أنا أحب صالونة اللحم بجنووون.. وأحبها أكثر لما تكون ثقيلة شوي بالذات مع العيش الأبيض أو خبز النان الهندي
بصراحة هي صالونة ولا أسهل.. وأفضل شي تطبخينها بقدر الضغط عشان تنطبخ بسررررعة لان طباخة اللحم عالنار العادية تاخذ وقت وكمان لأن قدر الضغط يخلي الصالونة ثقيلة وحلوة
شوفي أنا ما عندي مقادير معينة.. طبخي على حسب عدد الأشخاص.. طريقتي كالأتي:
– أستعمل قطع لحم صغيرة يعني كل قطعة ما تتعدى حجم علبة الماجي الصغيرة أو علبة الكبريت الصغيرة
– خذي قدر الضغط وحطي فيه اللحم مع ماء كافي لتغطية اللحم وفصين ثوم عشان تروح الزفرة وشوي بهارات صحيحة.. يعني أعواد قرفة و مسمار وهيل
– سكري عليهم القدر وخليه على نار عالية لين يطلع صوت صفارة القدر
– أفتحي القدر وطلعي اللحم كله لصحن وخليه على جنب وتخلصي من كل الماي يلي انسلق فيه اللحم
– رجعي نفس القدر عالنار وضيفي له شوي زيت وبصل.. لين ما يتحمص البصل
– عقب ضيفي ثوم وطماط وقرون فلفل حار و أي نوع خضار تحبين مثل: بطاط أو كوسا أو جزر
– قلبيهم شوي وعقب ضيفي ملح وفلفل و أي بهارات تحبين مثل: كمون و كركم و بزار عربي و لومي يابس
– رجعي اللحم يلي في الصحن للقدر, ضيفي ماي لين يتغطى الخليط وأخلطيه
– عقب سكري قدر الضغط وخليه على نار عالية لين تصفر الصفارة
– وبكذا بتكوني سويتي صالونة لحم بأقل من نص ساعة
اتمنى اكون افدتج بوصفتي