افتوني في خادمتي الفلبينية

رح أدخل بالمشكلة على طول.. تلفون البيت الثابت انقطع فجأة ونحن أبد ما نستعمله.. وقلت أكيد هاي الخدامة متصلة على أهلها وسوالف معاهم ومو حاسة بالفاتورة.. يوم شيكنا وشفنا الكشوفات مال الخط طبعا كله اتصال دولي بأهلها والفاتورة وصلت 1200 درهم..

ريلي قال انه راح يقطعها من راتبها.. قلت له حرام أنا رح أدفعها عنها.. لني أعرف إنها ما تقصد وهي من النوع اللي يستحي أبدا ما عندها الجرأة إنها تاخذ شي مو لها.. ويمكن لأني مرات كنت أخليها تتكلم من تلفون البيت فهي حسبالها عادي انها تستخدمه من دون إذني!!

المهم ريلي ما اقتنع كثير لكن قال خلاص بيسامحها بكن يبي يأدبها شوي.. ويوم عطاها الكشوفات وقال لها احسبيها وخبريني.. وبعدين سألها ها كم التوتال.. قالت 1250 درهم .. قال لها شو رايج.. قالت بابا أنا آسفة أنا غلطان إنتم زعلان!!؟ وايد بريئة خخخخ

قال لها ريلي لا مو زعلان بس انا راح يسوي ديسكونت وينقص من راتبخ 50 درهم كل شهر<< وايد طيب
هو قال هالكلمة وهي وجها تغير وتمت تطالعني وبعدين قلت لها لا بابا يمزح << بصراحة رق قلبي عليها حسيتها مسكينة
بعدين هي تركتنا وراحت غرفتها وتمت تصييييييييييييييييييييييييييييييييييح وتنهت وحالتها صارت تفجع الواحد جنه حد مات لها!!!
وانا أكلمها أقول لها بابا يمزح لا تصيحين ما يفيد معاها قالت لي مدام خليني أنا بعد شوية فيه كلام.. لأنه ما تقدر تمسك عمرها من الدموع وترتجف من التوتر..
عقب كلمتها قلت لها لا تصيحين ما يسوى هو يمزح معاج (حتى هو تلوم فيها وانقهر عيلها وحررررم يمزح مرة ثانية)

ما توقعت الراتب مهم لها وتخاف عليه مع إنها ما تسحبه من عندنا إلا كل 3 أشهر ونحن نطرشه لأهلها وحتى التحويل علينا ومرات معاه عيدية.. أغراضها الشخصية وملابسها وأكلهاومكالماتها الدولية كلها علينا.. يعني هي شهرياً بس تستلم راتب كامل.. ومرات أمي وخواتي يعطوها لمن نزورهم.. وراتبها حسب العقد 700 درهم وهي ما كملت 8 أشهر وراح أسفرها تشوف أمها شهر وترجع لأني مسافرة ما اريد أحرمها من أهلها وكل على حسابي من تذاكر وشنطة وهدايا وملابس وغيره..

هي تقول إنه هي أصلا يوم وقعت العقد في الفلبين وأبوها كان معاها وقعت على راتب 1000 درهم ولمن دخلت بيتي وتمت عندي 12 يوم قبل بداية الشهر قلت لها إنه راتبج 700 وراح نضيف فوقه 300 درهم حق 12 يوم وقلت لها إذا كانت تحب تطرش الفلوس لأهلها.. ما قالت لي لا راتبي خبروني إنه 1000درهم هي بس قالت أوكيه شكرا ماما وبس!! الحين تقول لي إنه هي ما كانت تعرف ها راتبها لكن لأنها ارتاحت معانا ووافقت..

المصيبة تقول لي إنه هي كل الخدم اللي تشوفهم بالحديقة يوم ترح هناك مع أطفالي يقولون لها إنه رواتبهم 1000 درهم!! وخدامة ربيعتي 900 درهم..
بس هذول كلهم ما اعتقد يعطونهم تذاكر سفر على حسابهم.. وما اعتقد إنه بيتهم شقة غرفتين وصالة وفيه 4 نفرات (أنا وزوجي وطفلتين) تقعد الساعة 8 الصبح وتسوي ريوق لها وللصغار وتنظف البيت وتسوي الغدا.. بس حتى العشا ملغي من بيتنا لأننا نتغدى متأخر بحكم دوامنا.. وباقي اليوم بعد الساعة 5 العصر تلعب معاهم أو تروح الحديقة أو تنام أو تلفزيون ورقادها باليل عالساعة 10..وأنا وعدتها بس تكمل سنة يصير راتبها 800 درهم.. ووريتها العقد اللي خذيته من المكتب..

السؤال:
هل انا ظلمتها؟؟