثانية : افوكادو مع موز + شوية عصير برتقال فالخلاط

الوجبه الثالثة : أفوكادو + تمر + حليب

الوجبه الرابعه : تمر + قرع عسلي اسلقيهم مع بعض وعقب اضربيهم بالخلاط

وبالنسبة للعصير اول عصير تعطينه البيبي هو عصير التفاح والكمثره لأنه اخف شي عليهم

وهذا فالشهر الرابع والخامس

وفالشهر السادس تعطينه البرتقال المخفف
او عصير برتقال مخلوط مع عصير همبا او موز

واللي ترضع طبيعي وتسأل أي حليب استخدم للوجبات اشتري اي حليب للأطفال
مثل SMA Gold وينباع في كارفو ر_ شويترام _ ابيلا _ واللولو على ماظن
واستخدميه للوجبات لأنه هالحليب فيه فيتامينات ومعادن وحديد ويتعبر الحليب الاول في بريطانيا للأطفال
ويعطونه الام فالمستشفى يوم تربي عشان ترضع البيبي منه

كل هالكلام اجتهاد خاص وشخصي مني
وحلال على اي وحدة تبا تنقله او تنسخه او تنسبه لعمرها
او تطبعه في ورقة وتحرقها ههههههههههههههه

حبيت افيدج وافيد خواتي بخبرتي اللي اكتسبتها من غربتي

بس ابغي منكم دعوة حلوة لي ولعيالي وابوهم
انه الله يخلينا لبعض ولا يحرمنا من بعض
وانه الله يردنا بالسلامة لبلادنا واهلنا
والله يحسن خاتمتنا وإياكم

وأي سؤال انا حاضرة وجان مارديت عليكم
عندكم الرسايل الخاصة وفالكم طيب
و
و
و
وشكـــــــراً