عندنا أشياء كثيرة في البيت متوفرة ورخيصة تعطينا نفس النتائج الي نحصلها من دور العناية بالبشرة والصالوانات ويمكن أحسن لأنج بداومين عليها إسبوعيا وما بتكلفج وايد.
الأشيا الي بتحتاجينها
جهاز بخار للويه وإذا ما عندج إستبدليها بفوطة دافية
فوطة عشان تلفين فيها شعرج
مقشر للويه
فوطة لتنظيف الويه
منظف للوجه
قناع
إداة إستخراج الرؤوس السوداء
مرطب
تونر
وسيرم للوجه
أحين ننتقل للخطوات
1. نغسل الويه بغسول مناسب للبشرة
إختاري الغسول المناسب من السوق أو سويه بنفسج … تقدرين تخلطين الحليب مع العسل أو جل الصبار أو ماء الورد أو ماء البابونج أو كريمة مخفوقه مع حليب أو عصير الطماطم أو الزيوت مثل زيت الجليسرين وبذرة العنب وزيت الزيتون…. أي نوع من الي ذكرته تحطينه في قطنه وتمسحين فيه البشرة برفق وبعدين تغسلينها بالماي عشان تزيلين أثار الغبار أو المكياج قبل ما ننتقل للخطوة الثانية
2. نسوي حمام بخار عشان نفتح المسامات تقريبا لمدة عشر دقايق مع وضع فوطة عشاننحجز البخار بس حاولي تكونين بعيدة عن فتحة البخار عشان ما تتهيج البشرة بالحرارة.
أنا أستخدم هذا الجهاز
3. بعد ما نتأكد إن المسامات مفتوحة نبدا نطلع الرؤوس السوداء خصوصا عند الأنف والذقن والجبهة… إذا بتستخدمين أصابعج إستخدمي أوراق محارم عشان ما يتلوث المسام المفتوح أو باستخدام الأداة الخاصة… وبعد ما ننتهي نغسل الويه بالغسول المناسب.
4. الخطوة التالية هي عمل تقشير للطبقة الميتة من الجلد …. عندنا أنواع كثيرة من المقشرات وتقدرين تستخدمين أشياء متوفرة عندج في المطبخ … مثل الملح… السكر… حبوب الشوفان … مسحوق اللوز… حبوب القهوة المطحونة…. بودرة جوز الهند . ضيفي أي نوع مع الماي أو الزيوت ويفضل الزيوت عشان تتشربها البشرة واتركيها من 5-10 دقايق وبعدين إبدي إفركي ويهج بلطف عشان تشلين الجلد الميت وغسليه بماي دافي عقب ما تخلصين.
أنا السكراب مالي أضفتله النيلة عشان يعطيني بياض ونضارة بالإضافة الي الزيوت والترمس المر.
تتركينه لين ما يجف وبعدين إتشلينه برفق وبتشوفين الرؤوس السودا وبعض الزيوت البيضة عالقة في القناع …. من أروع الماسكات الي جربتها بس عاد تحملي الريحة… حتى ملمس البشرة مثل بشرة الأطفال …. تقدرين إتضيفين خل التفاح أو الخل العادي عشان الزفرة..
واحتفظت بالصفار وحطيته على شعري …. يعطي نعومة ولمعان للشعر بشكل عجيييييب
6. والحين يت خطوة مهمة وهي وضع تونر عشان يسكر المسامات .. وعشان إيوازن معدل الحموضة ال pH في البشرة الي افتقدتها خلال عملية التنظيف وبالتالي إيعيدها لمعدلها الطبيعي اللازم لمقاومة البكتيريا والجراثيم.
التونر يمكن تشترينه أو تسوينه بروحج بماي الورد… أنا أستخدم مركز ماي الورد بزيت بذرة العنب … أحطه في قطنه مع الماي وأمسح فيه البشرة كاملة … بشد البشرة والمسامات ويفضل الماء البارد أو المثلج.
7 وضع السيروم المغذي للبشرة سواء من السوق أو أشياء طبيعية مثل فيتامين E أو زيت الأفوكادة وزيت زهرة ربيع المساء وزيت جوز الهند وزيت الجوجوبا وزيت أرجان …..أو الزيت المركز مثل الجيرانيوم , البابونج, اللافندار , اللبان العربي, الجونيبر, الروزماري ….
8.وضع جل للعين مثل جل الصبار أو قطعتين من الخيار عشان يقلل إنتفاخ الويه
9. وأخيرا ……ترطيب البشرة …… ولازم ما ننسى هذي الخطوة خصوصا للبشرة الجافة … لأن البشرة تحتاج للترطيب خصوصا بعد ما فقدت الدهون الازمة خلال روتين التنظيف…. أنا أستخدم كريم كلارنس للبشرة الجافة و زبدة الشيا بكمية بسيطة لأنها تغذي البشرة وتزيل آثار البثور وتعتبر كواقي طبيعي للشمس.
أنصحكم إتسوونها مرة في الإسبوع وإختاروا الوقت المناسب والمكان المناسب عشان تحصلين على بشرة حلوة ونضرة لأن العامل النفسي يلعب دور مهم في نضارة البشرة….
وشكرا على المتابعة
متابعاك عزيزتي