أتمنى إن كان لابد من نقل الموضوع إلى منتدى آخر ذكر إسم صاحبة الموضوع لأنه اجتهاد شخصي وشكراً
1- قومي الصبح بدري وحضري لعيالج الإفطار.
2- تأكدي من إن عيالج صحوا من النوم …. وغسلوا وجوهم عدل وفرشوا أسنانهم.
3- خليهم يتناولون فطورهم قبل لا يلبسون …. علشان تتأكدين إنهم ما بيوصخون ثيابهم.
4- ساعديهم في لبس زيهم المدرسي إذا كانوا بعدهم في الكي جي ويحتاجون مساعدة … وسرحي شعرهم البنات ممكن كل يوم تتفننين لهم في تسرحية و أنا عن نفسي أحب البنات المرتبات وشعرهم مشط ومرتب مثلا :
مره سوي لهم عجفتين – أو اعجفي لهم الغرة من الصوبين واجمعيهم في النص وسوي لهم عجفة وحدة – سوي لهم العجفة الفرنسية – سوي لهم عجفتين واطويهم – أو سوي لهم 4 عجف وخلي كل 2 مع بعض – ممكن تاخذين الجزء اللي يكون بعد الغرة وتاخذينه تجمعينة على جهة اليمين أو اليسار وتعجفينه وتربطينه والشعر إللي وار اقسميه نصين وسويه عجفين أو حتى عجفة وحده – ممكن تسوين لهم نفس ذيل الحصان على الجنبين- طبعاً لازم الشريطة على لون الزي المدرسي علشان يعطي منظر مرتب ومنظر الطالبة الحقيقية – أو ممكن تقصين لها كاري أو فطر أو المقصص وتجمعين لها الغرة صوب واحد وتحطين لها شباصة ناعمة.
5- تأكدي إنهم لبسوا ساعة اليد …. حتى لو كان في الكي جي وما يعرف للوقت انتي حاولي تعلمينه وتخلينه يرتبط بالساعة علشان يتعلم الطفل يحترم الوقت….
6- تأكدي من شنطة المدرسة إن الكتب والكراسات فيها كاملة والمقلمة أدواتها كاملة … واللانج بوكس حطيتي فيه كل شي وأنهم اخذوا معاهم مصروف المدرسة
هذي أنواع من اللانج بوكس
أو 
7- قبليهم واحضنيهم وادعي لهم بالتوفيق وخليهم يسيرون مدارسهم وانت تودعينهم بابتسمة دافية.
8- مارسي حياتج اليومية بالشكل الروتيني إللي تعودتي عليها سواء كنتي ربة بيت أو موظفة
9- إذا كنت إمرأة عاملة وبتتأخرين أكثر عن الساعة 3 الظهر أعطي أوامر بأن يسبقونج على الغداء وبشرط يتجمعون كلهم على السفرة مب كل واحد يتغدا على مزاجه . ووصي الأكبر حتى لو كان عمره 6 سنين إن ياخذ مكانج على الغدا ويتأكد إن اخوانه كلهم تغدوا وإذا حصلت مشكلة يحاول يحلها بهدوء وينصح …. مب يقوم يكفخهم (تراهم يحبون التكفيخ 
).
أما إن كنتي بترجعين البيت قبل هذا الوقت فيفضل انج تخلينهم ينتظرونج وتتغدون سوا
لأن هذا يعزز الروابط الأسرية وفي نفس الوقت تخلين الكبير يتعلم يتحمل المسؤولية
10- اطلبي من عيالج بعد الغداء يبدون وظائفهم المنزلية علشان يخلصون بسرعة ويكون عندهم وقت للتلفزيون والجلسة العائلية …. حاولي تساعدينهم في حل بعض الواجبات …. لكن لا تحاولين تحلين الوظيفة بدالهم… حتى لو كان تلوين أو رسم … لأنهم ما بيستفيدون من اللي يتعلمونه … والشي الثاني بيخليهم ناس اتكاليين … وعارفين الماما بتحل الوظيفة بدالهم ….
إذا عندج مثلاً ولد في الصف الثالث وولد في الصف الثاني خلي غللي في الصف الثالث يساعدج في تعليم اخوه اللي في الصف الثاني إذا ما كان عنده أي شي يسويه … وهذا بعد بيعزز الروابط بين الإخوان …..
11- بعد ما يخلصون وظائفهم اجتمعوا مع بعض وحطي القناة إللي تناسب أعمارهم كلهم وناقشيهم عن أي شي يخصهم والعبي معاهم مسابقات وقولي لهم ابتسامات وخليهم هم بعد يقولون لج …. وإذا كان في موضوع صاير في البيت وممكن يعرفونه كلميهم وصارحيهم … وخليهم يبدون رايهم ويعبرون عن مشاعرهم …. من أكبر واحد لين أصغر واحد بالبيت …. وحاسبي إنج تضحكين أو تستهينين بالراي إللي قدموه لج من آراء … لأن هذا الشي يعزز ثقتهم بنفسهم …
12- شوفي شو فخاطرهم يتعشون وقدميه لهم … وبعد العشا بنص ساعة سوي رياضة إنتي وياهم وكوني لهم القدوة لا تقولين مالي مزاج … تعبانة … ما أقدر …. علشان خاطرهم سوي لأن الرياضة تمنع الأمراض واتطول بالأعمار بإذن الله …. لو لمدة من ربع إلى نص ساعة ولو بين يوم وترك … مشي أو جري أو نط أو اشتري شريط رياضة وسوي نفس الحركات اللي تشوفينها قدامج
13- خليهم يستحمون ويتنظفون ويتفركون باللوشنات … وينظمون شنطة المدرسة لليوم إللي بعده
14- ضبطي لهم المنبه وخليهم يرقدون وحذاري من السهر يعني بالكثير وإذا مصخوها مصخوها 10 بعد جذي لازم يبدون في أحلامهم …. أنا عن نفسي يجن جنوني إذا صارت الساعة 9 واتصلت في وحدة من خواتي وسمعت صوت عيالهم…. أصلاً عيالهم إذا شافوا رقمي على الكاشف ما يفكرون يرفعون السماعة
يتبــــــــــــــــع
2- إكوي ملابسهم ودخنيها وعطريها … ولا تنسين الجوارب النظيفة … والجوتي الملمع والنظيف.
3- حطي في الصالة حصالة صغيره وخليهم يومياً يحطون فيها لو درهم واحد قبل لا يطلعون لمدارسهم وفهميهم إن هذا هو صندوق الصدقات والتبرعات وفي نهاية الشهر خذيه وعطيه للفقراء … أو خليهم هم بنفسهم يعطون الفقراء … علشان تعززين في نفوسهم العطف على الفقراء والمساكين والمحتاجين.
4- في آخر يوم في الأسبوع يعني آخر يوم دوام يعني ناس عندهم الأربعاء بيكون وناس الخميس على حسب إجازة الدولة إللي انتي فيها خذي عيالج لبيت أهلج مثلاً الظهر والعشاء بيت أهل زوجج … علشان يتعودون على زيارة الأرحام .
واليوم الثني خليهم يختارون المكان اللي يبغون يزورونه مثلاً مركز تجاري أو الملاهي أو البحر … وإذا اختلفت الآراء سوي تصويت واختاري راي الأغلبية
أما يوم الجمعة أو السبت إللي بيكون عبارة عن ليلة المدارس خليه للمراجعة الدروس وحل الواجبات
5- حاولي تفاجئين أطفالج بين فترة والثانية بهدية على سريرهم … يفرحون فيها بعد ما يرجعون من مدرستهم
مقترحات اللانج بوكس يعني تقريباً كأنه حزة غداء
– ساندويش تشكن بورجر
صامون الساندوشات بلليه بماي وحطيه في التوست على طول ونشفيه …. بتلاقينه يستوي نفس صامون ماكدونلز … حطي في الساندويشة شريحة طماطم – شريحة خس – تشكن بورجر – قطعة جبنة – مايونيز …وحطيه شوي في المايكرو ويف علشان الجبنة تسيح
– كلوب جبن أو جبن ودجاج
خذي التوست وقطعيه إلى 4 قطع فبيطلع الحجم صغير جداً وهذا هو المطلوب لأن الأطفال يحبون ياكلون الأشياء الصغيره … يحسونها شوي وممكن تخلص بسرعة
وحطي لهم فيها طماطم – خس – جبن – وإذا حبيتي يكون كلوب جبن بالدجاج …
خذي صدر دجاج وافرميه … واقليه مع قليل من البصل وأضيفي له مكعب الماجي + القليل من البهارات + قليل من الهردة + قليل من الصماق + ملعقتين روب + فلفل أخضر مفروم … وأضيفيه للكلوب ويصير كلوب جبن بالدجاج …. وفي النهاية أغمسي فيه عود الأسنان للتثبيت وثبتي فوقه حبة زيتون أسود.
– ساندوشة فلافل
حطي الفلافل ممكمن تشترين جاهز وممكن تحصلينه بالجمعية مثلج ويحتاج بس قلي.. أو إنتي ممكن تحضرينه … وحطي معاه شوي هردة وخس مقطع وطماط مقطع مكعبات
– معجنات
ممكن تشترين من الليل جاهز وتسخنينه الصبح أو تسوينه بالبيت
وممكن تختارين مكوناتها كالتالي
– جبنة أو لبنه بالزعتر أو بالعسل – جبنة باللحمة – فول – سبانخ – بطاط مفيوح ومهروس واخلطي معاه البصل الأخضر المفروم والمقدونس المفرومة وشوي ملح.
– ممكن تحطين تبولة – سلط – سيزر سلط
ملاحظة : تحملي من ساندويشة البيض المفيوح أذكر كنا نشرد من البنات والسبب ريحتهم إللي تكون مثل البيض .
– لاتنسين التحلية بعد ما ياكلون
قطعة كيك – فروت سلط – قطعة سويت عملتيها في البيت بيدج أو أي نوع من الجوكليت إللي يحبونه – أو فاكه مثل الفراولة أو الموز ..
واحفظيه في مثل هذي العلب علشان تظمنين يحافظون على نكهاتهم ولا يتخربطون مع بعض
ولا تنسين العصير والماء
وحاولي تخلين لهم العصير والماء في البراد إللي يحفظ حرارة الشي لوقت طويل علشان يشربون الشي وهو بارد ويتهنون فيه
مقترحات للإفطار
– عصير فريش (برتقال – موز – عنب – تفاح – فراوله – كوكتيل – أفكادو – مانجا ) يعني شو يشتهي خاطرهم وإذا بغوا عصير بالحليب مب مشكلة إعملي الحليب بالطريقة الإعتيادية وأضيفي له العصير واخلطيهم بالخلاط ويصير عصير بالحليب
– حليب فريش مب شاي بالحليب لأنه غير صحي … لأن الشاي يمتص كل فوائد الحليب وبالتالي ما يستفيد الطالب من الحليب
– بيض مفيوح وحاولي تقطعينه شرائح أو بيض مقلي وتفنني في تزيين الطبق علشان تنفتح شهيتهم للأكل
– كورنفليكس + حليب
– لبنه – جبن – عسل – مربى – طماطم شرائح – زيتون – زبدة
– بلاليط
– خبز محلى أو جباب
– ولا تنسين صحن الفاكهة
أتمنى إني ما طولت عليكم إلا بكل ما هو مفيد … وأتمنى ما أكون غثيتكم بمواضيعي وقدمت لكم المفيد
منقووووووول
وعام دراسى سعيد لكل والله يوفق عيالنا ويعينا على تربيتهم
شكرا لك
وجزاج الله خير وكل سنه وانت بخير
وعام دراسى سعيد لنا كلنا
والله يوفق عيالنا ويعينا على تربيتهم
فعلاً موضوع شيق ومفيد
ويزاج الله خير اختي على النقل المفيد
المشاركة الأصلية كتبت بواسطة ريم الوضح 
وعام دراسى سعيد لكل والله يوفق عيالنا ويعينا على تربيتهم
وكل سنه وعيالنا بخير ……