انا حزينة جدا على حالي و احس بعمري ام فاشلة و غير قادرة على تربية اطفالها 
انا ام لتوأم ولد و بنت يبلغان من العمر 7 سنوات .. اثنينهم يدرسون في مدرسة خاصة و اثنينهم حاطتنهم فنفس الصف .. البنت اشطر عن الولد فالدراسة لكن الولد اذكى عن البنية في امور الحياة العامة .. يعني مثلا الولد يعرف يشتري من البقالة و يعرف يطلب من المطاعم و يعرف يدفع المبلغ و يتحاسب مع البائع .. لكنه في الدراسة مستواه متوسط في السبعينات و الستينات !
البنت مب وايد شاطرة في امور الحياة ولا تعرف تشتري ولا تحاسب على البيزات و كله تضيع اغراضها لكنها ممتازة في المدرسة و مؤدبة و كل المدرسات يحبونها ..
يعني الحمدلله و الشكر ربي اعطاني التوأم بعد صبر سنتين عقب الزواج و خلاهم متساوين تقريبا .. الحمدلله لك يارب
اطفالي هم كل حياتي و احاول جاهدة اني اهتم فيهم و اعتني فيهم و اربيهم و اعلمهم الصح من الغلط .. مشكلتي مش البنت مشكلتي الكبيرة هو الولد !
احيانا احس انه ابتلاء من رب العالمين .. لا تستغربون من كلامي !
ولدي عنيد جدا و مشاغب جدا جدا الى آخر الحدود و للاسف لسانه طويل و ما يسمع كلام حد .. يتحدى اكبر شخص فالعائلة ولا يهمه اي حد ! 
ولا اعرف ما هو السبب وراء هذا التمرد !
يشهد الله انه لا انا ولا ابوه مقصرين في توجيهه و احيانا توبيخه على الخطأ .. و للاسف مافي شي ينفع معاه لا اسلوب طيب ولا توبيخ ولا حتى ضرب ولا مكافآت ولا شي !!
عينه قوية و ما يحشم احد ! 
يعني بعطيكم امثلة و انتوا احكموا .. البارحة عفد على منشر الغسيل البلاستيكي و كسره نصين و انا توني شارتنه يديد .. طبعا صرخت علي و كنت بضربه قلتله ليش اتسوي جي؟ المفروض انك تحافظ على اغراض بيتك و ما تكسرها .. تخيلوا يجذب و يقولي مب انا كسرته لا و يحلف بعد 
المهم انا قلت العقاب المناسب هو اني اخذ من بيزاته اللي ميمعهن و اشتري منشر ثاني عسب يتأدب و ما يكررها مرة ثانية !
تم يصيييييييييييييييح و يصارخ و يكسر و يطول لسانه عليي و يقولي والله ما تاخذين ولا درهم من بيزاتي و سار الكبت و فر كل اغراضي عسب يطلع بوكه و يدسه مكان تخيلوا
و سوة اللي فراسه و شل بوكه وياه و سار و انا مذهولة
المصيبة يا بنات انه ابوه مب جي طبعه .. حليله بالعكس وايد طيب و مسالم و كل الناس اتحبه و هاديء حتى يوم كان صغير عمتي اتقول كان مؤدب .. و انا نفس الشي كنت طفلة عادية و احترم الكبار و اسمع كلام اهلي .. ماعرف هذا طالع على امنو جيه ؟؟؟؟؟؟؟؟؟؟
انا ما انكر انه ولدي حنون و طيوب و اعرف من داخله طفل بريء و حبوب و كلشي .. لكن تصرفاته خبلت بي .. تحسين انج قاعده تتعاملين مع ريال مب طفل !
ما شاء الله علي عيني باردة علي .. يحب كلشي يمشي على مزاجه و الود وده يمشي البيت بكبره على مزاجه و حتى احيانا يتدخل بلبسي و يوم يصيح تلفوني لازم يعرف امنو و احيانا هو اللي يرد و محتكر تلفوني 24 ساعة فدينه و يلعب في و يطرش حق خواتي على الواتسب بعد 
ابوه مب قادر علي احيانا يضربه ضرب و عقب من يرقد ييلس يتلوم و يقولي والله انه هالولد يغمضني يوم اضربه بس شسوي هو يطلعني عن طوري !
والله يا بنات يوم اطلعه مكان يلعب هو و اخته يكرهني عيشتي .. يبة كلشي ع مزاجه و يبة يشتري كلشي فوقت واحد .. و ياليت عايبنه .. دوم يقولي انتي ما تعطيني شي و ما تشتريلي شي و بابا احسن عنج .. و يوم يتضارب وي ابوه يقوله ماما احسن عنك .. احترنا معاه والله .
قبل يومين كان يتفرج فلم اجنبي على ام بي سي 2 و فجأة ياه عندي و قالي ماما عطيني 100 دولار 
قلتله شوو ؟؟؟؟؟؟؟؟؟؟
من وين اييبلك 100 دولار احينة ؟؟؟ يقول مالي خص اباه 100 دولار شرات الفلم عطيني .. قلتله ما عندي 100 دولار شو هالكلام نحن عايشين فالامارات و عملتنا هي الدرهم الاماراتي و ما نتعامل بالدولار .. انشالله يوم تكبر و تشتغل بيكون عندك وايد بيزات و عملات من جميع دول العالم .. و الحين انا بعطيك 10 دراهم حطها فالحصالة .. ولا اقتنع و تم يصير و يضارب و يقولي انتي بخيلة ما تعطيني ولا شي .. انا هني عصبت و قلتله مرة ثانية ان عدت هالكلمة ياويلك يا سواد ليلك فهمت ولة لا
و وايد مواقف بعد لو بذكرها لكم ما بخلص لين باجر !!
كل يوم مواقف يديدة وي هالولد .. و طبعا الخساس فأخته و المضايقات لها 24 ساعة على مدار اليوم هذا شي طبيعي جدا عندنا .. والله اني دوم اتكلم معاه و احاول افهمه انه اللي يسوي غلط و انه الله بيحاسبه حساب عسير و انه للوالدين منزلة كبيرة عند الله .. و انه عيب و غلط يطول لسانه علينا و يقلل احترامه لنا .. و يقتنع و يسكت ساعتين مؤدب عقب يرد يتشيطن مرة ثانية !
انا مب مدلعتنه وايد ولا ألبيله كل اللي يباه ولا حتى ابوه .. نحن نصرف عليهم على قد امكانيتنا .. لكن احس انه ولدي طموح و يبة يحصل كلشي بسرعة و يحب يجمع بيزات و يكون عنده احدث الاجهزة و الموبايلات .. و انا دوم احاول افهمه انه هالشي لا يمكن يتحقق الا بالدراسة و العلم و العمل .. تخيلوا شو يقولي !!!
يقولي انتي و بابا تشتغلون و عندكم بيزات جي ما تعطوني كل اللي اباه .. ليش انتوا بخيلين ؟؟
اقوله عيب يا ولد هالكلام لا تقول على اهلك جي .. نحن صح نشتغل عسب نوفر لكم حياة كريمة و ندفع اجار و ماي و كهربا و بترول و اكل و شرب و بترول و ملابس و مدارس و كلشي نوفره لك انت و اختك من رواتبنا لانه نحن درسنا و نجحنا و اشتغلنا و انت بعد لازم تسوي شراتنا ..
ماشي فايدة يقتنع شوي و يرد يطلب و يطلب نفس قبل .. و الله اني تعبت معاه و ابوه بعد تعب و مب عارفين كيف نتعامل معاه .. اتمنى حد من اصحاب الخبرة و التربويين يساعدوني لاني خلاص قربت افقد الامل .. و مرات اقول خلاص بخلي يسوي اللي يباه انا خلاص تعبت من هالولد .. مشاغب و لسانه طويل و ياخذ حقه بيده ولا يهمه لا قريب ولا غريب .. تصوروا ما يخاف ولا يحشم احد لا خوالي ولا عمامي ولا اجداده ولا اي حد مووووووووووول
و يقول عادي اضربوني ما يعور و انا مب خايف منكم 
ارجو المساعدة و شو هي الطريقة السليمة و الصحيحة للتعامل مع هذه الشخصية من الاطفال ؟؟
علما انه الضرب و الشدة لم تنفع معه ابدا .. بل بالعكس يزيد و يتمادى اكثر و اكثر
ساعدوووووووووووني 
هالشخصية تقولين لا انتي ولا ابوه نفس
شخصيته شوفي يقعد مع منو ؟ شو يطالع
بالتلفزيون يعني ولد عمره بس 7 سنين
احس غلط يشوف قناةإم بي سي 2 هالقناة
أغلب اشياءها عنف وعدم احترام واشياء
مب مشفره لازم تقعدون وياه جلسه جاده
وتحطون النقط على الحروف وتحطون له قوانين
غلط يتعداها مثل رفع الصوت وتكسير الأشياء
له عقاب او ينحرم من لعبته المفضله انصحج
تقرين كتب جو فروست وايد عندها أساليب
لمثل شخصية ولدج الله يحفظه لكم ويصلحه
المشاركة الأصلية كتبت بواسطة M-Alshehhi 
هالشخصية تقولين لا انتي ولا ابوه نفس
شخصيته شوفي يقعد مع منو ؟ شو يطالع
بالتلفزيون يعني ولد عمره بس 7 سنين
احس غلط يشوف قناةإم بي سي 2 هالقناة
أغلب اشياءها عنف وعدم احترام واشياء
مب مشفره لازم تقعدون وياه جلسه جاده
وتحطون النقط على الحروف وتحطون له قوانين
غلط يتعداها مثل رفع الصوت وتكسير الأشياء
له عقاب او ينحرم من لعبته المفضله انصحج
تقرين كتب جو فروست وايد عندها أساليب
لمثل شخصية ولدج الله يحفظه لكم ويصلحه
مشكورة اختي على ردج السريع .. صدقيني هو اصلا ما عنده وقت يطالع تلفزيون لانه 24 ساعة يناقز و يشاغب .. و يوم شاف ام بي سي2 كان بالصدفة , ريلي فاتحنه !
و انا مفكرة اغير مدرسته و انقله مدرسة ثانية تكون ادارتها شديدة اكثر .. مع اني اشوفها مدرسة زينة و الدليل انه اخته ما تغيرت اخلاقها و لا تأثرت من المدرسة !!
الله يصلح الحال يارب
الله يصلحه
او حطي جدول عندج و كل يوم حطي هابي فيس اذا كان اوكي او ساد فيس اذا كان مشاغب و لين اخر الاسبوع شوفي الاكثر شو الهابي فيس او الساد فيس و كافئيه اذا كان الهابي فيس و العكس ..
والله يهديه ياااارب ..