بإختصار وبدون مقدمات أنا حيرانــــــــــة بكل معاني الكلمة، انا بنوتة لكن مشكلتي يمكن مرت على أكثر من وحده لكن أنا أول مرة أعيش هالوضع إلي من الخاطر مب مرتاحه يه..
أنا أشتغل وفي مقر عملي إنعجب فيني واحد وطول سنتين ما خبرني ولا قال" إق".. خلا موضوع حبه لي مجرد سر.. ولما صارح ربيعتي الي جريبة مني واااايد / ربيعتي إحتشرت عليه وقالتله انت كيف تتزوج وحده تداوم وياك؟ المهم.. هو سوى لها طاف .. وفي ذات يوم وصل لمكتبي وخبرني انه يبا يتقدم لبنت خالته بس هو رد وفكر بالموضوع عدل وغير إختياره من بنت خالته لست الحسن والدلال أنا..
المهم أنا انصدمت و قالي الولد خبري أهلج عني.. أنا رحت وسويت إلي قاله ولما خبرت أهلي قلت لهم التالي… [الولد زين وطيب ووايد زين بس فيه عيب ألا وإنه بدون جنسية] أهلي رفضو الموضوع من البداية علشان الجنسية..
الولد قالي بتريا لين تطلع الجنسية،قلت له انشالله خير..مع مرور الأيام داومت وياي وحده جديدة وهي واااايد طيبة وبين فترة لفترة تسولف لي عن أخوها إلي يدور حرمة وبس هي لاقية وحده بس خايفة من ردت فعلها.. لمشكله حطتني في موقف حرج..
أحين أنا بصراحة الولد يناسبني أكثر من أخو ربيعتي.. لأن أخو ربيعتي أكبر مني بواايد و مايعرف عني إلا إسم.. أما الولد إلي أداوم وياه فهو عارف عني كل شي وأنا عارفه عنه كل شي..
أحين أنا أحترت .. أرضى في منو؟ مع إني صليت إستخارة وطلع لي شخص ثاني بعد في الدوام ..!!
والله يوفقج
الله يعينج اختي
وبعدين صلاة الاستخارة ما تبين من اول مرة ..
صلي مرة ومرتين وثلاث ..
وترا مب شرط تحلمين او ترتاحين ..
اللي فيه الخير الله بييسره لج وبيتم على خير ان شاء الله ..
والله يقدم الي فيه الخير
خلي اهلج يسالون عن اخو ربيعتج..هو كم عمره..؟ تره العمر ما يأثر بالعكس بيكون فاهم وناضج
وعقب ما اهلج يسالون عنه شوفي الاحسن..واهم شي تستخيرين..
ربنا يوفقج