إلى خبيرات المجبوس

السلام عليكم
اللي يضبطون المجبوس و يطلع حب نثري رجاء ردوا علي
كيف أعرف كمية الماي المناسبة كل ما أحاول يا يطلع حب و لا مهروس
ساعدوني بارك الله فيكم

طريقتي طبعا انا اقايس بعلبة السميد او الخبيص اسوي قوطي ونص القوطي ويوم اغسله بالطاسه واسوي الخلطه اعق العيش وعقب اترس الطاسه ماي واصبه عالجدر يعني الماي يكون فوق العيش بشوي واذا طلع نثري بزياده يعني حب عقب مايزهب اغطيه بقصدير واشغل الفرب واحط الجدر داخل خمس دقايق واطلعه وعقب ماظهره اخليه مغطاي بالقصدير ويطلع عاادي مب مهرووس والحمدالله الكل يمدح طبخي الله يحفظج

اذا حسيتي انه الماي وايد غطي الجدر بفوطه نضيفه و خلي على النار عشر دقايق و ربع ساعه

يوم تحطين الماي لازم تشوفين العيش يعني حطي الماي قياس صبعج الصغير وخليه يفور يوم ينشف الماي ويسوي عيون فوق غطيه بالامينيوم وخليه على نار هاااديه

كل مقدار عيش تسوينه سوي نفس ونص

يعني

لو سويتي كوب عيش بنفس الكوب سوي ماي كوب ونص

لكل كوب عيش كوب ونص ماي من دون ماي السلق بالمجبوس

الغالية قياس الرايبة ماي زيادة عالعيش

يعني بمرحلة اضافة الماي صبي لين تغطين الخلطة

وفوقها ماي زيادة بقياس الرايبة

ماادري اذا فهمتي علي ولا