قبل يوم الخميس بأسبوع حجزت عند أم شامخ علشان اتمكيج واتسرح عندها وبعدها أطلع على ملجة ولد عم ريلي اللي كانت في دبي :1 (81): .. أتفقت وياها على أساس أني بكون عندها في الشامخه على الساعه 4 العصر وبما أني ما أعرف المناطق الخارجيه لأمارة أبوظبي وما في مره سرت الشامخه أو بني ياس مع أني من أهل بوظبي فقمت بدوري سويت أتصالاتي مع بنات عمي وخواتي علشان يدلوني منطقة الشامخه ومن ذكاءهم الخارق اونهم دلوني المنطقه لكن امحق مدله الا ضيعوني :1 (36):
طلعت الساعه 3 من بوظبي وما اتصلت في أم شامخ مع انها الحرمه قالت لي أتصلي فيني وانا بدلج المنطقه لكن أوني انا واثقه من عمري ادل الشامخه .. الله وكيلكم أسوق بالسياره الين ما وصلت للباهيه جان أتصل في أم شامخ اقولها ها وين بيتكم انا في منطقة الباهيه تخيلوا الحرمه مش عارفه تضحك ولا تصيح اكيد انصعقت وقالت انتي وين وصلتي انتي قريب دبي ونحن بعد مصفح وبعد منطقة خليفه فتخيلوني ذيج الساعه بموت من القهر ..
المهم خذت نفسي ورديت الين جسر المقطع وأم شامخ معاي عالخط وبعدها عطت أخت زوجها التليفون علشان تدلني عالطريق وبعد عذاب وحواطه لمعظم المناطق الخارجيه لأمارة أبوظبي وصلت لبيتها طبعا ببركة أخت زوجها اللي كانت تضحك علي وتقولي المفروض يسحبون الليسن منج ويعطونج تراي من أول ويديد ..
وصلت عندها الساعه 4:15 وأول ما دخلت عندها الصراحه كأني أعرف هذي الحرمه من زمان .. والله ما أبالغ اذا أقول ان أم شامخ فعلا شامخه بأخلاقها والتعامل معاها فعلا راقي وأنا قعدت معاها ساعه لكن كنت أتمنى اطول لأن يلستها ما تنمل وخصوصا أخت زوجها العسوله اللي كله تضحك وتضحكني وياها وأم شامخ تقول لأخت زوجها لا تضحكين علشان ما تضحك وياج الحرمه ويخترب الميك اب .. ومعاها بعد وحده للشعر بعد شغلها وايد راقي وحلو .. بالنهايه طلعت من عندها وانا مستانسه من شغلها اللي أكثر من روعه مع أن سعرها وايد قليل يعني سعرها لا يذكر بالمقارنه بشغلها المرتب ..
(تتوقعون ان السالفه خلصت لا لا لا لا بعدنا في أول المشوار)
وانا طالعه تسألني أخت ريلها تدلين الطريق اللي يطلعج لدبي ورديت عليها بكل وثوق نعم أدل الطريق ولا تحاتين الغاليه .. المهم طلعت من البيت وانا طاره الشارع وفرحانه الا اشوف لافته كبيره مكتوب عليها بني ياس شرق جان افتح عيوني واقول في خاطري يا ويلي ويلاه شو هاي المصيبه انا شو طلعني للشارع هذا .. وانا في عز المحنه الا بأخت زوج أم شامخ تتصل فيني علشان تطمن علي وأنا اقولها الحقي علي تراني مضيعه وقامت المسكينه قالت لي ردي لنفس المكان المصيبه حتى طريق الرده مش عارفتنه وين.. المهم بعد تعب رجعت لنفس المكان لكن المصيبه مره ثانيه طلعت طريق غلط لكن هذي المره طريق المقبره الجديده اللي تودي العين .. شوي والحرمه بتستخف مني وتقولي أنتي شو طلعج طريق العين وانا ساكته من القفطه :1 (82): بعد معاناه شديده شفت دوار رجعت منه وبعدها وصلت لدوار سويحان اللين ما دخلت الطريق اللي يطلعني لدبي والفضل يوصل للأم شامخ وأخت زوجها العسل
أهم من كل هذا أني وصلت القاعه والكل يسألني عن مكياجي وتسريحتي واللي قرروا خوات زوجي انهم يحجزون معاي للعرس عند أم شامخ ..
ومن هذا المنتدى أريد أشكر أم شامخ على كل شي واسمحيلي ادري اني تعبتج وياي وايد بس يالله موقف وعدا على خير والمره اليايه ما بتبع شور بنات عمي بخليج معاي عالخط اللين ما أوصل بيتج :1 (84):
المشاركة الأصلية كتبت بواسطة اتعبني@غروري 
ويوفقج يا رب ومشكوره عمرورج الطيب :22 (12):
