اكتئاب الحمل و الحياة الزوجية . موضوع حلو كتبته لكم

الموضوع اجوفه وايييييييد مهم و يأثر ع الحياة الزوجية

طبعا مشكلتنا ما نقدر نصارح وما نقدر نرمس
وايد حريم عندهم اكتئاب في فترة الحمل او بعد الولادة

تذكري اختي الكريمة ان هذا طفل و انج كنتي شراته قبل
و صدقيني من يكبر شوي بتستانسين بحركاته و سوالفه و كلامه و صوته

ع فكرة تصدقون اني كملت شهوورع الاكتئاب
بس قدرت اعيش حياتي وانا اعاني منه !
كملت 7 شهور ع الاكتئاب عقب خف مني تدريجيا لان النونو كبر و صار عاقل و تنظم وقت رقاده و صرت ارقد عدل<< الله يهديه دوم يا رب
و عقب ما كبر حجزت لي تذكرة و سافرت مع ابوه و خليته عند الوالدة و راح الاكتئاب اسمينا الحريم نحب الحواطة خخخخخخخ
و حتى لجأت لامور وايدة و تميت اقرى من النت و اتثقف

صدقوني شي مهم لازم انصحكم فيه

لا تخبرون حد بالموضوع الا شخص قريب منج لو كنتي متضايقة
مثلا امج و تكون فاهمة الموضوع و متعلمة
لا تخبرين ريلج لان في رياييل الله وكيلكم ما فيهم مخ
عبالها اللي فيها اكتئاب يعني مينونة و عاد البعض منهم يتريى الزلة عليج
فبليز لا تخبرون الطرف الثاني الا لو انتوا متاكدين انه بيتفهم الموضوع !

هاي نصايح بسيطة لكم
لو بس اطبقونها بترتاحون

1- كل يوم الصبح سوي لج فطور فرش صحي مع عصاير فرش

2- ودي البيبي وياج و امشي في اقرب ممشى او سنتر قريب من البيت عسب لو بهدلج ترجعين بسرعه

3- اعتمدي ع حد ثاني مثلا امج خواتج ام ريل ولو اعتمدتي ع الخدامة اشتري لج كيمرة صغيرة و ركبيها في الحجرة او كذا كيمرة ( لامن شاف ولا من دري) انا اسوي جي و مرتاحة
بس بشرط اعتماد جزئي ف وقت الحاجة مب 24 ساعه
و كافئيها بهدايا حلوة: لبس يديد زيادة راتب هدية ..الخ
حتى لو امج تساعدج اشتري لها هدايا رمزبة بين فترة و الثانية

4- بعد الولادة لا تسمعين نصايح حد عن الاكل( اكلي رهش و اكلي بطيخ و اكلي مهياوة لين ما تستوين بطريقه شراتي المهم يعني كانج بالوعة خلج عادية و اكلي اكل صحي انتبهي لا حد يقص عليج )

5- تأكدي ان النونو من يكبر يستوي لعبة و عثل
يوم يتجلب و يوم يقول داداداداداداد و بيقول ماما و بابا فأصبري

6- حاولي تشركين ريلج في تربية النونو و تبديله و حمله
حتى لو تحسين انه ما يعرف و تسمعين النونو يصيح
ممكن مثلا تروحين تسبحين تبدلين تصلين و تخلينه عنده خله يتوهق فيه

7- ما في مانع تطلعين و تخلين النونو عنده!
خليه شوي يجابل و يسوي و صدقيني بيحس فيج عقب
انتي تعبتي وايد شو بيصير لو هو يشيله!

8- خذي له ملابس حلوة و كشخه و رتبيه و صوريه

9 – سوي له غرفة خاصة مع ديكورات حلوة و حطي كل اغراضه و خليه يرقد في الحجرة عسب يرتاح من صدعتج انتي و ريلج بس طبعا لازم تراقبينه و اشتري جهاز خاص للصوت عسب تسمعينه و انتي بعيدة
طبعا المساء اكيد بيكون في حجرتج بس القصد انه يرقد عدل بعيد عن الضوضاء

10- اكبر غلط انا سويته اني يوم اطلع ما اخلي حد يشيل نونوتي
لين ما النونو تعود محد يشيله غير امه و توهقت فيه بس عقب تغير و صار يبغي كل حد يشيله
خلي اهلج و اهل ريلج يشيلونه و لا تخافين عليه يعني ما بياكلونه
خليه يتعود ع الناس و الحشرة

11- انتبهي تهملين ريلج ع حساب عيالج بصورة واضحة
اكيد بيكون في غيرة بس لا توصلين للاهمال
مرة قريت قصة شخص يشتكي
ان زوجته تهتم في عياله و بالعكس مدحها وايد يحليله

بس تهمله من ناحية الطلعات يعني ما تطلع وياه طلعة خاصة الا و ساحبة عيالها مع انهم كبار في العمر
لانها ما تحب حد يهتم فيهم غيرها و تأكلهم و تشربهم و تسبحهم وكل شي
مع ان اهله و اهلها يموتون عليهم و يتمنون منى عينهم يهتمون في اليهال
انزين خلي اليهال عند ام ريلج و خوات ريلج ليش ها الطبع الخايس
ما الوم الزوج لو دور حرمة ثانية بصراحة

12- خليه يندمج و يكون اجتماعي ولو لاحظتي انه يستحي و جي او يخاف
حاولي اطلعينه كل يوم لحديقة سنتر
و عقب دخليه حضانة ليش لا بس حضانة نظيفة و لها سمعتها

الولادة و بعد الولادة صعبة
لكن نصيحتي

خلي كل حد يشاركج في ها اللحظة
اهلج
اهل زوجج
زوجج

لا تهملين نفسج و حبيبج بو عيالج
و خليه يشاركج في تربية الطفل