طبعا عمري مااتمنى يصير حق اي بنت الي صار حق اختي الي اصغر مني.. احنا ولله الحمد من عايلة محافظة، انولدنا وتربينا ودرسنا ف ارض الامارات الحبيبة، اهلنا عايشين هني اكثر من 30 سنة.. قبل فترة كلمتني وحدة من صديقاتي الاماراتيات وخبرتني ان اخوها يبا يخطب اختي… هي البنت تعرفني واحيانا كانت تيي بيتنا وتشوف امي وخواتي.. وعيبتها اختي لأنها بنت حلوة ومتعلمة وفاهمة شغل البيت حنونة على امي واختي الصغيرة بعد وفاة الوالد الله يرحمه..المهم، قلت حق ربيعتي تعالو افتحو سالفة الخطبة ويا امي وانا بعد بكون موجودة وعقب بنشاور اخوي لأنه ريال البيت عقب وفاة ابوي.. يت البنية هي وامها، وكانت الأم الله يسامحها من النوع المغرور، وسألتنا عن طلباتنا وعن المهر وامي قالت لها ان المهر 30 الف والمعرس يشتري الزهبة الي على كيفه ويحجز قاعة العرس حسب امكانياته واحنا مابنقول شي.. وللأسف لقينا أم المعرس ترد علينا بطريقة وكأنها تقلل من قيمتنا وتقول ليش المهر 30 ، عشرين الف كفاية، بنتكم مب اماراتية عسب ندفع هالكثر..! وتصوروا الاحراج الي حسينا فيه انا وامي وحرمة اخوي يوم سمعنا هالرمسة… ربيعتي وحليلها انحرجت وبغت الأرض تنشق وتبلعها، وانا بصراحة لو يدفعون حق اختي 100 الف درهم مارح ارضى انها تاخذ ريال امه تفكر بهالطريقة، خاصة ان اختي بنت قنوعة وكانت موافقة تعيش ويا اهل ريلها وادري فيها بتحطهم على راسها، والمعرس سبق له الزواج بس مطلق وماعنده عيال وعمره 38 سنة، يعني اكبر من اختي بعشر سنين ومع هذا غضينا النظر لأن سمعته زينة، والحمدلله، ابوي الله يرحمه كان مدللنا وكان تاجر، واحنا فخورين بأصلنا لأن كل العرب جذورهم من هالبلد، والي أصله ماينتهي لهالبلد معناها مب عربي اصيل، وبلدنا فيها الحضارة والكرم حتى لو الزمن جار عليها والناس يعتبرونها بلد فقيرة، بس بعد احنا فخورين بأصلنا وفخورين بأن احنا مولودين ومتربيين ف الامارات الي ماعرفنا غيرها وطن، والجنسية مب كل شي ف الحياة،، طولت عليكم خواتي، بس فيني غصة من هالأم الي كلمتنا بهالطريقة ولا كأن بنات الناس لهم مشاعر وكرامة.. اختي ان شالله بيتقدم لها ولد الحلال الي يستاهلها وتستاهله، ويحترمها لذاتها وتفكيرها وشخصيتها.. ربي يستر على كل بنت وينولها ولد الحلال الي يصونها ويحافظ عليها… آمين…
ترى فيه ناس تفكيرهم محدود ع بالهم هالشئ مهم
ياما سمعنا عن أمهات وافدات بس تعالي للتربية والأخلاق
ما شاء الله عليهن و الله
ربي يحفظكم يارب وتتزوجون ياااااااااااارب
وبعدين إذا عالعيال,, الجنسية ما بتأثر باجر إذا الأم ما عندها العيال بياخذون الجنسية على أبوهم..
بس سبحان الله كل شي قسمة ونصيب… وإن شاء الله تلاقي ولد الحلال اللي يناسبها…
ولاتزعلين ام عبادي ترا وايد ناس تفكيرهم سطحي
الله يرضى عليج وعلى اختج
من الحين هيه جي تقول وقبيلتكم..ولا البلد اللي إنتي تنمين له أصل العرب ..
وإختج بييها رزقها..
والله قهرتني..
بس الحمدلله اختي عرفتوها على حقيقتها قبل ما يفوت الأوان ….
والله يعوض على اختج باللي احسن عنهم …